ଆତଙ୍କବାଦୀ ଡାକ୍ତର ଉମର ନବିଙ୍କ ଭିଡିଓ ଭାଇରାଲ, ‘ଆତ୍ମଘାତୀ ବିସ୍ଫୋରଣ ପୂର୍ବରୁ କରିଥିଲେ ରେକର୍ଡ
ଦିଲ୍ଲୀରେ ବିସ୍ଫୋରଣ ଘଟାଇଥିବା ଆତଙ୍କବାଦୀ ମହମ୍ମଦ ଉମର ନବିଙ୍କର ବିଷୟରେ ନୂଆ ନୂଆ ତଥ୍ୟ ସାମନାକୁ ଆସୁଛି । ଏବେ ଏକ ଭିଡିଓ ସାମ୍ନାକୁ ଆସିଛି। ଏହି ଭିଡିଓଟି ଦିଲ୍ଲୀ ଆକ୍ରମଣ ପୂର୍ବରୁ ଡାକ୍ତର ଉମର ନବିଙ୍କ ଦ୍ୱାରା ରେକର୍ଡ କରାଯାଇଥିଲା । ଯେଉଁଥିରେ ସେ ଆତ୍ମଘାତୀ ବିସ୍ଫୋରଣକୁ ନିଜର ଦୃଷ୍ଟିକୋଣରୁ ବ୍ୟାଖ୍ୟା କରି ସମର୍ଥନ କରୁଥିବାର ଦେଖାଯାଉଛନ୍ତି। ୧ ମିନିଟ୍ ୨୧ ସେକେଣ୍ଡର ଏହି ଭିଡିଓ ରହିଛି । ଏଥିରେ ଆତଙ୍କବାଦୀ ଉମର ନବି ଶାନ୍ତ ଭାବରେ କ୍ୟାମେରା ସାମ୍ନାରେ ବସି କହୁଛନ୍ତି । ଇଂରାଜୀରେ ନିଜର ମତାମତ ସେ ଆତଙ୍କବାଦ ଉପରେ ଦେଉଥିବା ଦେଖାଯାଉଛି ।
ଆତଙ୍କବାଦୀ ଉମର ନବି ବୁଝାଇବାକୁ ଚେଷ୍ଟା କରୁଛନ୍ତି ଯେ ଆତ୍ମଘାତୀ ବିସ୍ଫୋରଣ ଠିକ୍ । ସେହି ଧାରଣାକୁ ଠିକ୍ ଭାବରେ ବୁଝାଯାଇ ନାହିଁ। ସେ କହିଛନ୍ତି, ଲୋକମାନେ କରୁଥିବା ସବୁଠାରୁ ବଡ଼ ଭୁଲ୍ ହେଉଛି ସେମାନେ ବୋମା ବିସ୍ଫୋରଣ କୁ ବୁଝିପାରୁନାହାଁନ୍ତି । ଆତ୍ମଘାତୀ ବିସ୍ଫୋରଣର ପ୍ରକୃତ ଧାରଣାକୁ ବୁଝିବାରେ କିଛି ଲୋକ ବିଫଳ ହେଉଛନ୍ତି । ସେ ଆହୁରି କହିଛନ୍ତି ଯେ ଆତ୍ମଘାତୀ ଆକ୍ରମଣର ମୁଖ୍ୟ ସମସ୍ୟା ହେଉଛି ଏହା ବିଷୟରେ ନବୁଝିବା । ଯେତେବେଳେ ଜଣେ ବ୍ୟକ୍ତି ନିଶ୍ଚିତ ହୋଇଯାଏ ଯେ ସେ ଏକ ନିର୍ଦ୍ଦିଷ୍ଟ ସମୟରେ ଏବଂ ସ୍ଥାନରେ ମରିବେ, ସେ ଏକ ବିପଦପୂର୍ଣ୍ଣ ମାନସିକ ସ୍ଥିତିରେ ପ୍ରବେଶ କରନ୍ତି ଏବଂ ବିଶ୍ୱାସ କରିବାକୁ ଆରମ୍ଭ କରନ୍ତି ଯେ ମୃତ୍ୟୁ ହିଁ ତାଙ୍କର ଏକମାତ୍ର ଲକ୍ଷ୍ୟସ୍ଥଳ।
