ପଞ୍ଜାବ ସରକାରଙ୍କ ବଡ଼ ନିଷ୍ପତ୍ତି , ସୀମାରେ ନଅଟି ଆଣ୍ଟି ଡ୍ରୋନ ସିଷ୍ଟମ ନିୟୋଜିତ କରିବାକୁ ନିଷ୍ପତ୍ତି

ଭାରତ ଏବଂ ପାକିସ୍ତାନ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ପଞ୍ଜାବ ସରକାର ଆତଙ୍କବାଦୀଙ୍କ ମେରୁଦଣ୍ଡ ଭାଙ୍ଗିବା ପାଇଁ ଏକ ବଡ଼ ପଦକ୍ଷେପ ନେଇଛନ୍ତି।  ପାକିସ୍ତାନ କ୍ରମାଗତ ଭାବେ ଅସ୍ତ୍ରବିରତି ଉଲ୍ଲଂଘନ କରିବାକୁ ଉଦ୍ୟମ କରୁଛି। ଏହାକୁ ଦୃଷ୍ଟିରେ ରଖି  ପଞ୍ଜାବ କ୍ୟାବିନେଟ ସୀମାରେ ନଅଟି ଆଣ୍ଟି ଡ୍ରୋନ ସିଷ୍ଟମ ନିୟୋଜିତ କରିବାକୁ ନିଷ୍ପତ୍ତି ନେଇଛି। ଏଥିସହିତ ପାକିସ୍ତାନର ଷଡ଼ଯନ୍ତ୍ରକୁ ବିଫଳ କରିବା ପାଇଁ ହାଇ-ଟେକ୍ ସିଷ୍ଟମ ମାଧ୍ୟମରେ ନଜର ରଖାଯିବ। ପ୍ରଥମ ଥର ପାଇଁ ପଞ୍ଜାବ ସରକାର ଡ୍ରୋନ ମାଧ୍ୟମରେ ନିଶାଦ୍ରବ୍ୟ ଚୋରା ଚାଲାଣକୁ ରୋକିବା ପାଇଁ ଆଣ୍ଟି ଡ୍ରୋନ ସିଷ୍ଟମ ନିୟୋଜିତ କରିବେ।`ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ଶୁକ୍ରବାର (୯ ମଇ) ଏକ ଗୁରୁତ୍ୱପୂର୍ଣ୍ଣ କ୍ୟାବିନେଟ ବୈଠକ ଡାକିଥିଲେ। ଏହି ବୈଠକରେ ମୋଟ ୧୫ଟି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ଯେଉଁଥିରେ ସୁରକ୍ଷାଠାରୁ ଆରମ୍ଭ କରି କୃଷି ଏବଂ ଶିଳ୍ପ ବିକାଶ ପର୍ଯ୍ୟନ୍ତ ପ୍ରସଙ୍ଗ ଅନ୍ତର୍ଭୁକ୍ତ ରହିଛି। ମୁଖ୍ୟମନ୍ତ୍ରୀ ଡାକିଥିବା କ୍ୟାବିନେଟ ବୈଠକରେ ସବୁଠାରୁ ବଡ଼ ନିଷ୍ପତ୍ତି ଥିଲା ରାଜ୍ୟରେ ଆଣ୍ଟି ଡ୍ରୋନ ସିଷ୍ଟମକୁ ସକ୍ରିୟ କରିବା। ଭାରତ ଏବଂ ପାକିସ୍ତାନ ମଧ୍ୟରେ ବଢ଼ୁଥିବା ଉତ୍ତେଜନାକୁ ଦେଖି ଅମୃତସର, ପଠାଣକୋଟ, ଫିରୋଜପୁର ଏବଂ ଗୁରୁଦାସପୁର ସମେତ ପଞ୍ଜାବର ଅନେକ ସୀମାନ୍ତ ଜିଲ୍ଲାଗୁଡ଼ିକରେ ସମ୍ପୂର୍ଣ୍ଣ ବ୍ଲାକଆଉଟ୍ ଲାଗୁ କରିଦିଆଯାଇଛି।