ସେନ୍‌ସେକ୍ସ ୯୮୨ ପଏଣ୍ଟ୍‌ ହ୍ରାସ ପାଇ ୭୬,୬୮୧.୨୯ ପଏଣ୍ଟ୍‌ରେ ବନ୍ଦ ହୋଇଛି

ମଧ୍ୟପ୍ରାଚ୍ୟ ଯୁଦ୍ଧ ଅନିଶ୍ଚିତତା ମଧ୍ୟରେ ଅଶୋଧିତ ତୈଳ ଦର ପୁଣି ବଢ଼ିଥିବାରୁ ଇକ୍ବିଟି ବଜାରରେ କାରବାର ପ୍ରଭାବିତ ହୋଇଛି। ଶୁକ୍ରବାର ବମ୍ବେ ଷ୍ଟକ୍‌ ଏକ୍ସଚେଞ୍ଜର ସେନ୍‌ସେକ୍ସ ୯୮୨ ପଏଣ୍ଟ୍‌ ହ୍ରାସ ପାଇ ୭୬,୬୮୧.୨୯ ପଏଣ୍ଟ୍‌ରେ ବନ୍ଦ ହୋଇଛି। ନ୍ୟାସନାଲ୍‌ ଷ୍ଟକ୍ ଏକ୍ସ‌ଚେଞ୍ଜର ନିଫ୍‌ଟି ୨୭୫.୧୦ ପଏଣ୍ଟ୍‌ ହ୍ରାସ ପାଇ ୨୩,୮୯୭.୯୫ ପଏଣ୍ଟ୍‌ରେ ବନ୍ଦ ହୋଇଛି।ସେନ୍‌ସେକ୍ସରେ ଘଟିଥିବା ହ୍ରାସ ପ୍ରଭାବରେ ନିବେଶକମାନେ ପ୍ରାୟ ୬ ଲକ୍ଷ କୋଟି ଟଙ୍କା ହରାଇଛନ୍ତି। ବମ୍ବେ ଷ୍ଟକ୍‌ ଏକ୍ସଚେଞ୍ଜରେ ମୋଟ୍‌ ବଜାର ପୁଞ୍ଜି ପରିମାଣ ୪୬୦ ଲକ୍ଷ କୋଟି ଟଙ୍କାକୁ ହ୍ରାସ ପାଇଛି। ଆଜି ନିବେଶକମାନେ ପ୍ରାୟ ସବୁ କ୍ଷେତ୍ରର ସେୟାର ବିକ୍ରି କରୁଥିବା ଦେଖିବାକୁ ମିଳିଥିଲା। ସୂଚନା ପ୍ରଯୁକ୍ତି କ୍ଷେତ୍ର ସର୍ବାଧିକ ପ୍ରଭାବିତ ହୋଇଥିଲା। ଇନ୍‌ଫୋସିସ୍‌, ‌ଏଚ୍‌ସିଏଲ୍‌ ଟେକ୍‌, ଟିସିଏସ୍‌ ଓ ଟେକ୍‌ ମହିନ୍ଦ୍ରାର ସେୟାର ମୂଲ୍ୟ ହ୍ରାସ ପାଇଥିଲା। ଅନ୍ତର୍ଜାତୀୟ ବଜାରରେ ବ୍ରେଣ୍ଟ୍‌ କ୍ରୁଡ୍‌ର ଦାମ୍‌ ବ୍ୟାରେଲ୍‌ ପିଛା ୧୦୭ ଡଲାର ହୋଇଯାଇଥିବାରୁ ଯୁଦ୍ଧ ସଙ୍କଟ ଆହୁରି ଜଟିଳ ହେବା ଆଶଙ୍କା କରାଯାଉଛି। ସେଥିପାଇଁ ନିବେଶକମାନେ ଭୟଭୀତ ହୋଇପଡ଼ିଛନ୍ତି। ତେଲର ଚଢ଼ା ଦର ଆମଦାନି ଉପରେ ନିର୍ଭରଶୀଳ ଦେଶ ଭାରତ ପାଇଁ କ୍ଷତିକାରକ। ଏହାର ପ୍ରଭାବରେ ଦରଦାମ୍‌ ସ୍ଥିତି ବେଲଗାମ ହେବା ଓ ଅର୍ଥନୈତିକ ଅଭିବୃଦ୍ଧି ହ୍ରାସ ପାଇବା ଆଶଙ୍କା କରାଯାଉଛି।