ରାଜ୍ୟରେ ୭୬ହଜାର ୬୧୨ କୋଟିର ୨୦ଟି ପ୍ରକଳ୍ପକୁ ମଞ୍ଜୁରୀ,୫୦,୫୧୭ ଜଣଙ୍କ ପାଇଁ ସୃଷ୍ଟି ହେବ ନିଯୁକ୍ତି ସୁଯୋଗ

ରାଜ୍ୟରେ ୭୬ହଜାର ୬୧୨ କୋଟିର ୨୦ଟି ପ୍ରକଳ୍ପକୁ ମଞ୍ଜୁରୀ । ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଅଧ୍ୟକ୍ଷତାରେ ବସିଥିବା ୪୫ ତମ ଉଚ୍ଚସ୍ତରୀୟ ମଞ୍ଜୁରୀ କର୍ତ୍ତୃପକ୍ଷ (HLCA) ବୈଠକରେ ୯ଟି ଜିଲ୍ଲା ପାଇଁ ମୋଟ ୭୬ହଜାର ୬୧୧କୋଟି ୮୬ ଲକ୍ଷ ଟଙ୍କାର ୨୦ଟି ପ୍ରମୁଖ ଶିଳ୍ପ ପ୍ରକଳ୍ପକୁ ସବୁଜ ସଙ୍କେତ ମିଳିଛି । ଏହି ମେଗା ପ୍ରକଳ୍ପଗୁଡ଼ିକ ଦ୍ୱାରା ରାଜ୍ୟରେ ୫୦,୫୧୭ ଜଣଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ। ଏହି ନିବେଶଗୁଡ଼ିକ ଗ୍ରୀନ୍ ଏନର୍ଜି, ଷ୍ଟିଲ୍, ଫାର୍ମାସ୍ୟୁଟିକାଲ୍ସ, ଆଧୁନିକ ଖଣିଜ ଏବଂ ଓଡ଼ିଶାରେ ପ୍ରଥମ ଥର ପାଇଁ ‘ଲ୍ୟାବ୍-ଗ୍ରୋନ୍ ହୀରା’ (Lab-Grown Diamonds) ଉତ୍ପାଦନ ଭଳି ପ୍ରତିଶ୍ରୁତିବଦ୍ଧ କ୍ଷେତ୍ରରେ କରାଯିବ।

ନିବେଶର ପ୍ରମୁଖ ଆକର୍ଷଣ ଓ ବିଭିନ୍ନ ପ୍ରକଳ୍ପ:

ଓଡ଼ିଶାରେ ତିଆରି ହେବ ହୀରା : ଖୋର୍ଦ୍ଧା ଜିଲ୍ଲାରେ ‘ଲ୍ୟାବ୍-ଗ୍ରୋନ୍’ ହୀରା ଏବଂ ରତ୍ନପଥର ନିର୍ମାଣ ପାଇଁ ତିନୋଟି ବଡ଼ ସଂସ୍ଥା (Kira Diam LLP, Anjali Labtech Limited, ଓ Grow Magnificent Pvt Ltd) ମୋଟ ୯,୮୧୭.୫୦ କୋଟି ଟଙ୍କା ନିବେଶ କରିବେ। ଏହାଦ୍ୱାରା ୮,୧୦୦ ଜଣଙ୍କୁ ଚାକିରି ମିଳିବ।

ସୌର ଶକ୍ତି ଓ ଗ୍ରୀନ୍ ଏନର୍ଜି: ଗଞ୍ଜାମ ଜିଲ୍ଲାରେ ଟାଟା ପାୱାର୍ ରିନିଉଏବଲ୍ ଏନର୍ଜି ଲିମିଟେଡ୍ ୧୦,୦୦୦ କୋଟି ଟଙ୍କା ନିବେଶରେ ଏକ ସୋଲାର୍ PV ସେଲ୍ ଏବଂ ୱେଫର୍ ନିର୍ମାଣ ୟୁନିଟ୍ ପ୍ରତିଷ୍ଠା କରିବ, ଯାହା ୫,୦୦୦ ନିଯୁକ୍ତି ସୃଷ୍ଟି କରିବ। ସେହିପରି ସାତ୍ଵିକ ସୋଲାର୍ ଗଞ୍ଜାମରେ ୧,୭୦୯.୮୧ କୋଟି ଟଙ୍କା ନିବେଶ କରିବ।

ଇଭି (EV) ପାଇଁ ଚୁମ୍ବକ କାରଖାନା: ଖୋର୍ଦ୍ଧା/କଟକରେ N.A.N. Magnete କମ୍ପାନୀ ୧,୨୫୦ କୋଟି ଟଙ୍କା ବ୍ୟୟରେ ବୈଦ୍ୟୁତିକ ଯାନ (EV) ଗ୍ରେଡ୍ ଚୁମ୍ବକ ଉତ୍ପାଦନ କେନ୍ଦ୍ର ସ୍ଥାପନ କରିବ (୨,୦୦୦ ଚାକିରି)।

ଗଞ୍ଜାମରେ ମଧ୍ୟ ଏଲ୍ ଆଣ୍ଡ୍ ଟି (L&T) ୨,୪୦୦ କୋଟି ଟଙ୍କାର ଏକ ଚୁମ୍ବକ କାରଖାନା ପ୍ରତିଷ୍ଠା କରିବ।

ଇସ୍ପାତ ଏବଂ ମେଟାଲ୍ ସେକ୍ଟର:

ଯାଜପୁରରେ ରଶ୍ମି ମେଟାଲର୍ଜିକାଲ୍ ପକ୍ଷରୁ ୧୫,୦୦୦ କୋଟି ଟଙ୍କାରେ ୪ MTPA ବିଶିଷ୍ଟ ଏକୀକୃତ ଇସ୍ପାତ କାରଖାନା (୧୧,୦୦୦ ନିଯୁକ୍ତି)।

ସମ୍ବଲପୁରରେ ଶ୍ୟାମ ମେଟାଲିକ୍ସ ପକ୍ଷରୁ ୭,୫୮୦ କୋଟି ଟଙ୍କାର ପ୍ରକଳ୍ପ (୩,୫୦୦ ନିଯୁକ୍ତି)।
ଯାଜପୁରରେ ଜୁପିଟର୍ ୱାଗନ୍ସ ପକ୍ଷରୁ ୧,୫୦୦ କୋଟି ଟଙ୍କା ବ୍ୟୟରେ ରେଳ କୋଚ୍ ନିର୍ମାଣ କାରଖାନା