‘ଟେସ୍‌ଲା ଜଳାଅ, ଗଣତନ୍ତ୍ର ବଞ୍ଚାଅ’ ,ମସ୍କଙ୍କ ବିରୋଧରେ ବିକ୍ଷୋଭ

ଆମେରିକାରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସରକାରରେ ବିଶ୍ବର ଏକ ନମ୍ବର ଧନୀ ଏଲନ୍ ମସ୍କଙ୍କ ପ୍ରଭାବକୁ ନେଇ ଦେଶବାସୀଙ୍କ ମଧ୍ୟରେ ଥିବା ଅସନ୍ତୋଷ ଏକ ବଡ଼ ଆନ୍ଦୋଳନର ରୂପ ନେଇଛି। ପ୍ରଥମ ଥର ପାଇଁ ମସ୍କଙ୍କୁ ବିରୋଧ କରି ହଜାର ହଜାର ଲୋକ ରାଜରାସ୍ତାକୁ ଓହ୍ଲାଇଛନ୍ତି। ମସ୍କଙ୍କ କମ୍ପାନି ଟେସ୍‌ଲାର ସୋ’ରୁମ୍‌ଗୁଡ଼ିକୁ ବିକ୍ଷୋଭକାରୀମାନେ ଟାର୍ଗେଟ୍‌ କରିବା ଭଙ୍ଗାରୁଜା କରିଛନ୍ତି। କେବଳ ଆମେରିକା ନୁହେଁ, ୟୁରୋପ ଓ କାନାଡାରେ ମଧ୍ୟ ଆନ୍ଦୋଳନ ହୋଇଛି। ଅତ୍ୟନ୍ତ ସଂଗଠିତ ଢଙ୍ଗରେ ବିକ୍ଷୋଭକାରୀମାନେ ବହୁ ସଂଖ୍ୟାରେ ବିଭିନ୍ନ ସ୍ଥାନରେ ଏକତ୍ରୀତ ହୋଇ ଆନ୍ଦୋଳନକୁ ବଡ଼ ରୂପ ଦେଇଛନ୍ତି, ଯାହା ସାରା ବିଶ୍ବର ଦୃଷ୍ଟି ଆକର୍ଷଣ କରିଛି। ମସ୍କଙ୍କୁ ସେମାନେ ନାଜି ବୋଲି କହିବା ସହ ସେ ଦେଶକୁ ଫାସୀବାଦ ଆଡ଼କୁ ନେଉଥିବା ଅଭିଯୋଗ କରିଛନ୍ତି। ସରକାରୀ ଦକ୍ଷତା ବିଭାଗ (ଡିଓଜିଇ)‌ର ମୁଖ୍ୟ ଭାବେ ମସ୍କ କର୍ମଚାରୀ ଛଟେଇ, ବଜେଟ୍‌ କାଟ ଭଳି ନେଉଥିବା କଠୋର ନିଷ୍ପତ୍ତିକୁ ଲୋକମାନେ ବିରୋଧ କରୁଛନ୍ତି।

‘ଟେସ୍‌ଲା ଜଳାଅ, ଗଣତନ୍ତ୍ର ବଞ୍ଚାଅ’ ଲେଖାଥିବା ପ୍ଲାକାର୍ଡ ବିକ୍ଷୋଭକାରୀମାନେ ଧରିଥିବା ଦେଖିବାକୁ ମିଳିଛି। ଆମେରିକାର ବିଭିନ୍ନ ସ୍ଥାନ ଯଥା ୱାସିଂଟନ, ସିନ୍‌ସିନାଟି, ଚିକାଗୋ, ଇଣ୍ଡିଆନାପୋଲିସ, ଭର୍ଜିନିଆ, ପେନ୍‌ସିଲ୍‌ଭାନିଆ, କଲ୍‌ରାଡୋ ଓ ସିଆଟଲ୍‌ରେ ମସ୍କ ବିରୋଧୀ ବିକ୍ଷୋଭ ହୋଇଛି। ଆନ୍ଦୋଳନକାରୀମାନେ ମସ୍କଙ୍କ ବିରୋଧରେ ସାରା ବିଶ୍ବରେ ୫୦୦ ବିକ୍ଷୋଭ କରିବାକୁ ଯୋଜନା ରଖିଛନ୍ତି। ସେଥିରୁ ୨୦୦ ବିକ୍ଷୋଭ ଆମେରିକ‌ାରେ ହେବ। ତେବେ ଟେସ୍‌ଲା ବିରୋଧରେ ଏଭଳି ଆନ୍ଦୋଳନକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କଡ଼ା ନିନ୍ଦା କରିଛନ୍ତି। ବିକ୍ଷୋଭକାରୀମାନଙ୍କୁ ‘ଆତଙ୍କବାଦୀ’ ଭାବେ ଅଭିହିତ କରି ସେମାନଙ୍କୁ ଏଲ୍‌ ସାଲ୍‌ଭାଡୋର ଜେଲ୍‌ ପଠାଇବାକୁ ସେ ଧମକ ଦେଇଥିବା କୁହାଯାଉଛି। ଖୋଦ୍‌ ମସ୍କ ଏହି ବିଦ୍ରୋହ ଉପରେ ମତ ଦେଇଛନ୍ତି। ସେ ନିଜ ସୋସିଆଲ୍ ମିଡିଆ କମ୍ପାନି ‘ଏକ୍ସ’ (ପୂର୍ବରୁ ଟ୍ବିଟର୍‌)ରେ ଲେଖିଛନ୍ତି ଯେ ଏହା ଅତ୍ୟନ୍ତ ଦୁର୍ଭାଗ୍ୟଜନକ ଯେ ଲୋକମାନେ ଟେସ୍‌ଲା ଷ୍ଟୋର୍‌ ଉପରକୁ ଗୁଳି ମାଡ଼ କରୁଛନ୍ତି, କାର୍‌ ଭଙ୍ଗାରୁଜା କରୁଛନ୍ତି ଓ ହିଂସାତ୍ମକ କାର୍ଯ୍ୟକଳାପରେ ଲିପ୍ତ ରହି ମୋତେ ନାଜି ବୋଲି କହୁଛନ୍ତି। କିନ୍ତୁ ମୁଁ କେବେବି କୌଣସି ହିଂସା କରିନାହିଁ ବୋଲି ସେ କହିଛନ୍ତି।

Leave a comment