ହର୍ମୁଜରେ ଦୀର୍ଘକାଳୀନ ଅବରୋଧ ପାଇଁ ଯୋଜନା କରୁଛନ୍ତି ଟ୍ରମ୍ପ
ହର୍ମୁଜ ପ୍ରଣାଳୀ ହେଉଛି ବିଶ୍ୱବ୍ୟାପୀ ଇନ୍ଧନ ଯୋଗାଣ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ ସମୁଦ୍ରପଥ। ତେବେ ଗତ ୨ ମାସ ଧରି ଆମେରିକା ଓ ଇରାନ ମଧ୍ୟରେ ଚାଲିଥିବା ଯୁଦ୍ଧ ଯୋଗୁଁ ଏହି ମାର୍ଗ ଗୁରୁତର ଭାବେ ପ୍ରଭାବିତ ହୋଇଛି। ଅନେକ ଦେଶରେ ଇନ୍ଧନ ଅଭାବ ହେତୁ ପରିସ୍ଥିତି ଖରାପ ହେବାରେ ଲାଗିଛି। ଅନ୍ୟପକ୍ଷରେ ଏବେ ଖବର ଆସୁଛି ଯେ ଏହି ଜଳପଥ ଦୀର୍ଘ ଦିନ ଧରି ବନ୍ଦ ରହିପାରେ। ଏହାର କାରଣ ହେଉଛି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନୂଆ ଯୋଜନା। ଏକ ରିପୋର୍ଟରେ ପ୍ରକାଶ ପାଇଛି ଯେ, ଟ୍ରମ୍ପ ଇରାନକୁ ଏକ ଲମ୍ବା ଝଟକା ଦେବାକୁ ଯୋଜନା କରୁଛନ୍ତି ଏବଂ ଏଥିପାଇଁ ସେ ହର୍ମୁଜ ପ୍ରଣାଳୀକୁ ଅସ୍ତ୍ର କରିବେ।ୱାଲ୍ ଷ୍ଟ୍ରିଟ୍ ଜର୍ଣ୍ଣାଲର ଏକ ରିପୋର୍ଟକୁ ଉଦ୍ଧୃତ କରି ଏହି ଖବର ସାମ୍ନାକୁ ଆସିଛି। ରିପୋର୍ଟ ଅନୁଯାୟୀ, ଟ୍ରମ୍ପ ହର୍ମୁଜରେ ଦୀର୍ଘକାଳୀନ ଅବରୋଧ ଯୋଜନା କରିଛନ୍ତି। ଏଥିପାଇଁ ଟ୍ରମ୍ପ ତାଙ୍କ ଅଧିକାରୀମାନଙ୍କୁ ଦୀର୍ଘକାଳୀନ ଅବରୋଧ ପାଇଁ ପ୍ରସ୍ତୁତ ରହିବାକୁ କହିଛନ୍ତି। ସୂଚନା ମୁତାବକ, ଟ୍ରମ୍ପ ପୂର୍ବରୁ ଆଉ ଦୁଇଟି ବିକଳ୍ପ ଉପରେ ବିଚାର କରିଥିଲେ। ତାହା ହେଉଛି- ଆମେରିକା ପୁନର୍ବାର ଇରାନ ଉପରେ ଆକ୍ରମଣ ଆରମ୍ଭ କରିବ କିମ୍ବା ସବୁଦିନ ପାଇଁ ଯୁଦ୍ଧ ଶେଷ କରିବ। ତେବେ ଏହି ଦୁଇଟି ବିକଳ୍ପ ଭିତରେ ଆମେରିକା ଅଧିକ ବିପଦ ଦେଖିଥିଲା। ସେଥିପାଇଁ ବର୍ତ୍ତମାନ ଟ୍ରମ୍ପ ଅବରୋଧ ଜାରି ରଖି ଇରାନ ଉପରେ ଅର୍ଥନୈତିକ ଚାପ ପକାଇବାକୁ ନିଷ୍ପତ୍ତି ନେଇଛନ୍ତି।ବାସ୍ତବରେ ଆମେରିକା ଏହାର ତୈଳ ରପ୍ତାନିକୁ ପ୍ରଭାବିତ କରି ଇରାନକୁ ଗଭୀର କ୍ଷତି ପହଞ୍ଚାଇବାକୁ ଚେଷ୍ଟା କରୁଛି। ଇରାନର ତୈଳ ରପ୍ତାନି ପାଇଁ ହର୍ମୁଜ ପ୍ରଣାଳୀ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଏହି ମାର୍ଗ ଦେଇ ଇରାନର ତୈଳ ଟ୍ୟାଙ୍କରଗୁଡ଼ିକର ଗତିବିଧିକୁ ସୀମିତ କରି ଆମେରିକା ଏହି ଲାଇଫ୍ ଲାଇନ୍ର ଗଳା ଚିପିବାକୁ ଚେଷ୍ଟା କରୁଛି। ଆମେରିକା ଏଠାରେ ଅବରୋଧ ଲାଗୁ କରିବା ପରଠାରୁ ଇରାନର ରପ୍ତାନି ତୀବ୍ର ହ୍ରାସ ପାଇଛି ଏବଂ ଏହାର ପ୍ରଭାବ ବର୍ତ୍ତମାନ ଏହାର ଅର୍ଥନୀତି ଉପରେ ସ୍ପଷ୍ଟ ଭାବରେ ଦେଖାଯାଉଛି। ଆମେରିକାର ଅଧିକାରୀମାନେ ବିଶ୍ୱାସ କରନ୍ତି ଯେ ସିଧାସଳଖ ଯୁଦ୍ଧକୁ ଏଡାଇବା ସହିତ ଇରାନ ଉପରେ ଚାପ ବଜାୟ ରଖିବା ପାଇଁ ଏହି ରଣନୀତି ଏକ ସନ୍ତୁଳିତ ଉପାୟ।
ରପ୍ତାନି ବନ୍ଦ ହେବା ପରେ ଏବେ ଖବର ମିଳିଛି ଯେ ଇରାନ ପାଖରେ ଏତେ ତୈଳ ଅଛି ଯେ ରଖିବା ପାଇଁ କୌଣସି ସ୍ଥାନ ନାହିଁ। ରିପୋର୍ଟ ଅନୁଯାୟୀ, ଇରାନ ପାଖରେ ବର୍ତ୍ତମାନ ମାତ୍ର ୧୨ରୁ ୨୨ ଦିନର ଉତ୍ପାଦିତ ତୈଳ ରଖିବାକୁ ଯାଗା ଅଛି। ଏହାପରେ ଇରାନ ଉତ୍ପାଦନ ହ୍ରାସ କରିବାକୁ ବାଧ୍ୟ ହୋଇପାରେ, ଯାହା ଇରାନ ସରକାରଙ୍କ ଆୟ ଉପରେ ସିଧାସଳଖ ପ୍ରଭାବ ପକାଇବ। ପରିସ୍ଥିତି ଏତେ ଗମ୍ଭୀର ହୋଇଛି ଯେ ଇରାନ ବର୍ତ୍ତମାନ ଅନେକ ଅସାଧାରଣ ପଦକ୍ଷେପ ନେଉଛି। ଇରାନ ପୁଣି ଥରେ ଏହାର ପୁରୁଣା ଓ ଦୀର୍ଘ ଦିନର ଅଚଳ ଟ୍ୟାଙ୍କର୍ରେ ତୈଳ ରଖିବା ଆରମ୍ଭ କରିଛି।