ମେଟ୍ରୋ ଟିଭି ଓଡିଶା (୯.୫.୨୦୨୨)
ବୌଦ୍ଧ ଜିଲା ବଲାଶିଙ୍ଗା ଗ୍ରାମରେ ଘଟିଥିବା ଏକ ଅଭାବନୀୟ ଘଟଣା ଆଧୁନିକ ସମାଜରେ ସାଧାରଣ ମଣିଷଙ୍କ ମାନବିକତାକୁ ନେଇ ଏକ ବଡ ପ୍ରଶ୍ନବାଚୀ ସୃଷ୍ଟି କରିଛି । ଝିଅ ଅନ୍ୟ ଜାତିରେ ବିବାହ କରିବାରୁ ଜଣେ ନିରାଶ୍ରୟ ମାଆକୁ ମୃତ୍ୟୁ ପରେ ଜାତିଭାଇଙ୍କ ଚାରିକାନ୍ଧ ନମିଳିବା ଏବଂ ୧୮ ଘଣ୍ଟା ଧରି ଗ୍ରାମରେ ଶବ ପଡିରହିବା ଭଳି ଏକ ଅଭାବନୀୟ ଘଟଣା ସ୍ଥାନୀୟ ବୁଦ୍ଧଜୀବୀ ମହଲରେ ଆଲୋଡନ ସୃଷ୍ଟି କରିଛି ।
ସୂଚନା ମୁତାବକ ବୌଦ୍ଧ ସହରଠାରୁ ମାତ୍ର ୪ କିଲୋମିଟର ଦୂର ଜାତୀୟ ରାଜପଥ କଡ ବଲାଶିଙ୍ଗା ଗ୍ରାମରେ ରହନ୍ତି ନିରାଶ୍ରୟା ବୃଦ୍ଧା ସୁଲଭ ପ୍ରଧାନ( ୭୨) । ସ୍ୱାମୀଙ୍କ ମୃତ୍ୟୁ ପରେ ଏକମାତ୍ର ଝିଅ ଜମ୍ବୁ ପ୍ରଧାନ ଅନ୍ୟ ଜାତିର ପୁଅକୁ ପ୍ରେମ ବିବାହ କରି ମାଆକୁ ଏକୁଟିଆ ଛାଡି ଚାଲିଯାଇଥିଲେ । ନିରାଶ୍ରୟା ମା’ କିଏ ଦେଲେ ଖାଆନ୍ତି ନହେଲେ ଭୋକ ଉପବାସରେ କୁଡିଆରେ ପଡି ରହିଥାନ୍ତି । ଜାତି ଭାଇଙ୍କ ବିରୋଧ ଯୋଗୁ ଝିଅ ଇଚ୍ଛା ଥିଲେ ମଧ୍ୟ ମାଆ ପାଖକୁ ଆସି କେବେ ସେବା ଯତ୍ନ କରିପାରନ୍ତିନାହିଁ । ଗତକାଲି ରାତିରେ ବୃଦ୍ଧା ସୁଲଭଙ୍କ ମୃତ୍ୟୁ ହୋଇଯାଇଥିଲା । ହେଲେ ପରିବାରର କୌଣସି ସଦସ୍ୟ ନଥିବାରୁ ବୃଦ୍ଧା ସୁଲଭଙ୍କ ଶବ ସେହିପରି ପଡିରହିଥିଲା । ପ୍ରାୟ ୧୮ ଘଣ୍ଟା ଶବ ପଡି ରହିବାପରେ ଏହି ସୂଚନା ପାଇ ଝିଅ ଜମ୍ବୁ ପହଞ୍ଚିଥିଲା ବଲାସିଙ୍ଗା ଗ୍ରାମରେ । ହେଲେ ଅନ୍ୟ ଜାତିରେ ବିବାହ କରିଥିବାରୁ ଜାତିଭାଇ ମାଆ ସୁଲଭଙ୍କ ଶବକୁ ଛୁଇଁବାକୁ ଦେଇନଥିଲେ ଏକମାତ୍ର ଝିଅକୁ । ସତେ ଯେପରି ସଭ୍ୟ ସମାଜରେ କୁସଂସ୍କାରର ଅନ୍ଧପୁଟୁଳି ଭିତରେ ହଜିଯାଇଥିଲା ସମସ୍ତଙ୍କ ସାଧାରଣ ମାନବିକତା ।