ଦେଶରେ ବଢ଼ୁଛି ମାନସିକ ସ୍ୱାସ୍ଥ୍ୟ ସଙ୍କଟ

ବର୍ତ୍ତମାନର ଆଧୁନିକ ତଥା ବ୍ୟସ୍ତବହୁଳ ଜୀବନଶୈଳୀ ଭିତରେ ମାନସିକ ସ୍ୱାସ୍ଥ୍ୟ ସାରା ଦେଶ ପାଇଁ ଏକ ବଡ଼ ଚ୍ୟାଲେଞ୍ଜ ଭାବେ ଉଭା ହୋଇଛି। ନ୍ୟାସନାଲ କ୍ରାଇମ ରେକର୍ଡସ ବ୍ୟୁରୋ ପକ୍ଷରୁ ପ୍ରକାଶିତ ସାମ୍ପ୍ରତିକ ୨୦୨୪ ରିପୋର୍ଟରେ ଏହି ଚିନ୍ତାଜନକ ତଥ୍ୟ ସାମ୍ନାକୁ ଆସିଛି। ରିପୋର୍ଟ ମୁତାବକ, ଦେଶରେ ମାନସିକ ଅବସାଦ ଓ ଚାପ ଯୋଗୁଁ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଉଥିବା ଲୋକଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି, ଯାହା ଏକ ଗମ୍ଭୀର ସାମାଜିକ ସଙ୍କଟ ଆଡ଼କୁ ଆଙ୍ଗୁଳି ନିର୍ଦ୍ଦେଶ କରୁଛି।
ଏହି ସରକାରୀ ରିପୋର୍ଟ ଅନୁଯାୟୀ, ଏହି ମାମଲାଗୁଡ଼ିକ ପଛରେ ପାରିବାରିକ ଅଶାନ୍ତି, ଆର୍ଥିକ ଅନଟନ, ଦୀର୍ଘ ଦିନର ରୋଗ ଏବଂ ସବୁଠାରୁ ବଡ଼ କାରଣ ସ୍ୱରୂପ ମାନସିକ ଅବସାଦ ରହିଛି। ଆଜି ବି ଆମ ସମାଜରେ ମାନସିକ ସ୍ୱାସ୍ଥ୍ୟ ବା ମାନସିକ ସମସ୍ୟା ଉପରେ ଖୋଲାଖୋଲି ଆଲୋଚନା କରିବାକୁ ଲୋକେ ଲାଜ ବା ସଙ୍କୋଚ ମନେ କରନ୍ତି। ଫଳରେ ଜଣେ ବ୍ୟକ୍ତି ନିଜ ଭିତରେ ଚିନ୍ତାରେ ବୁଡ଼ି ରହି ରୋଗରେ ପଡ଼ିଥାଏ । ଯୁବପିଢ଼ିଙ୍କ ମଧ୍ୟରେ କ୍ୟାରିୟରର ଚାପ, ପ୍ରତିଯୋଗିତା ଏବଂ ପରିବାରଠାରୁ ଦୂରରେ ରହି ଏକାକୀପନର ଶିକାର ହେବା ମାନସିକ ସ୍ୱାସ୍ଥ୍ୟ ବିଗିଡ଼ିବାର ଅନ୍ୟତମ ବଡ଼ ନିୟାମକ ସାଜିଛି। ସରକାରୀ ଏବଂ ବେସରକାରୀ ସ୍ତରରେ ବ୍ୟାପକ ସଚେତନତା ସହ ପ୍ରତି ଜିଲ୍ଲା ଓ ବ୍ଲକ୍ ସ୍ତରରେ ମାଗଣା ମାନସିକ ପରାମର୍ଶ କେନ୍ଦ୍ର ଏବଂ ହେଲ୍ପଲାଇନ ସେବା ଉପଲବ୍ଧ ହେବା ଜରୁରୀ। ବିଦ୍ୟାଳୟ ଓ କଲେଜ ସ୍ତରରୁ ହିଁ ପିଲାମାନଙ୍କୁ ଚାପର ମୁକାବିଲା କରିବା ଏବଂ ମାନସିକ ଭାବେ ଦୃଢ଼ ରହିବା ପାଇଁ ସ୍ୱତନ୍ତ୍ର କ୍ଲାସ୍ କରାଯିବା ଆବଶ୍ୟକ। NCRB ର ଏହି ରିପୋର୍ଟ ସାରା ବିଶ୍ୱ ତଥା ଭାରତ ପାଇଁ ଏକ ଚେତାବନୀ। ମାନସିକ ସ୍ୱାସ୍ଥ୍ୟକୁ ସାଧାରଣ ଶାରୀରିକ ସ୍ୱାସ୍ଥ୍ୟ ଭଳି ଗୁରୁତ୍ୱ ଦେଇ ଏହା ଉପରେ ସାମୂହିକ ଭାବେ କାର୍ଯ୍ୟ କଲେ ହିଁ ଏଭଳି ଅମୂଲ୍ୟ ଜୀବନ ଗୁଡ଼ିକୁ ବଞ୍ଚାଯାଇପାରିବ।