ଟ୍ରମ୍ପଙ୍କ ଟାରିଫ ଦ୍ବାରା ଭାରତର ଅର୍ଥନୀତି ପ୍ରଭାବିତ ହୋଇନାହିଁ, ଏପ୍ରିଲ-ଜୁନ ରେ ଭାରତର ଜିଡିପି ବୃଦ୍ଧି ହାର ୭.୮%ରେ ପହଞ୍ଚିଛି
ଡୋନାଲ୍ଡ ଟ୍ରମ୍ପଙ୍କ ଟାରିଫ ନୀତି ସାରା ବିଶ୍ୱକୁ କରୁଥିବା ବେଳେ ଭାରତର ଅର୍ଥନୀତି ଏହାଦ୍ୱାରା ମୋଟେ ପ୍ରଭାବିତ ହୋଇନାହିଁ। ଟ୍ରମ୍ପ ଭାରତକୁ ‘ଡେଡ ଇକୋନୋମୀ’ ବୋଲି କହିଥିଲେ, କିନ୍ତୁ ଚଳିତ ବର୍ଷର ପ୍ରଥମ ତ୍ରୈମାସିକ (ଏପ୍ରିଲ-ଜୁନ)ରେ ଭାରତର ଜିଡିପି(ସକଳ ଘରୋଇ ଉତ୍ପାଦ) ବୃଦ୍ଧି ହାର ୭.୮%ରେ ପହଞ୍ଚି ସମସ୍ତ ଆକଳନକୁ ଅତିକ୍ରମ କରିଛି। ଶୁକ୍ରବାର ଜାରି ହୋଇଥିବା ସରକାରୀ ତଥ୍ୟ ଅନୁସାରେ, ମୁଖ୍ୟତଃ କୃଷି କ୍ଷେତ୍ରର ଉନ୍ନତ ପ୍ରଦର୍ଶନ ଯୋଗୁଁ ଏହି ବୃଦ୍ଧି ହାସଲ ହୋଇଛି। ଏହା ସହିତ ଭାରତ ବିଶ୍ୱର ସବୁଠାରୁ ଦ୍ରୁତ ଗତିରେ ବୁଥିବା ପ୍ରମୁଖ ଅର୍ଥନୀତି ଭାବେ ନିଜର ସ୍ଥାନ ବଜାୟ ରଖିଛି, ଯେହେତୁ ଏହି ତ୍ରୈମାସିକରେ ଚାଇନାର ଜିଡିପି ବୃଦ୍ଧି ହାର ମାତ୍ର ୫.୨% ଥିଲା।
ଜାତୀୟ ପରିସଂଖ୍ୟାନ କାର୍ଯ୍ୟାଳୟ (NSO)ର ତଥ୍ୟ ଅନୁସାରେ, ଏହା ପୂର୍ବରୁ ସର୍ବୋଚ୍ଚ ଜିଡିପି ବୃଦ୍ଧି ୨୦୨୪ ଜାନୁଆରୀ-ମାର୍ଚ୍ଚ ତ୍ରୈମାସିକରେ ୮.୪% ଥିଲା। ଚଳିତ ବର୍ଷର ଏପ୍ରିଲ-ଜୁନ ତ୍ରୈମାସିକରେ କୃଷି କ୍ଷେତ୍ରରେ ୩.୭% ବୃଦ୍ଧି ହାସଲ ହୋଇଛି, ଯାହା ୨୦୨୪-୨୫ର ଏହି ତ୍ରୈମାସିକରେ ମାତ୍ର ୧.୫% ଥିଲା। ଏହା ସହିତ ଉତ୍ପାଦନ କ୍ଷେତ୍ର (Manufacturing)ର ବୃଦ୍ଧି ହାର ୭.୭%କୁ ବୃଦ୍ଧି ପାଇଛି, ଯାହା ଗତ ବର୍ଷ ଏହି ତ୍ରୈମାସିକରେ ୭.୬% ଥିଲା।
ଜିଡିପି ତଥ୍ୟର ସଂକ୍ଷିପ୍ତ ବିବରଣୀ
ସରକାରୀ ତଥ୍ୟ ଅନୁସାରେ, ୨୦୨୫-୨୬ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ରିଅଲ ଜିଡିପି (ସ୍ଥିର ମୂଲ୍ୟରେ) ୪୭.୮୯ ଲକ୍ଷ କୋଟି ଟଙ୍କା ହେବାର ଅନୁମାନ କରାଯାଇଛି, ଯାହା ୨୦୨୪-୨୫ର ପ୍ରଥମ ତ୍ରୈମାସିକରେ ୪୪.୪୨ ଲକ୍ଷ କୋଟି ଟଙ୍କା ଥିଲା। ଏହା ୭.୮% ବୃଦ୍ଧି ଦର୍ଶାଏ। ଏହା ସହିତ, ନାମମାତ୍ର ଜିଡିପି (ଚଳିତ ମୂଲ୍ୟରେ) ୮୬.୦୫ ଲକ୍ଷ କୋଟି ଟଙ୍କା ହେବାର ଅନୁମାନ, ଯାହା ୨୦୨୪-୨୫ରେ ୭୯.୦୮ ଲକ୍ଷ କୋଟି ଟଙ୍କା ଥିଲା, ଯାହା ୮.୮% ବୃଦ୍ଧି ଦର୍ଶାଏ।
କେଉଁ କ୍ଷେତ୍ରରେ କେତେ ବୃଦ୍ଧି?
