ଆରପାରିରେ ‘ଗଜନୀ ର ଖଳନାୟକ ବରିଷ୍ଠ ଅଭିନେତା ପ୍ରଦୀପ ରାୱତ,କଳା ଜଗତରେ ଶୋକର ଛାୟା
‘ଲଗାନ୍’, ‘ଗଜନୀ’, ‘ସରଫରୋଶ୍’ ଏବଂ ବି.ଆର୍.ଚୋପ୍ରାଙ୍କ ‘ମହାଭାରତ’ ଭଳି ଲୋକପ୍ରିୟ ସିନେମା ଓ ଧାରାବାହିକରେ ନିଜର ଦମଦାର ଅଭିନୟ ପାଇଁ ଜଣାଶୁଣା ବରିଷ୍ଠ ଅଭିନେତା ପ୍ରଦୀପ ରାୱତଙ୍କ ୭୪ ବର୍ଷ ବୟସରେ ନିଧନ ହୋଇଛି । ପ୍ରଦୀପଙ୍କ ମୃତ୍ୟୁ ନେଇ ତାଙ୍କ ମ୍ୟାନେଜର ସୂଚନା ଦେଇଛନ୍ତି । ଏହି ବରିଷ୍ଠ ଅଭିନେତା ଦୀର୍ଘ ଦିନରୁ କ୍ୟାନ୍ସର ରୋଗରେ ପୀଡ଼ିତ ଥିଲେ । ପ୍ରଦୀପଙ୍କ ବିୟୋଗରେ କଳା ଜଗତରେ ଶୋକର ଛାୟା ଖେଳି ଯାଇଛି ।
ପ୍ରଦୀପ ରାୱତଙ୍କ ମ୍ୟାନେଜର ତାଙ୍କ ମୃତ୍ୟୁର ସୂଚନା ଦେଇଛନ୍ତି । ଆଜ୍ତକ୍ ରିପୋର୍ଟ ଅନୁସାରେ ତାଙ୍କ ମ୍ୟାନେଜର କହିଛନ୍ତି ଯେ ଅଭିନେତା ଜଣକ ଗତ ପାଞ୍ଚ ବର୍ଷ ଧରି ରକ୍ତ କର୍କଟ ରୋଗରେ ପୀଡିତ ଥିଲେ । ଚିକିତ୍ସା ପରେ ତାଙ୍କ ସ୍ୱାସ୍ଥ୍ୟରେ ଉନ୍ନତି ହୋଇଥିଲା । କିନ୍ତୁ କିଛି ମାସ ପୂର୍ବେ ପୁଣି ଥରେ କର୍କଟ ରୋଗରେ ପୀଡ଼ିତ ହୋଇଥିଲେ । ସେ ଗତ ଦୁଇ ମାସ ଧରି ହସ୍ପିଟାଲରେ ଭର୍ତ୍ତି ହୋଇଥିଲେ ଏବଂ ଗତ କିଛି ଦିନ ଧରି ତାଙ୍କ ସ୍ୱାସ୍ଥ୍ୟରେ ଅବନ୍ନତି ଘଟି ଚାଲିଥିଲା । ଶେଷରେ ମଙ୍ଗଳବାର ସନ୍ଧ୍ୟାରେ ସେ ଶେଷ ନିଃଶ୍ୱାସ ତ୍ୟାଗ କରିଥିଲେ । ପରିବାର ଅନୁଯାୟୀ, ବୁଧବାର ତାଙ୍କର ଅନ୍ତିମ ସଂସ୍କାର କରାଯିବାର ଆଶା କରାଯାଉଛି ।
ପ୍ରଦୀପ ରାୱତ ବି.ଆର.ଚୋପ୍ରାଙ୍କ ଟିଭି ଶୋ’ ମହାଭାରତରେ ଅଶ୍ୱତ୍ଥାମା ଭୂମିକାରେ ଅଭିନୟ କରି ତାଙ୍କର ଅଭିନୟ ଜୀବନ ଆରମ୍ଭ କରିଥିଲେ । ପରବର୍ତ୍ତୀ ସମୟରେ ସେ ହିନ୍ଦୀ, ତେଲୁଗୁ, ତାମିଲ, କନ୍ନଡ, ମାଲାୟଲମ, ବଙ୍ଗାଳୀ ଏବଂ ଭୋଜପୁରୀ ଚଳଚ୍ଚିତ୍ରରେ କାମ କରିଥିଲେ । ହିନ୍ଦୀ ସିନେମାରେ, ସେ ଲଗାନ, ସରଫରୋଶ, ଗଜନୀ, ବୈଜୁ ବାୱରା, ଆୱାରାପାନ ଏବଂ ଗ୍ରାଣ୍ଡ ମସ୍ତି ଭଳି ଚଳଚ୍ଚିତ୍ରରେ ଅଭିନୟ କରିଥିଲେ । ସେ ତେଲୁଗୁ ଚଳଚ୍ଚିତ୍ର ‘ସାଇ’ (Sye) ସହିତ ଦକ୍ଷିଣ ଭାରତୀୟ ସିନେମାରେ ପ୍ରବେଶ କରିଥିଲେ, ଯେଉଁଠାରେ ସେ ଅନେକ ସ୍ମରଣୀୟ ଖଳନାୟକ ଭୂମିକାରେ ଅଭିନୟ କରିଥିଲେ ।
ତାମିଲ ଚଳଚ୍ଚିତ୍ର “ଗଜନୀ” (୨୦୦୫)ରେ ତାଙ୍କର ଡବଲ୍ ରୋଲ୍ ବହୁତ ଲୋକପ୍ରିୟ ହୋଇଥିଲା । ପରେ ସେ ହିନ୍ଦୀ ରିମେକ୍ “ଗଜନୀ”ରେ ଏହି ଭୂମିକାକୁ ପୁଣି ଅଭିନୟ କରିଥିଲେ । ସେ କନ୍ନଡ ଚଳଚ୍ଚିତ୍ର “ପାରୋଡି”, ମାଲାୟଲମ ଚଳଚ୍ଚିତ୍ର “ଚାଇନା ଟାଉନ୍”, ବଙ୍ଗଳା ଚଳଚ୍ଚିତ୍ର “ହିରୋ ୪୨୦” ଏବଂ ଭୋଜପୁରୀ ଚଳଚ୍ଚିତ୍ର “କ୍ରାକ୍ ଫାଇଟର” ରେ ମଧ୍ୟ ଅଭିନୟ କରିଥିଲେ ।