ପାଗ ପରିବର୍ତନ ହେଲେ କେଉଁ କେଉଁ ରୋଗ ହେବାର ସମ୍ଭାବନା ଅଧିକ ଥାଏ
ଋତୁ ପରିବର୍ତ୍ତନ ପ୍ରକୃତିର ଏକ ସୁନ୍ଦର ଅଂଶ, କିନ୍ତୁ କେତେକ ସମୟରେ ଏହା ଆମ ସ୍ୱାସ୍ଥ୍ୟ ପାଇଁ ଚ୍ୟାଲେଞ୍ଜ ସୃଷ୍ଟି କରିଥାଏ । ଗ୍ରୀଷ୍ମରୁ ବର୍ଷା କିମ୍ବା ବର୍ଷାରୁ ଶୀତକୁ ପରିବର୍ତ୍ତନ ହେବା ସହିତ କିଛି ଲୋକଙ୍କ ମଧ୍ୟରେ ଥଣ୍ଡା, ଜ୍ୱର କିମ୍ବା ଆଲର୍ଜି ଭଳି ସମସ୍ୟା ଦେଖାଯାଏ। ଆପଣ କେବେ ଭାବିଛନ୍ତି କି ଏହା କାହିଁକି ଘଟିଥାଏ ।
ପ୍ରକୃତରେ, ତାପମାତ୍ରା ହ୍ରାସ ଏବଂ ବାୟୁ ଆର୍ଦ୍ରତାରେ ପରିବର୍ତ୍ତନ ଭାଇରସ ଗୁଡ଼ିକୁ ବୃଦ୍ଧି ପାଇବା ପାଇଁ ସୁଯୋଗ ପ୍ରଦାନ କରେ। ପରିବର୍ତ୍ତିତ ତାପମାତ୍ରା ସହିତ ଶରୀର ଖାପ ଖୁଆଇବା ପ୍ରକ୍ରିୟା ରୋଗ ପ୍ରତିରୋଧକ ଶକ୍ତି ଉପରେ ଚାପ ପକାଇଥାଏ, ଯାହା ଭାଇରାଲ୍ ଏବଂ ଜୀବାଣୁ ସଂକ୍ରମଣର ଆଶଙ୍କା ବୃଦ୍ଧି କରିଥାଏ। ତେଣୁ, ପାଗ ପରିବର୍ତ୍ତନ ହେଲେ ଲୋକମାନେ ଅଧିକ ଅସୁସ୍ଥ ହୋଇପଡ଼ନ୍ତି। ତଥାପି, କିଛି ସତର୍କତା ଅବଲମ୍ବନ କରି ଏହି ବିପଦକୁ ଅନେକାଂଶରେ ଏଡାଇ ଦିଆଯାଇପାରିବ ।
ଯେତେବେଳେ ଋତୁ ପରିବର୍ତ୍ତନ ହୁଏ, ଶରୀରକୁ ନୂତନ ତାପମାତ୍ରା ଏବଂ ପରିବେଶ ସହିତ ଖାପ ଖୁଆଇବା ପାଇଁ ସମୟ ଲାଗେ। ଏହି ସମୟ ମଧ୍ୟରେ, ରୋଗ ପ୍ରତିରୋଧକ ଶକ୍ତି ଦୁର୍ବଳ ହୋଇଯାଏ, ଯାହା ଫଳରେ ଭାଇରସ ଏବଂ ବ୍ୟାକ୍ଟେରିଆ ଶରୀର ଉପରେ ଆକ୍ରମଣ କରିବା ସହଜ ହୋଇଥାଏ। ତାପମାତ୍ରାରେ ପରିବର୍ତ୍ତନ ହେଲେ ଥଣ୍ଡା, କାଶ, ଫ୍ଲୁ, ଆଲର୍ଜି, ଗଳା ଏବଂ ଚର୍ମ ସଂକ୍ରମଣ ଭଳି ରୋଗର ଆଶଙ୍କା ବୃଦ୍ଧି କରେ। ଚାଲନ୍ତୁ ଜାଣିବା ରୋଗର ମୁଖ୍ୟ କାରଣ ଗୁଡିକ କଣ ।
ତାପମାତ୍ରାରେ ପରିବର୍ତ୍ତନ
ଯେତେବେଳେ ଗ୍ରୀଷ୍ମରୁ ଶୀତ ଋତୁ ଆସିଥାଏ, ବାୟୁ ଥଣ୍ଡା ଏବଂ ଶୁଷ୍କ ହୋଇଯାଏ, ଯାହା ରାଇନୋଭାଇରସ୍ ଏବଂ ଇନଫ୍ଲୁଏଞ୍ଜା ଭଳି ଭାଇରସ୍ ପାଇଁ ଅନୁକୂଳ ପରିସ୍ଥିତି ସୃଷ୍ଟି କରେ। ଏହି ଭାଇରସ୍ ଅଧିକ ସକ୍ରିୟ ଥାଆନ୍ତି ଏବଂ ଥଣ୍ଡାରେ ଅଧିକ ସହଜରେ ବ୍ୟାପି ଯାଆନ୍ତି। ଏକ ଅଧ୍ୟୟନ ଅନୁଯାୟୀ, ଯେତେବେଳେ ନାକର ତାପମାତ୍ରା ହାରାହାରି ଶରୀର ତାପମାତ୍ରା ଅପେକ୍ଷା କମ୍ ଥାଏ, ସେତେବେଳେ ଭାଇରସ୍ ଦ୍ରୁତ ଗତିରେ ବୃଦ୍ଧି ପାଏ।
