ଆମେରିକା ଓ ଚୀନ୍‌ ମଧ୍ୟରେ ପୁଣି ବିବାଦ

ଆମେରିକାର ସଂପର୍କ ତାଇଓ୍ବାନ ସହ ବଢ଼ୁଥିବାରୁ ଚାଇନା ରାଗିପାଚି ଲାଲ ହୋଇଯାଇଛି । ଆମେରିକାର ହାଉସ୍‌ ଅଫ୍‌ ରିପ୍ରେଜେଣ୍ଟେଟିଭ ଅଧ୍ୟକ୍ଷା ନାନ୍‌ସି ପେଲୋସି ତାଇୱାନ ଗସ୍ତ ପାଇଁ ପ୍ରସ୍ତୁତ ହେଉଥିବା ନେଇ ରିପୋର୍ଟ ପ୍ରକାଶ ପାଇବା ପରେ ଚୀନ୍‌ ଏଭଳି କଠୋର ଆଭିମୁଖ୍ୟ ପୋଷଣ କରିଛି ।ତାଇୱାନ ପ୍ରସଙ୍ଗକୁ ନେଇ ଆମେରିକା ଓ ଚୀନ୍‌ ମଧ୍ୟରେ ପୁଣି ବିବାଦ ଉପୁଜିଛି । ଏଥର ଖୋଲାଖୋଲି ଭାବେ ନାଲିଆଖି ଦେଖାଇଛି ଡ୍ରାଗନ୍‌ । କହିଛି, ଆମେରିକାର ଜଣେ ବି ରାଜନେତା ତାଇୱାନ ମାଟିରେ ପାଦ ଦେବାକୁ ଉଦ୍ୟମ ନ କରନ୍ତୁ । ଯଦି ସେମାନେ ଏଭଳି କରନ୍ତି, ତେବେ ତାହାର ପରିଣତି ଭୋଗିବାକୁ ପଡ଼ିବ ।ପେଲୋସିଙ୍କ ଏହି ପ୍ରସ୍ତାବିତ ଗସ୍ତ ବାବଦରେ ଜାଣିବା ପରେ ଚୀନ୍‌ କ୍ରୋଧାନ୍ୱିତ ହୋଇଉଠିଛି । ଚୀନ୍‌ କହିଛି ଯେ ନାନ୍‌ସି ତାଙ୍କର ତାଇୱାନ ଗସ୍ତ ଯୋଜନାକୁ ତୁରନ୍ତ ରଦ୍ଦ କରିବା ଆବଶ୍ୟକ । ଏହାକୁ ନେଇ ସେ ଯଦି ଆଗକୁ ବଢ଼ନ୍ତି, ତେବେ ପରିଣତି ଖରାପ ହେବ ।