ପଞ୍ଚମ ଟି-୨୦ରେ ଭାରତକୁ ୭ ୱିକେଟ୍ରେ ହରାଇଲା ନ୍ୟୁଜିଲାଣ୍ଡ
ନ୍ୟୁଜିଲାଣ୍ଡ ବିପକ୍ଷ ପଞ୍ଚମ ତଥା ଶେଷ ଟି-୨୦ ମ୍ୟାଚ୍ରେ ଭାରତୀୟ ଦଳ ୭ ୱିକେଟ୍ରେ ପରାଜୟ ବରଣ କରିଛି। ତେବେ ପ୍ରଥମ ତିନିଟି ମ୍ୟାଚ୍ରେ ବିଜୟ ହାସଲ କରିଥିବା ଟିମ୍ ଇଣ୍ଡିଆ ୩-୨ରେ ସିରିଜ୍କୁ ନିଜ ନାମରେ କରିଛି। ହାମିଲଟନ୍ରେ ଖେଳାଯାଇଥିବା ଏହି ମ୍ୟାଚ୍ରେ ୧୯୨ ରନ୍ର ବିଜୟ ଲକ୍ଷ୍ୟକୁ ନ୍ୟୁଜିଲାଣ୍ଡ ମାତ୍ର ୧୮ ଓଭରରେ ୩ ୱିକେଟ୍ ହରାଇ ହାସଲ କରିଥିଲା।
ଟିମ୍ ସିଫର୍ଟ ଓ ଗ୍ଲେନ୍ ଫିଲିପ୍ସଙ୍କ ଆକ୍ରମଣାତ୍ମକ ବ୍ୟାଟିଂ ଭାରତୀୟ ବୋଲରଙ୍କୁ ଚାପରେ ପକାଇଥିଲା। ସିଫର୍ଟ ମାତ୍ର ୫୦ ବଲ୍ରୁ ୯୩ ରନ୍ର ଦମ୍ଦାର ଇନିଂସ ଖେଳିଥିଲେ। ଅନ୍ୟପକ୍ଷରେ ଫିଲିପ୍ସ ୩୮ ବଲ୍ରୁ ଅପରାଜିତ ୬୫ ରନ୍ କରି ଦଳର ବିଜୟ ସୁନିଶ୍ଚିତ କରିଥିଲେ। ୧୮ତମ ଓଭରରେ ଲଗାତାର ଦୁଇଟି ଚୌକା ମାରି ଫିଲିପ୍ସ ନ୍ୟୁଜିଲାଣ୍ଡକୁ ବିଜୟୀ କରାଇଥିଲେ।ଭାରତ ପକ୍ଷରୁ ଅର୍ଶଦୀପ ସିଂହ, ବରୁଣ ଚକ୍ରବର୍ତ୍ତୀ ଓ ନୀତିଶ କୁମାର ରେଡ୍ଡୀ ଗୋଟିଏ ଲେଖାଏଁ ୱିକେଟ୍ ନେଇଥିଲେ। ତେବେ ନ୍ୟୁଜିଲାଣ୍ଡ ବ୍ୟାଟରଙ୍କ ଆକ୍ରମଣାତ୍ମକ ଖେଳ ଆଗରେ ଭାରତୀୟ ବୋଲରମାନେ ବଡ଼ ଲକ୍ଷ୍ୟକୁ ରକ୍ଷା କରିବାରେ ବିଫଳ ହୋଇଥିଲେ।ପ୍ରଥମେ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତ ୨୦ ଓଭରରେ ୮ ୱିକେଟ୍ ହରାଇ ୧୯୧ ରନ୍ କରିଥିଲା। ଇଶାନ କିଷାନ ୩୨ ବଲ୍ରୁ ୬୧ ରନ୍ କରି ଦଳକୁ ଭଲ ସ୍ଥିତିରେ ପହଞ୍ଚାଇଥିଲେ। ସେହିପରି ଅଧିନାୟକ ଶ୍ରେୟାସ ଆୟର ମାତ୍ର ୨୩ ବଲ୍ରୁ ୫୦ ରନ୍ର ଦ୍ରୁତ ଇନିଂସ ଖେଳିଥିଲେ। ତେବେ ନ୍ୟୁଜିଲାଣ୍ଡର ଆଡାମ ମିଲନେ ଚମତ୍କାର ବୋଲିଂ କରି ୪ଟି ୱିକେଟ୍ ଅକ୍ତିଆର କରିଥିଲେ।ଶେଷ ମ୍ୟାଚ୍ରେ ପରାଜୟ ସତ୍ତ୍ୱେ ଭାରତ ସିରିଜ୍କୁ ୩-୨ରେ ଜିତି ଗସ୍ତ ଶେଷ କରିଛି। ଅନ୍ୟପକ୍ଷରେ ଶେଷ ଦୁଇଟି ମ୍ୟାଚ୍ରେ ବିଜୟ ହାସଲ କରି ନ୍ୟୁଜିଲାଣ୍ଡ ମଧ୍ୟ ସିରିଜ୍ରେ ଦମ୍ଦାର ପ୍ରତ୍ୟାବର୍ତ୍ତନ କରିଛି।