ପଶ୍ଚିମ ଏସିଆ ସଙ୍କଟ ଯୋଗୁଁ ସୃଷ୍ଟି ହୋଇଥିବା ଶକ୍ତି ସଙ୍କଟକୁ ଦୃଷ୍ଟିରେ ରଖି ସୁପ୍ରିମକୋର୍ଟ ବଡ଼ ନିଷ୍ପତ୍ତି ନେଇଛନ୍ତି । ସୁପ୍ରିମକୋର୍ଟ ଶୁକ୍ରବାର ଦିନ ଇନ୍ଧନ ସଂରକ୍ଷଣ ଏବଂ ସମ୍ବଳର ସଦୁପଯୋଗ ପାଇଁ କେତେକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶାବଳୀ ଜାରି କରିଛନ୍ତି। ସୁପ୍ରିମକୋର୍ଟର ସେକ୍ରେଟାରୀ ଜେନେରାଲ୍ ଭରତ ପରାଶରଙ୍କ ଦ୍ୱାରା ଜାରି କରାଯାଇଥିବା ସର୍କୁଲାର୍ ଅନୁଯାୟୀ ନିମ୍ନଲିଖିତ ବ୍ୟବସ୍ଥା ଗୁଡ଼ିକ ତୁରନ୍ତ ପ୍ରଭାବରୁ ଲାଗୁ ହୋଇଛି ।
ଭର୍ଚୁଆଲ୍ ଶୁଣାଣି (Virtual Hearings): କୋର୍ଟରେ ବ୍ୟକ୍ତିଗତ ଉପସ୍ଥିତି ହ୍ରାସ କରିବା ସହ ଗାଡ଼ି ଚଳାଚଳ କମାଇବା ପାଇଁ ଅଧିକରୁ ଅଧିକ ମାମଲାର ଶୁଣାଣି ଭିଡିଓ କନଫରେନ୍ସିଂ ମାଧ୍ୟମରେ କରାଯିବ।
ୱାର୍କ ଫ୍ରମ୍ ହୋମ୍ (Work From Home): କୋର୍ଟର କର୍ମଚାରୀମାନଙ୍କ ପାଇଁ ଘରୁ ରହି କାମ କରିବା ବ୍ୟବସ୍ଥା ଲାଗୁ କରାଯାଇଛି, ଏହା ଦ୍ୱାରା ଯାତାୟାତରେ ଖର୍ଚ୍ଚ ହେଉଥିବ ଇନ୍ଧନ ବଞ୍ଚାଯାଇ ପାରିବ।
କାର୍-ପୁଲିଂ (Car-Pooling): ବିଚାରପତିମାନଙ୍କୁ ପରାମର୍ଶ ଦିଆଯାଇଛି ଯେ, ସେମାନେ ଗୋଟିଏ ଗାଡ଼ିରେ ଏକାଧିକ ଜଣ ଯାତ୍ରା କରିବେ (କାର୍-ପୁଲିଂ), ଯାହାଦ୍ୱାରା ସରକାରୀ ଗାଡ଼ିର ବ୍ୟବହାର କମ୍ ହେବ।
କାହିଁକି ଏହି ନିଷ୍ପତ୍ତି ?
ବର୍ତ୍ତମାନ ପଶ୍ଚିମ ଏସିଆରେ ଚାଲିଥିବା ଯୁଦ୍ଧ ଓ ଅସ୍ଥିରତା ଯୋଗୁଁ ଅଶୋଧିତ ତୈଳ (Crude Oil) ଯୋଗାଣରେ ବାଧା ସୃଷ୍ଟି ହୋଇଛି । ଏହାର ପ୍ରଭାବ ଭାରତ ଉପରେ ପଡ଼ିଛି। ସୁପ୍ରିମକୋର୍ଟଙ୍କ ଏହି ପଦକ୍ଷେପ କେବଳ ଇନ୍ଧନ ସଞ୍ଚୟ କରିବାରେ ସାହାଯ୍ୟ କରିବ ନାହିଁ, ବରଂ ଏହା ସାରା ଦେଶ ପାଇଁ ଏକ ଉଦାହରଣ ସାଜିବ। ଦେଶର ସର୍ବୋଚ୍ଚ ନ୍ୟାୟାଳୟ ଏଭଳି ନୀତି ଆପଣାଇବା ଦ୍ୱାରା ଅନ୍ୟାନ୍ୟ ସରକାରୀ ଓ ବେସରକାରୀ ସଂସ୍ଥା ମଧ୍ୟ ଏଭଳି କରିବାକୁ ଉତ୍ସାହିତ ହେବେ। ଇନ୍ଧନ ସଂରକ୍ଷଣ କେବଳ ଅର୍ଥନୀତି ପାଇଁ ନୁହେଁ, ବରଂ ବର୍ତ୍ତମାନର ବିଶ୍ୱ ପରିସ୍ଥିତିରେ ଏହା ଏକ ଜାତୀୟ ଦାୟିତ୍ୱ।
ମଧ୍ୟପ୍ରାଚ୍ୟରେ ଚାଲିଥିବା ସଂଘର୍ଷରୁ ଉପୁଜିଥିବା ଆର୍ଥିକ ଚାପକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶକ୍ତି ସଞ୍ଚୟ ଲାଗି ପଦକ୍ଷେପ ନେବାକୁ ଆହ୍ୱାନ ଦେଇଥିଲେ । ଏହାକୁ ନଜରରେ ରଖି ସୁପ୍ରିମକୋର୍ଟ ଏହି ପଦକ୍ଷେପ ନେଇଛନ୍ତି । ପ୍ରଧାନମନ୍ତ୍ରୀ ମୋଦୀ ନାଗରିକ ଏବଂ ପ୍ରତିଷ୍ଠାନଗୁଡ଼ିକୁ ପେଟ୍ରୋଲ ଏବଂ ଡିଜେଲ ବ୍ୟବହାର ହ୍ରାସ କରିବାକୁ, ସୁନା କ୍ରୟକୁ ସୀମିତ କରିବାକୁ, ମେଟ୍ରୋ ରେଳ ସେବା ବ୍ୟବହାର କରିବାକୁ, କାର-ପୁଲିଂକୁ ପ୍ରୋତ୍ସାହିତ କରିବାକୁ, ବୈଦ୍ୟୁତିକ ଯାନବାହନ ଉପରେ ଅଧିକ ନିର୍ଭର କରିବାକୁ ଏବଂ ଯେଉଁଠାରେ ସମ୍ଭବ ହୁଏ ଘରୁ କାମ କରିବା ଅଭ୍ୟାସ ଗ୍ରହଣ କରିବାକୁ ଅନୁରୋଧ କରିଥିଲେ।