ମୃତ୍ୟୁକୁ ନେଇ ଗୁଜବ ଅନଲାଇନ୍ରେ ଝଡ଼ ସୃଷ୍ଟି କରିଥିବାବେଳେ ନୂଆ ଭିଡ଼ିଓ ଜାରି କଲେ ନେତାନ୍ୟାହୁ
ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ମୃତ୍ୟୁକୁ ନେଇ ଗୁଜବ ଅନଲାଇନ୍ରେ ଝଡ଼ ସୃଷ୍ଟି କରିଥିବାବେଳେ ସେ ନିଜେ ଏକ ଭିଡିଓ ଜାରି କରି ଏହାର ସିଧାସଳଖ ଜବାବ ରଖିଛନ୍ତି। ଇରାନ ଆକ୍ରମଣରେ ନେତାନ୍ୟାହୁଙ୍କ ମୃତ୍ୟୁ ହୋଇଥିବା ମାର୍ଚ୍ଚ ୧୩ରେ ଇସ୍ରାଏଲ ପକ୍ଷରୁ ଜାରି ତାଙ୍କର ଏକ ଭିଡିଓକୁ ନେଇ ଚର୍ଚ୍ଚା ହୋଇଥିଲା। ତେବେ ନେତାନ୍ୟାହୁ ଏକ କାଫେରେ ବସି କଫି ପିଇବା ସହିତ ତାଙ୍କ ମୃତ୍ୟୁ ଗୁଜବ ଉପରେ ଉପହାସ କରିଛନ୍ତି। ଭିଡିଓରେ ନେତାନ୍ୟାହୁ କଫି ଆଣିବାକୁ ନିର୍ଦ୍ଦେଶ ଦେବା ସହିତ ଗୁଜବ ଉପରେ ଉପହାସ କରୁଥିବା ଦେଖିବାକୁ ମିଳୁଛି। ଏଥିରେ ସେ କହିଛନ୍ତି, ‘ଆଇ ଆମ୍ ଡେଡ୍ ଫର୍ କଫି’ ଯାହାର ଅର୍ଥ ମୁଁ କଫି ପାଇଁ ପାଗଳ। ଇସ୍ରାଏଲ ଯେମିତି ଏହି ସଙ୍କଟ ଭିତରେ ସଂଘର୍ଷ କରୁଛି ତା’ର ପ୍ରଶଂସା କରି ନେତାନ୍ୟାହୁ କହିଛନ୍ତି, ମୁଁ ମୃତ୍ୟୁ ପର୍ଯ୍ୟନ୍ତ ମୋ ଦେଶକୁ ଭଲ ପାଇବି।
ଏହାସହିତ ଏକ ଭିଡିଓରେ ତାଙ୍କର ଛଅଟି ଆଙ୍ଗୁଠି ଦେଖାଯିବା ନେଇ ଇଣ୍ଟରନେଟ୍ର ଭାଇରାଲ ଦାବି ଉପରେ ନେତାନ୍ୟାହୁ ମଧ୍ୟ ଉପହାସ କରି ନିଜର ଦୁଇ ହାତକୁ କ୍ୟାମେରା ସମ୍ମୁଖରେ ପ୍ରଦର୍ଶନ କରିବା ସହିତ ୧୦ ଆଙ୍ଗୁଠି ଥିବା ଦେଖାଇଛନ୍ତି। ଏହାପୂର୍ବରୁ ଶନିବାର ମଧ୍ୟ ନେତାନ୍ୟାହୁଙ୍କ କାର୍ଯ୍ୟାଳୟ ମୃତ୍ୟୁ ଖବରକୁ ଖଣ୍ଡନ କରି ଏସବୁ ଗୁଜବ ବୋଲି କହିଥିଲା। ଅନ୍ୟପକ୍ଷରେ ଇରାନ ରବିବାର ପୁଣି ଥରେ ନେତାନ୍ୟାହୁଙ୍କୁ ହତ୍ୟା କରିବାକୁ ଧମକ ଦେଇଛି। ଇରାନର ଶକ୍ତିଶାଳୀ ସାମରିକ ବାହିନୀ ଇସଲାମିକ ରିଭୋଲ୍ୟୁସନାରୀ ଗାର୍ଡ଼ କର୍ପସ ‘ଶିଶୁ ହତ୍ୟାକାରୀ’ ନେତାନ୍ୟାହୁଙ୍କୁ ଖୋଜି ଖୋଜି ହତ୍ୟା କରିବ ବୋଲି ଶପଥ କରି କହିଛି।