ନୟାପଲ୍ଲୀରୁ CRP ଛକ, ସେଠାରୁ ଆମ ବସ୍ —CCTV ଯୋଡ଼ି ଯୋଡ଼ି ଶ୍ରୀଧର ପଣ୍ଡା ପାଖରେ ପହଞ୍ଚିଲା ପୋଲିସ

୧୦୦ରୁ ଅଧିକ CCTV । ଆମ ବସ୍ ଓ ଚୋରି ବାଇକ୍ ର ସୁରାକ୍ । ଏମିତି ଶ୍ରୀଧର ପଣ୍ଡା ପାଖରେ ପହଞ୍ଚିଲା ପୋଲିସ । ନୟାପଲ୍ଲୀରୁ CRP ଛକ, ସେଠାରୁ ଆମ ବସ୍ —CCTV ଯୋଡ଼ି ଯୋଡ଼ି ଚନ୍ଦକାରେ ପହଞ୍ଚିଲା ପୋଲିସ । ଧରିବା ବେଳେ ଗୁଳିମାଡ଼, ପାଲଟା ଗୁଳିରେ ଆହତ ଅଭିଯୁକ୍ତ । ନୟାପଲ୍ଲୀରେ ୨୬ ବର୍ଷୀୟା ଯୁବତୀଙ୍କୁ ବନ୍ଧୁକ ଦେଖାଇ ଦୁଷ୍କର୍ମ ଅଭିଯୋଗ ମାମଲାରେ ପୋଲିସ ହାତରେ ଅଭିଯୁକ୍ତ ଶ୍ରୀଧର ପଣ୍ଡା । ଘଟଣା ପରେ ଅଭିଯୁକ୍ତ ମୁହଁ ଲୁଚାଇ ଫେରାର ହୋଇଯାଇଥିଲା । ପ୍ରତ୍ୟକ୍ଷଦର୍ଶୀ ନଥିଲେ, ଅଭିଯୁକ୍ତର ପରିଚୟ ମଧ୍ୟ ଜଣାନଥିଲା । ଏପରି ସ୍ଥିତିରେ CCTV ଫୁଟେଜ୍ କୁ ମୁଖ୍ୟ ଅସ୍ତ୍ର କରି ତଦନ୍ତ ଆଗକୁ ବଢ଼ାଇଥିଲା କମିଶନରେଟ୍ ପୋଲିସ । ଶେଷରେ ଗୋଟିଏ ପରେ ଗୋଟିଏ ସୁରାକ୍ ଯୋଡ଼ି ପୋଲିସ ଶ୍ରୀଧର ପଣ୍ଡା ପାଖରେ ପହଞ୍ଚିଥିଲା ।

ଅଭିଯୋଗ ଅନୁସାରେ, ବୁଧବାର ସନ୍ଧ୍ୟାରେ ନୟାପଲ୍ଲୀ ଅଞ୍ଚଳର ଏକ ଭଡ଼ାଘରେ ଯୁବତୀ ଏକୁଟିଆ ଥିବା ସମୟରେ ଜଣେ ମୁଖାପିନ୍ଧା ବ୍ୟକ୍ତି ଘରେ ପଶିଥିଲା । ଅସ୍ତ୍ର ଦେଖାଇ ଭୟଭୀତ କରିବା ପରେ ତାଙ୍କ ସହ ଦୁଷ୍କର୍ମ କରିଥିବା ନେଇ ପୀଡ଼ିତା ନୟାପଲ୍ଲୀ ଥାନାରେ ଅଭିଯୋଗ କରିଥିଲେ । ପୋଲିସର ତଦନ୍ତରେ ପରେ ସାମ୍ନାକୁ ଆସିଥିଲା ଯେ, ଦେଖାଯାଇଥିବା ଅସ୍ତ୍ରଟି ପ୍ରକୃତ ବନ୍ଧୁକ ନହୋଇ ବନ୍ଧୁକ ଭଳି ଦେଖାଯାଉଥିବା ଲାଇଟର୍ କିମ୍ବା ନକଲି ବନ୍ଧୁକ ହୋଇପାରେ । ପୋଲିସ ସୂତ୍ର ଅନୁସାରେ ଅଭିଯୁକ୍ତ ପୀଡ଼ିତାଙ୍କ ସ୍କାର୍ଫରେ ତାଙ୍କୁ ବାନ୍ଧିବା ସହ ମୋବାଇଲ୍ ମଧ୍ୟ ଭାଙ୍ଗି ଦେଇଥିଲା । ପୋଲିସ ସାମ୍ନାରେ ସବୁଠାରୁ ବଡ଼ ଚ୍ୟାଲେଞ୍ଜ ଥିଲା ଅଜଣା ଅଭିଯୁକ୍ତର ପରିଚୟ ଖୋଜିବା । ଏଥିପାଇଁ ଘଟଣାସ୍ଥଳ ଓ ଆଖପାଖ ଅଞ୍ଚଳର CCTV ଫୁଟେଜ୍ ଖୋଜିବା ଆରମ୍ଭ ହୋଇଥିଲା ।

