ଭୁବନେଶ୍ୱର: ଓଡ଼ିଶା ରାଜନୀତିରେ ଆଜି ଏକ ବଡ଼ ଖବର। କଟକର ଜଣାଶୁଣା ରାଜନେତା ତଥା ପୂର୍ବତନ ବିଧାୟକ, ବର୍ତ୍ତମାନର ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ ଆଜି ବିଜୁ ଜନତା ଦଳ (ବିଜେଡି)ର ପ୍ରାଥମିକ ସଦସ୍ୟତାରୁ ଇସ୍ତଫା ଦେଇଛନ୍ତି। ସେ ଦଳର ସଭାପତି ନବୀନ ପଟ୍ଟନାୟକଙ୍କ ନିକଟକୁ ତାଙ୍କର ଇସ୍ତଫା ପତ୍ର ପଠାଇଛନ୍ତି। ଇସ୍ତଫା ପତ୍ରରେ ସେ ସ୍ପଷ୍ଟ ଭାବେ ଉଲ୍ଲେଖ କରିଛନ୍ତି ଯେ ସେ ବର୍ତ୍ତମାନର ଦଳୀୟ କାର୍ଯ୍ୟକଳାପ ଏବଂ ନିଷ୍ପତ୍ତିରେ ସନ୍ତୁଷ୍ଟ ନାହାଁନ୍ତି। ତାଙ୍କୁ ଦୀର୍ଘ ଦିନ ଧରି ଦଳରେ ଅଣଦେଖା କରାଯାଉଥିବାରୁ ଏବଂ ତାଙ୍କୁ ଗୁରୁତ୍ୱପୂର୍ଣ୍ଣ କାର୍ଯ୍ୟରୁ ଦୂରେଇ ରଖାଯାଉଥିବାରୁ ସେ ଏହି ଚରମ ନିଷ୍ପତ୍ତି ନେଇଛନ୍ତି ବୋଲି ସୂଚନା ମିଳିଛି। ଦେବାଶିଷ ସାମନ୍ତରାୟ ଆଗାମୀ ଦିନରେ କେଉଁ ଦଳରେ ଯୋଗ ଦେବେ, ସେ ନେଇ କୌଣସି ସ୍ପଷ୍ଟ ସୂଚନା ଦେଇ ନାହାଁନ୍ତି। ତେବେ ରାଜନୈତିକ ମହଲରେ ଚର୍ଚ୍ଚା ହେଉଛି ଯେ ସେ ଅନ୍ୟ କୌଣସି ପ୍ରମୁଖ ରାଜନୈତିକ ଦଳରେ ଯୋଗ ଦେଇପାରନ୍ତି। ବିଜେଡିର ଗୁରୁତ୍ୱପୂର୍ଣ୍ଣ ନେତାଙ୍କ ମଧ୍ୟରୁ ଦେବାଶିଷ ସାମନ୍ତରାୟଙ୍କ ଇସ୍ତଫା ରାଜ୍ୟ ରାଜନୀତିରେ ବିଶେଷକରି କଟକ ଜିଲ୍ଲାରେ ଦଳ ପାଇଁ ବଡ଼ ଝଟକା ହୋଇପାରେ।
ପୂର୍ବରୁ ପାଣ୍ଡିଆନଙ୍କ ଉପରେ ବର୍ଷିଥିଲେ ବିଜେଡିର ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ । ନିର୍ଦ୍ଦିଷ୍ଟ ଖବରକାଗଜକୁ ଦେଇଥିବା ସାକ୍ଷାତକାରରେ ଦେବାଶିଷ କହିଥିଲେ ନବୀନଙ୍କ ସ୍ବାସ୍ଥ୍ୟବସ୍ଥା ସଂପର୍କରେ ନେତାଙ୍କୁ ଓ ରାଜ୍ୟବାସୀଙ୍କୁ ନଜଣାଇବା ଭୈରବ ବାବୁଙ୍କର ଏକ ବଡ଼ ଭୂଲ୍ ଓ ଦଳ ପାଇଁ କ୍ଷତି । ଚିକିତ୍ସାଳୟରେ ଭର୍ତ୍ତି ହେବା ପରେ ତାଙ୍କ ସ୍ୱାସ୍ଥ୍ୟବସ୍ଥା ବିଷୟରେ ଜାଣିଲୁ । ଘରେ ନବୀନ ବାବୁ ଅସୁସ୍ଥ ହେବା ସମୟରେ ସେ କାହିଁକି କାହାକୁ ଜଣାଇଲେ ନାହିଁ ତାହା ଭାବିଲେ ଦୁଃଖ ଲାଗେ । ନବୀନ ବାବୁ ଓଡ଼ିଶାର ନେତା । ତେଣୁ ତାଙ୍କର ସମସ୍ତ ଖବର ଓଡ଼ିଶା ବାସୀ ଓ ଦଳର ନେତାମାନେ ଜାଣିବା ଦରକାର । ପାଣ୍ଡିଆନ ଜାଣିବା ଦରକାର ଓଡ଼ିଶା ପାଇଁ ତାଙ୍କର ଅବଦାନ ଓ ସ୍ୱପ୍ନ କିଛି ନାହିଁ । ପ୍ୟାରୀ ବାବୁ ବିଜେଡିର ସଂଗଠନ ତିଆରି କରିଥିଲେ ଏବଂ ୨୦୦୦ ମସିହାରୁ ବିଜୁବାବୁଙ୍କ ସ୍ବପ୍ନକୁ ନବୀନ ବାବୁ ସାକାର କରୁଛନ୍ତି ।
ସେବେଠାରୁ ଜଣାପଡ଼ୁଥିଲା ସେ ବିଜେଡି ଛାଡିବେ ।