ରୋଗ ପ୍ରତିରକ୍ଷା ପ୍ରଣାଳୀର ଦୁର୍ବଳତା
ଥଣ୍ଡା ପାଗ ଶରୀରରେ ରକ୍ତବାହୀ ନଳୀଗୁଡ଼ିକୁ ସଙ୍କୁଚିତ କରିଦିଏ, ଯାହା ଫଳରେ ଧଳା ରକ୍ତ କୋଷଗୁଡ଼ିକ ମ୍ୟୁକସ୍ ଝିଲ୍ଲୀରେ ପହଞ୍ଚିବା କଷ୍ଟକର ହୋଇପଡ଼େ। ଏହା ଶରୀରର ରୋଗ ପ୍ରତିରକ୍ଷା ପ୍ରଣାଳୀକୁ ଦୁର୍ବଳ କରିଦିଏ। ଏହା ବ୍ୟତୀତ, ସୂର୍ୟ୍ୟକିରଣ ହ୍ରାସ ପାଇବା ଦ୍ଵାରା ରୋଗ ପ୍ରତିରକ୍ଷା ପାଇଁ ଜରୁରୀ ଭିଟାମିନ୍ ଡି ର ଅଭାବ ହୋଇପାରେ।
ଆଲର୍ଜୀ ଓ ପ୍ରଦୂଷଣ ବୃଦ୍ଧି ପାଇବା
ଋତୁ ପରିବର୍ତ୍ତନ ସମୟରେ, ଧୂଳି, ପ୍ରଦୂଷଣ ଭଳି ବାୟୁଜନିତ ଆଲର୍ଜି ଦ୍ରୁତ ଗତିରେ ବୃଦ୍ଧି ପାଏ। ଏହି ଆଲର୍ଜି ନାକରୁ ପାଣି ବୋହିବା, ଛିଙ୍କିବା, କାଶିବା ଏବଂ ଆଖିରେ ଜଳାପୋଡ଼ା ଭଳି ସମସ୍ୟା ସୃଷ୍ଟି କରେ। ନିରନ୍ତର ଆଲର୍ଜି ପ୍ରକ୍ରିୟା ରୋଗ ପ୍ରତିରୋଧକ ଶକ୍ତିକୁ ଦୁର୍ବଳ କରିଦିଏ, ଯାହା ଶରୀରକୁ ଭାଇରସ୍ ଏବଂ ଜୀବାଣୁ ସଂକ୍ରମଣ ପ୍ରତି ଅଧିକ ସମ୍ବେଦନଶୀଳ କରିଥାଏ।
ପାଗ ପରିବର୍ତ୍ତନ ହେଲେ କେଉଁ ରୋଗ ହେବାର ଅଧିକ ସମ୍ଭାବନା ଥାଏ
ଋତୁ ପରିବର୍ତ୍ତନ ସମୟରେ କିଛି ସ୍ୱାସ୍ଥ୍ୟ ସମସ୍ୟା ଅଧିକ ଦେଖାଯାଏ। ଏହା ସମସ୍ତ ବୟସର ଲୋକଙ୍କୁ ପ୍ରଭାବିତ କରେ, କିନ୍ତୁ ପିଲା, ବୃଦ୍ଧ ଏବଂ ଦୁର୍ବଳ ରୋଗ ପ୍ରତିରୋଧକ ଶକ୍ତି ଥିବା ଲୋକମାନେ ଅଧିକ ଦୁର୍ବଳ। ଥଣ୍ଡା, କାଶ, ଭାଇରାଲ ଜ୍ୱର, ଫ୍ଲ୍ୟୁ, ଗଳାରୋଗ, ଚର୍ମରୋଗ, ଆଖି ରୋଗ, ନିମୋନିଆ, ନିଶ୍ୱାସ ନେବାରେ କଷ୍ଟ, ଭଳି ରୋଗ ହେବାର ଆଶଙ୍କା ଅଧିକ ରହିବ ।
ଏଥିରୁ କିପରି ରକ୍ଷା ପାଇବେ
ଯଦି ଆପଣଙ୍କର ସାଧାରଣ ଥଣ୍ଡା କିମ୍ବା ଜ୍ୱର ଅଛି, ତେବେ ଘରୋଇ ଉପଚାର ଚେଷ୍ଟା କରନ୍ତୁ ଏବଂ ଶୋଇ ରୁହନ୍ତୁ। ଏହା ସାଧାରଣତଃ ଆରାମ ପ୍ରଦାନ କରେ, କିନ୍ତୁ କିଛି ପରିସ୍ଥିତିରେ, ଡାକ୍ତରଙ୍କ ସହିତ ପରାମର୍ଶ କରିବା ଆବଶ୍ୟକ। ତେବେ ଘରୋଇ ଉପଚାର ହିସାବରେ ଏହାକୁ ଏଡାଇବା ପାଇଁ ପାଗ ପରିବର୍ତ୍ତନ ହେବେ ସହିତ ତୁଳସୀ, ଅଦା, ସବୁଜ ଚା ଏବଂ ମହୁ ଖାଇବା ଆରମ୍ଭ କରନ୍ତୁ । ହଳଦୀ କ୍ଷୀର ନିଅନ୍ତୁ । ଲେମ୍ବୁ ଏବଂ ମହୁ ମିଶ୍ରିତ ଉଷୁମ ପାଣି ମଧ୍ୟ ପିଇପାରିବେ । ଏସବୁ ଶରୀର ପାଇର୍ ବହୁତ ଲାଭଦାୟକ ।