ଭୁବନେଶ୍ୱର DCP ସରଭଣା ବିବେକ ଏମ୍ ଙ୍କ ସୂଚନା ଅନୁସାରେ, ତଦନ୍ତକାରୀ ଟିମ୍ ୧୦୦ରୁ ଅଧିକ CCTV କ୍ୟାମେରାର ଫୁଟେଜ୍ ଯାଞ୍ଚ କରିଥିଲା । ଏହି ଫୁଟେଜ୍ ଭିତରୁ ଅଭିଯୁକ୍ତର ଗତିବିଧି ସମ୍ପର୍କରେ ପୋଲିସକୁ ଗୁରୁତ୍ୱପୂର୍ଣ୍ଣ ସୁରାକ୍ ମିଳିଥିଲା। ଗୋଟିଏ CCTVରେ ସନ୍ଦିଗ୍ଧ ବ୍ୟକ୍ତି ଘଟଣା ପରେ ଚାଲି ଚାଲି ଯାଉଥିବା ଦେଖାଯାଇଥିଲା । ଏହାପରେ ପୋଲିସ କେବଳ ଘଟଣାସ୍ଥଳର CCTVରେ ସୀମିତ ରହିନଥିଲା । ଆଖପାଖ ରାସ୍ତାର କ୍ୟାମେରା ଯାଞ୍ଚ କରି ଅଭିଯୁକ୍ତ କେଉଁ ଦିଗକୁ ଯାଇଥିଲା, ତାହାର ରୁଟ୍ ପ୍ରସ୍ତୁତ କରିବାକୁ ଉଦ୍ୟମ କରାଯାଇଥିଲା । ପୋଲିସ ତଦନ୍ତ ଅନୁସାରେ, ଘଟଣା ପରେ ଅଭିଯୁକ୍ତ ନୟାପଲ୍ଲୀ ଅଞ୍ଚଳରୁ CRP ଛକ ଆଡ଼କୁ ଚାଲି ଯାଇଥିଲା । CRP ଛକରେ ପହଞ୍ଚିବା ପରେ ଅଭିଯୁକ୍ତ ଏକ ଆମ ବସ୍ ରେ ଚଢ଼ିଥିବା ପୋଲିସ ତଦନ୍ତରେ ସାମ୍ନାକୁ ଆସିଛି । ଏହାପରେ ବସ୍ ର ଗତିପଥ ଓ ଅଭିଯୁକ୍ତର ପରବର୍ତ୍ତୀ ଗତିବିଧିକୁ ନେଇ ତଦନ୍ତ ଆଗକୁ ବଢ଼ିଥିଲା ।

ପୋଲିସ CCTV, ବସ୍ ରୁଟ୍ ଏବଂ ଅନ୍ୟ ସୂଚନାକୁ ମିଶାଇ ଅଭିଯୁକ୍ତ କେଉଁଆଡ଼େ ଖସିଥିଲା ତାହା ଖୋଜୁଥିଲା । ତଦନ୍ତରେ ଆଉ ଏକ ବଡ଼ ସୁରାକ୍ ଥିଲା ଏକ ମୋଟରସାଇକେଲ୍ । ପୋଲିସର କହିବା ଅନୁସାରେ, ଅଭିଯୁକ୍ତ ପରବର୍ତ୍ତୀ ସମୟରେ ଏକ ମୋଟରସାଇକେଲ୍ ଚୋରି କରି ଫେରାର ହୋଇଥିଲା । ତଦନ୍ତକାରୀମାନେ ତା’ର ଯାତାୟାତ ରୁଟ୍ ରେ ଥିବା CCTVଗୁଡ଼ିକୁ ଯାଞ୍ଚ କରି ଗତିବିଧି ଟ୍ରାକ୍ କରୁଥିଲେ । ପୋଲିସ ତଦନ୍ତରୁ ଆଉ ଏକ ଗୁରୁତ୍ୱପୂର୍ଣ୍ଣ ଦିଗ ସାମ୍ନାକୁ ଆସିଛି । ଜଣେ ବରିଷ୍ଠ ପୋଲିସ ଅଧିକାରୀଙ୍କ ସୂଚନା ଅନୁସାରେ, ଶ୍ରୀଧର ପଣ୍ଡା ନାଁରେ ପୂର୍ବରୁ ମୋବାଇଲ୍ ଚୋରିର ଦୁଇଟି ମାମଲା ଥିଲା । ପୋଲିସର ପ୍ରାଥମିକ ତଦନ୍ତ ଅନୁସାରେ ସେ ମୋବାଇଲ୍ ଚୋରି ଉଦ୍ଦେଶ୍ୟରେ ଘରକୁ ରେକି କରିଥିଲା । ଯୁବତୀଙ୍କୁ ଏକୁଟିଆ ଦେଖିବା ପରେ ତା’ର ଉଦ୍ଦେଶ୍ୟ ବଦଳିଥିବା ପୋଲିସ ପକ୍ଷରୁ କୁହାଯାଇଛି । ଏହି ସବୁ ସୁରାକ୍ ଉପରେ ତଦନ୍ତ ଚାଲିଥିବା ବେଳେ ଶେଷରେ ପୋଲିସ ଶ୍ରୀଧର ପଣ୍ଡାକୁ ଚନ୍ଦକା ଅଞ୍ଚଳରେ ଠାବ କରିଥିଲା । ତାକୁ କାବୁ କରିବା ପାଇଁ ପୋଲିସ ଟିମ୍ ପହଞ୍ଚିଥିଲା । କିନ୍ତୁ ପୋଲିସର କହିବା ଅନୁସାରେ, ଧରାଦେବା ପରିବର୍ତ୍ତେ ଶ୍ରୀଧର ଖସି ପଳାଇବାକୁ ଉଦ୍ୟମ କରିଥିଲା ।