-ପ୍ରାଥମିକ କ୍ଷେତ୍ର (କୃଷି ଓ ଖଣି ସମେତ): ୨.୮% ବୃଦ୍ଧି, ଯାହା ୨୦୨୪-୨୫ରେ ୨.୨% ଥିଲା।
-କୃଷି କ୍ଷେତ୍ର: ୨୦୨୫-୨୬ରେ ୩.୭% ବୃଦ୍ଧି, ଗତ ବର୍ଷ ୧.୫% ଥିଲା।
-ଖଣି କ୍ଷେତ୍ର: ୩.୧% ହ୍ରାସ, ଗତ ବର୍ଷ ୬.୬% ବୃଦ୍ଧି ଥିଲା।
-ଦ୍ୱିତୀୟକ କ୍ଷେତ୍ର (ଉତ୍ପାଦନ ଓ ବିଦ୍ୟୁତ୍ ସମେତ): ୭% ବୃଦ୍ଧି, ଗତ ବର୍ଷ ୮.୬% ଥିଲା।
-ଉତ୍ପାଦନ କ୍ଷେତ୍ର: ୭.୭% ବୃଦ୍ଧି, ଗତ ବର୍ଷ ୭.୬% ଥିଲା।
-ତୃତୀୟକ କ୍ଷେତ୍ର (ସେବା କ୍ଷେତ୍ର): ୯.୩% ବୃଦ୍ଧି।
-ବ୍ୟବସାୟ, ହୋଟେଲ, ପରିବହନ, ଯୋଗାଯୋଗ ଓ ପ୍ରସାରଣ: ୮.୬% ବୃଦ୍ଧି, ଗତ ବର୍ଷ ୫.୪% ଥିଲା।
-ଆର୍ଥିକ, ରିଅଲ ଏଷ୍ଟେଟ ଓ ପ୍ରଫେସନାଲ ସେବା: ୯.୫% ବୃଦ୍ଧି, ଗତ ବର୍ଷ ୬.୬% ଥିଲା।
-ସାର୍ବଜନୀକ ପ୍ରଶାସନ ଓ ପ୍ରତିରକ୍ଷା: ୯.୮% ବୃଦ୍ଧି, ଗତ ବର୍ଷ ୯% ଥିଲା।
ଟ୍ରମ୍ପ ଟାରିଫ ସତ୍ତ୍ୱେ ଭାରତର ଦୃଢ଼ତା
ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଭାରତୀୟ ରପ୍ତାନୀ ଉପରେ ୫୦% ଟାରିଫ ଲଗାଯାଇଥିଲେ ମଧ୍ୟ, ଭାରତର ଅର୍ଥନୀତି ଦୃତା ପ୍ରଦର୍ଶନ କରିଛି। ବିଶେଷଜ୍ଞମାନେ ଟାରିଫ ଯୋଗୁ ଜିଡିପି ବୃଦ୍ଧିରେ ୦.୨-୦.୫% ହ୍ରାସ ହେବ ବୋଲି ଆକଳନ କରିଥିଲେ, କିନ୍ତୁ ଏହି ୭.୮% ବୃଦ୍ଧି ସେହି ଆଶଙ୍କାକୁ ଖଣ୍ଡନ କରିଛି। ଭାରତର ବିବିଧ ରପ୍ତାନୀ ବଜାର, ଦୃ ଘରୋଇ ଚାହିଦା ଏବଂ କୃଷି ଓ ସେବା କ୍ଷେତ୍ରର ଉନ୍ନତ ପ୍ରଦର୍ଶନ ଏହି ସଫଳତାର ମୂଳ କାରଣ।
ଏହି ବୃଦ୍ଧି ଭାରତର ଅର୍ଥନୀତିର ସ୍ଥିତିସ୍ଥାପକତାକୁ ପ୍ରତିଫଳିତ କରୁଛି ଏବଂ ଏହା ପ୍ରମାଣ କରୁଛି ଯେ ଟ୍ରମ୍ପଙ୍କ ଟାରିଫ ଭାରତର ଅର୍ଥନୈତିକ ଗତିକୁ ଅଟକାଇ ପାରିନାହିଁ।