ଭିଡିଓର ଶେଷରେ ଉମର ନବି ଏକ ବିରୋଧାଭାସୀ ବକ୍ତବ୍ୟ ଦେଇଛନ୍ତି । ଏପରି ଚିନ୍ତାଧାରା କୌଣସି ଗଣତାନ୍ତ୍ରିକ ବା ମାନବିକ ବ୍ୟବସ୍ଥାରେ ଗ୍ରହଣୀୟ ହୋଇପାରିବ ନାହିଁ, କାରଣ ଏହା ଜୀବନ, ସମାଜ ଏବଂ ଆଇନର ମୌଳିକ ନୀତିକୁ ଉଲ୍ଲଂଘନ କରେ। ଏହି ଭିଡିଓ ଆତଙ୍କବାଦୀ ଉମରଙ୍କ ମାନସିକ ପ୍ରବୃତ୍ତି ଏବଂ ବିଚାରଧାରାକୁ ବୁଝିବାରେ ତଦନ୍ତ ଏଜେନ୍ସିଗୁଡ଼ିକ ପାଇଁ ସହାୟକ ହେବ। କେଉଁ କାରଣ ଉମରଙ୍କୁ ଏତେ ବଡ଼ ଆକ୍ରମଣ କରିବାକୁ ପ୍ରେରଣା ଦେଇଥିଲା, ତାହା ଏଜେନ୍ସିଗୁଡ଼ିକ ଜାଣିପାରିବେ ବୋଲି ଆଶା କରାଯାଉଛି। ଏହା ପୂର୍ବରୁ ଆତଙ୍କୀ ପାଣ୍ଠି ସହ ଜଡ଼ିତ ମାମଲାରେ ଇଡି ଅଲ-ଫଲାହ ବିଶ୍ୱବିଦ୍ୟାଳୟ ସହ ଜଡ଼ିତ ୨୫ଟି ସ୍ଥାନରେ ଚଢ଼ାଉ କରିଥିବା ଖବର ରହିଛି।
ଦିଲ୍ଲୀର ଲାଲକିଲ୍ଲା ବିସ୍ଫୋରଣ ଘଟାଇଥିବା ମହମ୍ମଦ ଉମର ନବି ମୂଳତଃ ପୁଲୱାମା ଜିଲ୍ଲାର କୋଇଲ୍ ଗାଁର ବାସିନ୍ଦା ଥିଲେ। ପୁଲିସ ସୂତ୍ର ଅନୁଯାୟୀ, ତାଙ୍କର ଆରମ୍ଭରୁ ହିଁ ଭାରତ ବିରୋଧୀ କାର୍ଯ୍ୟକଳାପରେ ପ୍ରବଳ ଆଗ୍ରହ ଥିଲା। ସେ ଫରିଦାବାଦର ଅଲ-ଫଲାହ ବିଶ୍ୱବିଦ୍ୟାଳୟରେ ଡାକ୍ତର ଭାବେ କାର୍ଯ୍ୟ କରୁଥିଲେ। ଗତ କିଛି ମାସ ମଧ୍ୟରେ ଉମରଙ୍କ ଆଚରଣରେ ପରିବର୍ତ୍ତନ ଦେଖାଯାଇଥିଲା। ଅକ୍ଟୋବର ୩୦ ତାରିଖରେ ସେ ତାଙ୍କ ଡ୍ୟୁଟି ଛାଡି ଦେଇଥିଲେ ଏବଂ ଫରିଦାବାଦ ଓ ଦିଲ୍ଲୀ ମଧ୍ୟରେ ବାରମ୍ବାର ଯାତ୍ରା କରିବା ଆରମ୍ଭ କରିଥିଲେ। ଏହି ସମୟ ମଧ୍ୟରେ, ସେ ପ୍ରାୟତଃ ରାମଲୀଳା ମୈଦାନ ଏବଂ ସୁନହେରୀ ମସଜିଦ୍ ନିକଟସ୍ଥ ମସଜିଦ୍ରେ ରହୁଥିଲେ। ତାଙ୍କର ଏହି ଗତିବିଧି ତଦନ୍ତ ପରିସରଭୁକ୍ତ ହୋଇଛି।