ବିହାର ବିଧାନସଭା ନିର୍ବାଚନର ଫଳାଫଳ ଘୋଷଣା ହେବା ପରେ ଏବେ ନୂଆ ସରକାର କେବେ ଶପଥ ଗ୍ରହଣ କରିବେ ତାହା ଉପରେ ସମସ୍ତଙ୍କ ନଜର ରହିଛି । ଏଠାରେ ଏନଡିଏ ଏକ ବିପୁଳ ସଂଖ୍ୟା ଗରିଷ୍ଠତା ହାସଲ କରିଛି । ନୂତନ ସରକାର ଗଠନ ପ୍ରକ୍ରିୟା ଏବେ ତ୍ୱରାନ୍ୱିତ ହୋଇଛି । ସୂତ୍ର ଅନୁସାରେ ଶପତ ଗ୍ରହଣ ଉତ୍ସବ ଆସନ୍ତା ୧୯ କିମ୍ବା ୨୦ତାରିଖରେ ହେବ । ବିହାର ବିଧାନସଭା କାର୍ଯ୍ୟକାଳ ନଭେମ୍ବର ୨୨ରେ ଶେଷ ହେଉଛି । ତେଣୁ ଏହା ପୂର୍ବରୁ ଏକ ନୂତନ ସରକାର ଗଠନ କରିବାକୁ ପଡିବ । ଶପଥ ଗ୍ରହଣ ଉତ୍ସବ ପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି ।
ବିହାର ବିଧାନସଭା ନିର୍ବାଚନରେ ଏନଡିଏ ସପକ୍ଷରେ ଆଶ୍ଚର୍ଯ୍ୟଜନକ ମତଦାନ ପ୍ରକାଶ ପାଇଥିଲା । ଏଠାରେ ଏନଡିଏ ୨୦୨ ଆସନ ପାଇଥିବା ବେଳେ ମହାମେଣ୍ଟକୁ ମାତ୍ର ୩୫ଟି ଆସନ ମିଳିଛି । ଏନଡିଏରେ ବିଜେପିକୁ ୮୯ଆସନ, ଜେଡିୟୁକୁ ୮୫ଆସନ ଏବଂ ଏଲଜେପି ୧୯ଟି ଆସନରେ ବାଜିମାତ କରିଛନ୍ତି । ସେହିପରି ମହାମେଣ୍ଟରେ ଆରଜେଡିକୁ ୨୫ଆସନ ଏବଂ କଂଗ୍ରେସକୁ ମାତ୍ର ୬ଟି ଆସନ ମିଳିଛି । ଏହାବ୍ୟତୀତ ପ୍ରଥମ କରି ନିର୍ବାଚନ ଲଢିଥିବା ଜନସୁରାଜ ପାର୍ଟି ସମ୍ପୂର୍ଣ୍ଣ ନିଶ୍ଚିହ୍ନ ହୋଇଯାଇଛି ।
ଆଜି ନିର୍ବାଚନ ଆୟୋଗ ବିଧିବଦ୍ଧ ଭାବେ ବିହାରର ରାଜ୍ୟପାଳଙ୍କୁ ବିହାର ନିର୍ବାଚନର ରେଜଲ୍ଟ ନେଇ ସୂଚନା ଦେବେ । ଏହାପରେ ବିଧାନସଭା ନିର୍ବାଚନକୁ ନେଇ ବିହାରରେ ଲାଗୁଥିବା ଆଦର୍ଶ ଆଚରଣ ବିଧି ଶେଷ ହେଇଯିବ । ଏହାପରେ ମିଳିଥିବା ସୂଚନା ଅନୁସାରେ, ମୁଖ୍ୟମନ୍ତ୍ରୀ ନୀତୀଶ କୁମାର ନିଜ କ୍ୟାବିନେଟ୍ ବୈଠକ କରିବେ, ଯେଉଁଠି ୧୭ତମ ବିଧାନସଭାକୁ ଭଙ୍ଗ କରିବାକୁ ପ୍ରସ୍ତାବ ପାରିତ ହେବ । ଏହାପରେ ନୀତୀଶ କୁମାର ରାଜ୍ୟପାଳଙ୍କୁ ଭେଟି ନିଜର ଇସ୍ତଫା ଦେବେ । ଆଉ ନୂଆ ସରକାର ଗଠନ ହେବା ନେଇ ବିଧିବଦ୍ଧ ଭାବେ ପ୍ରକ୍ରିୟା ଆରମ୍ଭ ହେଇଯିବ ।
ନୀତୀଶ କୁମାରଙ୍କ ଇସ୍ତଫା ପରେ ଏନଡିଏର ସବୁ ଦଳକୁ ନେଇ ବୈଠକ ବସିବ । ଏହି ବୈଠକରେ ଏନଡିଏର ବିଧାୟକମାନେ ନିଜର ନେତା ବାଛିବେ । ଏନଡିଏ ବିଧାୟକଙ୍କ ବୈଠକରେ ନେତା ବଛାଯିବା ପରେ, ରାଜ୍ୟପାଳଙ୍କ ପାଖରେ ଏନଡିଏର ନେତା ସରକାର ଗଠନ ନେଇ ଦାବି ଜଣାଇବେ । ଆଉ ତା ପରେ ଶପଥ ଗ୍ରହଣ ସମାରୋହର ତାରିଖ ଆସିବ ବୋଲି କୁହାଯାଉଛି ।
ଚର୍ଚ୍ଚା ଅନୁସାରେ, ବିହାରର ଏହି ଶପଥ ଗ୍ରହଣ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହିତ ବିଜେପି ଶାସିତ ତମାମ ରାଜ୍ୟର ମୁଖ୍ୟମନ୍ତ୍ରୀମାନେ ମଧ୍ୟ ସାମିଲ ହେବେ । ଏଥିପାଇ ଅତିଥିମାନଙ୍କ ଏକ ଲମ୍ବା ