‘ଏକ୍ସ’କୁ କିଣିଲା ‘ଏକ୍ସଏଆଇ
ବିଶ୍ବର ପ୍ରମୁଖ ଧନୀ ବ୍ୟକ୍ତି ଏଲନ ମସ୍କ ତାଙ୍କର ସାମାଜିକ ଗଣମାଧ୍ୟମ କମ୍ପାନି ‘ଏକ୍ସ’କୁ ନିଜର କୃତ୍ରିମ ବୁଦ୍ଧିମତ୍ତା କମ୍ପାନି ‘ଏକ୍ସଏଆଇ’କୁ ବିକ୍ରି କରିଦେଇଛନ୍ତି। ଏକ୍ସକୁ କିଣିବା ପାଇଁ ଏକ୍ସଏଆଇ ୩୩ ବିଲିଅନ ଡଲାର ଖର୍ଚ୍ଚ କରିଛି। ସଂପୂର୍ଣ୍ଣ ଭାବେ ଷ୍ଟକ୍ ଜରିଆରେ ଏହି କାରବାର ହୋଇଛି। ନିଜେ ମସ୍କ ଏହି ବିକ୍ରି ସଂପର୍କରେ ଏକ୍ସରେ ସୂଚନା ଦେଇଛନ୍ତି। ମସ୍କଙ୍କ ଭଳି ଏକ୍ସର ଅନ୍ୟ ସହଯୋଗୀ ନିବେଶକମାନେ ମଧ୍ୟ ଏକ୍ସଏଆଇରେ ଅଂଶଧନ ହାସଲର ସୁଯୋଗ ପାଇଛନ୍ତି। ମସ୍କ କହିଛନ୍ତି ଯେ ଏକ୍ସଏଆଇ ଏବଂ ଏକ୍ସର ଭବିଷ୍ୟତ ପରସ୍ପର ସହ ଅଙ୍ଗାଙ୍ଗୀଭାବେ ଜଡ଼ିତ। ଆଜିଠାରୁ ଆମେ ବିଧିବଦ୍ଧଭାବେ ଡାଟା, ମଡେଲ, କମ୍ପ୍ୟୁଟ, ଡିଷ୍ଟ୍ରିବ୍ୟୁସନ ଏବଂ ଟ୍ୟାଲେଣ୍ଟକୁ ମିଶାଇବା ପାଇଁ ପଦକ୍ଷେପ ନେଇଛୁ। ଗୋଟିଏ ପଟେ ଏକ୍ସର ବ୍ୟାପକତା ରହିଛି। ଅନ୍ୟପଟେ ଏକ୍ସଏଆଇ ନିକଟରେ ଅତ୍ୟାଧୁନିକ କୃତ୍ରିମ ବୁଦ୍ଧିମତ୍ତା କ୍ଷମତା ରହିଛି। ତେଣୁ ଏହି ଦୁଇ କମ୍ପାନି ନିକଟରେ ପର୍ଯ୍ୟାପ୍ତ ସାମର୍ଥ୍ୟ ରହିଛି ବୋଲି ସେ କହିଛନ୍ତି।
ସୂଚନାଯୋଗ୍ୟ, ପ୍ରାୟ ୬ ମାସର ଛକାପଞ୍ଝା ଏବଂ ଆଇନଗତ ଲଢ଼େଇ ପରେ ମସ୍କ ସେତେବେଳର ଟ୍ବିଟରକୁ ୪୪ ବିଲିଅନ ଡଲାର ମୂଲ୍ୟରେ ୨୦୨୨ ଅକ୍ଟୋବର ମାସରେ କିଣିଥିଲେ। ଏହାକୁ କିଣିବା ପରେ ସେ କମ୍ପାନିର ନାମ ବଦଳାଇ ଏକ୍ସ ରଖିଥିଲେ। ଏଥିସହିତ ବ୍ୟାପକ କର୍ମଚାରୀ ଛଟେଇ କରିବା ସହିତ ଅନ୍ୟାନ୍ୟ ବଡ଼ଧରଣର ପରିବର୍ତ୍ତନ ଆଣିଥିଲେ।