ପ୍ରଥମେ ଚକ୍ରରାଜ ସୁଦର୍ଶନଙ୍କୁ ମା ସୁଭଦ୍ରାଙ୍କ ‘ଦେବଦଳନ’ ରଥରେ ସ୍ଥାପନା କରିବା ପରେ ବଡ଼ଠାକୁର ଶ୍ରୀ ବଳଦେବଙ୍କୁ ପହଣ୍ଡିରେ ଶ୍ରୀମନ୍ଦିରରୁ ରଥାରୁଢ଼ ପାଇଁ ଅଣାଯିବା ପରେ ଭଉଣୀ ସୁଭଦ୍ରାଙ୍କୁ ପହଣ୍ଡିରେ ରୁଢାରୁଣ କରାଯାଇଛି । ଭାଇ ଭଉଣୀଙ୍କ ପହଣ୍ଡି ବିଜେ ପରେ ଶେଷରେ କାଳିଆ ସାଆନ୍ତଙ୍କ ପହଣ୍ଡି ବିଜେ ଆରମ୍ଭ ହୋଇଛି । ଜୟ ଜଗନ୍ନାଥ ଧ୍ବନିରେ ପ୍ରକମ୍ପିତ ହେଉଛି ଗଗନପବନ । ହରିବୋଲ, ହୁଳହୁଳିରେ ଫାଟି ପଡୁଛି ବଡ଼ଦାଣ୍ଡ । କଳା ଶ୍ରୀମୁଖକୁ ଚାହିଁ ଭାବ ବିହ୍ବଳ ହେଉଛନ୍ତି ଭକ୍ତ । ବଡ଼ଦାଣ୍ଡରେ ଆଜି ଏକାକାର ଭକ୍ତ ଭଗବାନ । ଆହାଃ କି ଅପୂର୍ବ ଏ ଦୃଶ୍ୟ… ବିଶ୍ବନିୟନ୍ତାଙ୍କୁ ଦର୍ଶନ କରି ପବିତ୍ର ହେଉଛି ଚର୍ମଚକ୍ଷୁ ।
ସେପଟେ ତାଳଧ୍ବଜରେ ରୁଥାରୁଢ଼ ହୋଇଛନ୍ତି ବଡ଼ଠାକୁର ବଳଭଦ୍ର । ହଳଦୀମୁହିଁ ମାଆ ସୁଭଦ୍ରା ଦେବଦଳର ରଥରେ ବିଜେ କରିଛନ୍ତି । ପ୍ରଥମେ ସୁଦର୍ଶନ ପହଣ୍ଡି ହୋଇ ରଥାରୂଢ଼ ହୋଇଥିଲେ । ଏବେ କାଳିଆ ସାଆନ୍ତେ ମୁଣ୍ଡରେ ଟାହିଆ ଲଗାଇ ଝୁଲି ଝୁଲି ରଥକୁ ଆସୁଛନ୍ତି । ରଥରେ ବସି ମାଉସୀ ଘରକୁ ଯିବେ ମହାବାହୁ । ରଥଯାତ୍ରା ହେଉଛି ସେହି ବିରଳ ପର୍ବ, ଯେଉଁଠି ଭଗବାନ ସ୍ୱୟଂ ନିଜ ଭକ୍ତଙ୍କ ପାଖକୁ ଆସନ୍ତି । ଆଜି ଭକ୍ତଙ୍କ ପାଇଁ ଏହା କେବଳ ଦର୍ଶନର ଦିନ ନୁହେଁ, ବରଂ ନିଜ ମନର ସବୁ ଦୁଃଖ, ସୁଖ, ଆଶା ଓ ପ୍ରାର୍ଥନା କାଳିଆ ସାଆନ୍ତଙ୍କୁ ଜଣାଇବାର ପବିତ୍ର ଅବସର ।