ଫେମିନା ମିସ୍ ଇଣ୍ଡିଆ ୱାର୍ଲଡ ୨୦୨୬’କୁ ନିଜ ନାଁରେ କଲେ ଗୋଆର ପ୍ରତିଭାବାନ ସୁନ୍ଦରୀ ସାଧ୍ୱୀ ସତୀଶ ସାଇଲ୍
UBC ଡିଗ୍ରୀରୁ ମିସ୍ ଇଣ୍ଡିଆ ମୁକୁ ଟ! ସୌନ୍ଦର୍ଯ୍ୟ ଜଗତର ସବୁଠାରୁ ପ୍ରତିଷ୍ଠିତ ମୁକୁଟ ‘ଫେମିନା ମିସ୍ ଇଣ୍ଡିଆ ୱାର୍ଲଡ ୨୦୨୬’କୁ ନିଜ ନାଁରେ କଲେ ଗୋଆର ପ୍ରତିଭାବାନ ସୁନ୍ଦରୀ ସାଧ୍ୱୀ ସତୀଶ ସାଇଲ୍। ଶନିବାର ଠିକ୍ ରାତି ୧୨ଟା ବେଳକୁ ଘୋଷଣା ହେଲା ତାଙ୍କ ନାଁ । ଭୁବନେଶ୍ୱର ସ୍ଥିତ କଳିଙ୍ଗ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡଷ୍ଟ୍ରିଆଲ୍ ଟେକ୍ନୋଲୋଜି (KIIT) ପରିସରରେ ଆୟୋଜିତ ଭବ୍ୟ ସମାରୋହରେ ତାଙ୍କୁ ଏହି ସମ୍ମାନଜନକ ମୁକୁଟ ପ୍ରଦାନ କରାଯାଇଛି । ତେବେ ସାଧ୍ୱୀଙ୍କ ଏହି ସଫଳତା କେବଳ ଗ୍ଲାମର ଦୁନିଆରେ ସୀମିତ ନୁହେଁ, ବରଂ ତାଙ୍କର ଶିକ୍ଷାଗତ ପୃଷ୍ଠଭୂମି ମଧ୍ୟ ଅତ୍ୟନ୍ତ ପ୍ରେରଣାଦାୟୀ । ସାଧ୍ୱୀ ସାଇଲ୍ଙ୍କ ଶିକ୍ଷାଗତ ଯାତ୍ରା ଅମୃତା ବିଦ୍ୟାଳୟରୁ ଆରମ୍ଭ ହୁଏ। ପରବର୍ତ୍ତୀ ସମୟରେ ସେ ବିଶ୍ୱର ଅନ୍ୟତମ ଶ୍ରେଷ୍ଠ ଶିକ୍ଷାନୁଷ୍ଠାନ ୟୁନିଭର୍ସିଟି ଅଫ୍ ବ୍ରିଟିଶ୍ କଲମ୍ବିଆ (UBC) ରୁ ଉଚ୍ଚଶିକ୍ଷା ହାସଲ କରିଥିଲେ। ଜଣେ ମଡେଲ୍ ସହିତ ସାଧ୍ୱୀ ସାଇଲ୍ ଜଣେ ସଫଳ ମହିଳା ଉଦ୍ୟୋଗୀ ମଧ୍ୟ ।
ଗୋଆ ପରି ଏକ ସଂସ୍କୃତି ଭରା ରାଜ୍ୟରୁ ଆସିଥିବା ସାଧ୍ୱୀ, ନିଜର ଶିକ୍ଷାଗତ ଯୋଗ୍ୟତା ଏବଂ ଦୂରଦୃଷ୍ଟି ବଳରେ ସୌନ୍ଦର୍ଯ୍ୟ ପ୍ରତିଯୋଗିତାରେ ଶ୍ରେଷ୍ଠ ବିବେଚିତ ହୋଇଛନ୍ତି । ସାଧ୍ୱୀଙ୍କ ବ୍ୟକ୍ତିତ୍ୱ ବିଶ୍ୱସ୍ତରୀୟ ଅର୍ଥନୀତିଜ୍ଞ ଗୀତା ଗୋପୀନାଥଙ୍କ ଦ୍ବାରା ଗଭୀର ଭାବେ ପ୍ରଭାବିତ । ସେ ଗୀତା ଗୋପୀନାଥଙ୍କୁ ନିଜର ପ୍ରେରଣା ଭାବେ ଗ୍ରହଣ କରିଛନ୍ତି ।
ବର୍ତ୍ତମାନ ସାଧ୍ୱୀ ଜଣେ ସଫଳ ମଡେଲ୍ ଏବଂ ଉଦ୍ୟୋଗୀ ଭାବେ କାର୍ଯ୍ୟ କରୁଛନ୍ତି। ତେବେ ତାଙ୍କ ଜୀବନ ଧାରା କେବଳ ଏତିକିରେ ସୀମିତ ନୁହେଁ। ସେ ନିଜର ବ୍ୟସ୍ତବହୁଳ ଜୀବନ ମଧ୍ୟରେ ମାଟି କାମ, ଫଟୋଗ୍ରାଫି, ସ୍କେଚିଂ, ମହୁମାଛି ପାଳନ, ଟାକ୍ସିଡର୍ମି ଏବଂ ବ୍ୟାଡମିଣ୍ଟନ ପରି ବିଭିନ୍ନ ସୃଜନଶୀଳ କାର୍ଯ୍ୟରେ ନିଜକୁ ନିୟୋଜିତ ରଖନ୍ତି। ଏହି ସବୁ ଗୁଣ ତାଙ୍କୁ ଜଣେ ଗତିଶୀଳ ଏବଂ ସମ୍ପୂର୍ଣ୍ଣ ବ୍ୟକ୍ତିତ୍ୱ ଭାବେ ଗଢ଼ି ତୋଳିଛି ।
ଓଡ଼ିଶାର KIIT ବିଶ୍ୱବିଦ୍ୟାଳୟରେ ଅନୁଷ୍ଠିତ ଐତିହାସିକ ଗ୍ରାଣ୍ଡ ଫିନାଲେରେ ତାଙ୍କର ବୁଦ୍ଧିମତ୍ତା ଏବଂ ବ୍ୟକ୍ତିତ୍ୱ ସମସ୍ତଙ୍କୁ ପ୍ରଭାବିତ କରିଥିଲା। ସାଧ୍ୱୀ ସତୀଶ ସାଇଲ୍ କେବଳ ଆକର୍ଷଣୀୟ ବ୍ୟକ୍ତିତ୍ୱ କି ସୁନ୍ଦରତା ପାଇଁ ନୁହେଁ, ବରଂ ନିଜର ମହତ୍ ମନୋଭାବ ପାଇଁ ମଧ୍ୟ ସମସ୍ତଙ୍କ ହୃଦୟ ଜିତିଛନ୍ତି । ଜଣେ ସଫଳ ମଡେଲ୍ ହେବା ସହ ସେ ଜଣେ ଜଣାଶୁଣା ସମାଜସେବୀ, ଯିଏ ଶିଶୁ କଲ୍ୟାଣ ଏବଂ ସ୍ୱାସ୍ଥ୍ୟ ସେବା କ୍ଷେତ୍ରରେ କାର୍ଯ୍ୟ କରୁଥିବା ବିଭିନ୍ନ ଫାଉଣ୍ଡେସନ୍ ପାଇଁ ପାଣ୍ଠି ସଂଗ୍ରହ କରିବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ସାଧ୍ୱୀ ବିଶେଷ କରି ଅପପୁଷ୍ଟିର ଶିକାର ହେଉଥିବା ଶିଶୁ ଏବଂ ଶ୍ରବଣ ଓ ବାକ୍ ଶକ୍ତିହୀନ ପିଲାମାନଙ୍କ ସହାୟତା ପାଇଁ ନିଜକୁ ଉତ୍ସର୍ଗ କରିଛନ୍ତି। ସୋସିଆଲ୍ ମିଡିଆ ପ୍ଲାଟଫର୍ମ ଇନଷ୍ଟାଗ୍ରାମରେ ତାଙ୍କର ଟ୍ରେଣ୍ଡିଂ ରିଲ୍ସ ଏବଂ ଫିଟନେସ୍ ଅପଡେଟ୍ ମଧ୍ୟରେ ତାଙ୍କର ବୃତ୍ତିଗତ ଓ ବ୍ୟକ୍ତିଗତ ଜୀବନର ଏକ ସନ୍ତୁଳିତ ଝଲକ ଦେଖିବାକୁ ମିଳେ । ତାଙ୍କର ଏହି ସେବା ମନୋଭାବ ହିଁ ତାଙ୍କୁ ସାଧାରଣ ସୁନ୍ଦରୀଙ୍କଠାରୁ ଅଲଗା ପରିଚୟ ଦେଇଛି ।
ଫିନାଲେ ସନ୍ଧ୍ୟାରେ ସାଧ୍ୱୀଙ୍କ ପୋଷାକ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା। ସେ ପ୍ରତିଷ୍ଠିତ ଡିଜାଇନର୍ ଲେବଲ୍ ‘ଭଜାନେହ’ (Vazaneh) ଦ୍ୱାରା ପ୍ରସ୍ତୁତ ଏକ ହଲ୍ଟର-ନେକ୍, ବଡି-ହଗିଙ୍ଗ୍ ଗାଉନ୍ ପରିଧାନ କରିଥିଲେ। ଏହି ଗାଉନ୍ରେ ରୂପା ରଙ୍ଗର ମେଟାଲିକ୍ ବିଡ୍ୱର୍କର ସୂକ୍ଷ୍ମ କାରୁକାର୍ଯ୍ୟ କରାଯାଇଥିଲା। ଏହା ସହିତ ସେ ସୁନ୍ଦର କାନଫୁଲ ଏବଂ ମୁଣ୍ଡ ଉପର ଭାଗରେ ଏକ ସରଳ ‘ହାଫ୍-ଟକ୍’ ହେୟାର ଷ୍ଟାଇଲ୍ରେ ନିଜକୁ ସଜାଇଥିଲେ, ଯାହା ତାଙ୍କ ସୌନ୍ଦର୍ଯ୍ୟକୁ ଆହୁରି ଦ୍ୱିଗୁଣିତ କରିଥିଲା। ଏହି ଐତିହାସିକ ବିଜୟ ପରେ ସାଧ୍ୱୀ ସାଇଲ୍ ଏବେ ଆନ୍ତର୍ଜାତିକ ‘ମିସ୍ ୱାର୍ଲଡ’ ପ୍ରତିଯୋଗିତାରେ ଭାରତର ପ୍ରତିନିଧିତ୍ୱ କରିବେ । ଓଡ଼ିଶାର KIIT ବିଶ୍ୱବିଦ୍ୟାଳୟରୁ ଆରମ୍ଭ ହୋଇଥିବା ତାଙ୍କର ଏହି ସଫଳ ଯାତ୍ରା ଏବେ ବିଶ୍ୱ ଦରବାରରେ ଭାରତର ଗୌରବ ବଢ଼ାଇବ ବୋଲି ଆଶା କରାଯାଉଛି। ସାଧ୍ୱୀ ସାଇଲ୍ଙ୍କ ଏହି ସଫଳତା ପ୍ରମାଣ କରିଛି ଯେ ଯଦି ଦୃଢ଼ ଇଚ୍ଛାଶକ୍ତି ଏବଂ ଶିକ୍ଷା ଥାଏ, ତେବେ ଜଣେ ମହିଳା ଯେକୌଣସି କ୍ଷେତ୍ରରେ ବିଶ୍ୱ ବିଜୟିନୀ ହୋଇ ପାରିବ । ଏବେ ତାଙ୍କର ଲକ୍ଷ୍ୟ ରହିବ ମିସ୍ ୱାର୍ଲଡ ଟାଇଟଲ୍ ଜିତିବା । ସେଥିପାଇଁ ଲାଗି ପଡ଼ିବେ ପ୍ରସ୍ତୁତିରେ ।