ଭାରତୀୟ ରେଳବାଇର ଅନଲାଇନ୍ ଟିକେଟ୍ ବୁକିଂ ପ୍ଲାଟଫର୍ମ ଆଇଆର୍ସିଟିସିର ଏକ ନୂଆ ୱେବସାଇଟ୍ ଆରମ୍ଭ
ଭାରତୀୟ ରେଳବାଇର ଅନଲାଇନ୍ ଟିକେଟ୍ ବୁକିଂ ପ୍ଲାଟଫର୍ମ ଆଇଆର୍ସିଟିସିର ଏକ ନୂଆ ୱେବସାଇଟ୍ ଆରମ୍ଭ ହୋଇଛି। ପୁରୁଣା ୱେବସାଇଟ୍ରେ ଉନ୍ନତୀକରଣ କରି ଏହାକୁ ପ୍ରସ୍ତୁତ କରାଯାଇଛି। ଏହାର ପ୍ରାଥମିକ ଉଦ୍ଦେଶ୍ୟ ହେଉଛି ପ୍ରତିଦିନ ଟିକେଟ୍ ବୁକିଂ କରୁଥିବା ଲକ୍ଷ ଲକ୍ଷ ଯାତ୍ରୀଙ୍କ ପାଇଁ ଅଭିଜ୍ଞତାକୁ ସରଳ ଏବଂ ତ୍ୱରାନ୍ୱିତ କରିବା। ନୂତନ ଓ୍ବେବସାଇଟ ବର୍ତ୍ତମାନ ବିଟା ପର୍ଯ୍ୟାୟରେ ରହିଛି।ଅର୍ଥାତ୍ ଯାତ୍ରୀମାନଙ୍କ ମତାମତ ଆଧାରରେ ସେଥିରେ ପରିବର୍ତ୍ତନ କରାଯିବ।ୱେବସାଇଟ୍ର ବିଟା ସଂସ୍କରଣ ୨୦୨୬ ଜୁଲାଇ ୧୫ ରାତି ୯ଟାରେ ଲାଇଭ୍ ହୋଇଥିଲା। ଗତ ମାସରେ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଜୟପୁରର ମାଲବ୍ୟ ନ୍ୟାସନାଲ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି ପରିଦର୍ଶନ ସମୟରେ ଛାତ୍ରଛାତ୍ରୀମାନଙ୍କ ସହିତ ଆଲୋଚନା ସମୟରେ ତାହା ଘୋଷଣା କରିଥିଲେ।ନୂଆ ୱେବସାଇଟ୍ରେ ଲଗଇନ୍ କିମ୍ବା ବୁକିଂ ସମୟରେ ଆଉ କୌଣସି ବିରକ୍ତିକର କ୍ୟାପ୍ଚା ନାହିଁ। ଆଉ କୌଣସି ଅନାବଶ୍ୟକ ପପ୍-ଅପ୍, ଚମକଦାର ଗ୍ରାଫିକ୍ସ କିମ୍ବା ବିଭ୍ରାନ୍ତକାରୀ ଉପାଦାନ ନାହିଁ। ବ୍ୟବହାରକାରୀମାନଙ୍କୁ ଆଉ ବାରମ୍ବାର ବିଭିନ୍ନ ଶ୍ରେଣୀ, ଯେପରିକି ସ୍ଲିପର୍, ତୃତୀୟ ଏସି ଓ ଦ୍ୱିତୀୟ ଏସି ଖୋଜିବାକୁ ପଡିବ ନାହିଁ। ସମସ୍ତ ଶ୍ରେଣୀରେ ସିଟ୍ ଉପଲବ୍ଧତା ସ୍କ୍ରିନରେ ଏକକାଳୀନ ପ୍ରଦର୍ଶିତ ହେବ।ଆଇଆରସିଟିସି ବୁକିଂ ପାଇଁ ‘ଦ୍ରୁତ ଚେକଆଉଟ୍’ ସୁବିଧା ପ୍ରଚଳନ କରିଛି। ଟିକେଟ୍ ବୁକିଂ କରିବା ସମୟରେ ଯାତ୍ରୀମାନଙ୍କୁ କରିବାକୁ ପଡୁଥିବା ପଦକ୍ଷେପ ସଂଖ୍ୟା ହ୍ରାସ କରାଯାଇଛି। ବାରମ୍ବାର ଯାତ୍ରା କରୁଥିବା ଯାତ୍ରୀଙ୍କ ପାଇଁ ‘ସହଜ ପୁନରାବୃତ୍ତି ବୁକିଂ’ ଉପଲବ୍ଧ। ଯାତ୍ରୀଙ୍କ ବିବରଣୀ ପୂର୍ବରୁ ସଂରକ୍ଷିତ। ପରବର୍ତ୍ତୀ ସମୟରେ ଟିକେଟ୍ ବୁକ୍ କରିବା ସମୟରେ ଆପଣଙ୍କୁ ଆପଣଙ୍କର ନାମ, ବୟସ କିମ୍ବା ଅନ୍ୟାନ୍ୟ ସୂଚନା ପୁଣି ଥରେ ଦେବାକୁ ପଡ଼ିବ ନାହିଁ।