DCP ସରଭଣା ବିବେକ ଏମ୍ ଙ୍କ ସୂଚନା ଅନୁସାରେ, ଶ୍ରୀଧର ଖସି ପଳାଇବା ବେଳେ ପୋଲିସ ଉପରକୁ ଦୁଇ ରାଉଣ୍ଡ ଗୁଳି ଚଳାଇଥିଲା । ଏହାପରେ ଆତ୍ମରକ୍ଷା ପାଇଁ ପୋଲିସ ପାଲଟା ଗୁଳି ଚଳାଇଥିବା DCP କହିଛନ୍ତି । ପୋଲିସ ଗୁଳିରେ ଶ୍ରୀଧରର ବାମ ପାଦରେ ଦୁଇଟି ଗୁଳି ବାଜିଥିବା ସୂଚନା ମିଳିଛି । ଏହାପରେ ତାକୁ କାବୁ କରାଯାଇ ଚିକିତ୍ସା ପାଇଁ ଭୁବନେଶ୍ୱର କ୍ୟାପିଟାଲ୍ ହସ୍ପିଟାଲକୁ ନିଆଯାଇଛି । ଏହି ମାମଲାରେ ପୋଲିସ ତଦନ୍ତର ସବୁଠାରୁ ଗୁରୁତ୍ୱପୂର୍ଣ୍ଣ କଡ଼ି ହେଲା CCTV । ଘଟଣାସ୍ଥଳରୁ ସନ୍ଦିଗ୍ଧର ଚିତ୍ର, ସେଠାରୁ CRP ଛକ ଆଡ଼କୁ ଗତିବିଧି, ଆମ ବସ୍ ରେ ଯାତ୍ରା ଏବଂ ପରେ ଚୋରି ବାଇକ୍ ରେ ଫେରାର ହେବା ସମ୍ପର୍କିତ ସୁରାକ୍ କୁ ଆଧାର କରି ତଦନ୍ତ ଆଗକୁ ବଢ଼ିଥିଲା । ଶେଷରେ ଶ୍ରୀଧରକୁ ଚନ୍ଦକା ଅଞ୍ଚଳରେ ଠାବ କରାଯାଇଥିଲା ।

ତେବେ CCTVର କେଉଁ ନିର୍ଦ୍ଦିଷ୍ଟ ଫୁଟେଜ୍ କିମ୍ବା କେଉଁ ଅନ୍ୟ ଟେକ୍ନିକାଲ୍ ସୁରାକ୍ ସିଧାସଳଖ ଶ୍ରୀଧରର ପରିଚୟ ନିଶ୍ଚିତ କରିଥିଲା, ସେ ସମ୍ପର୍କରେ ପୋଲିସ ଏପର୍ଯ୍ୟନ୍ତ ସବିଶେଷ ତଥ୍ୟ ସାର୍ବଜନୀନ କରିନାହିଁ । ତେଣୁ ସେହି ଅଂଶକୁ ନେଇ ଅନୁମାନ କରିବା ଠିକ୍ ହେବ ନାହିଁ। ଘଟଣାସ୍ଥଳକୁ ସାଇଣ୍ଟିଫିକ୍ ଟିମ୍ ଯାଇ ନମୁନା ସଂଗ୍ରହ କରିଥିବା ବେଳେ ମାମଲାର ଫରେନ୍ସିକ୍ ଓ ଅନ୍ୟ ପ୍ରମାଣକୁ ନେଇ ମଧ୍ୟ ତଦନ୍ତ ଚାଲିଛି । ଅନ୍ୟପଟେ ଓଡ଼ିଶା ରାଜ୍ୟ ମହିଳା କମିଶନ ନିଜ ଆଡ଼ୁ ଘଟଣାର ସଂଜ୍ଞାନ ନେଇ ଭୁବନେଶ୍ୱର DCPଙ୍କୁ ୧୫ ଦିନ ମଧ୍ୟରେ ରିପୋର୍ଟ ମାଗିଛନ୍ତି ।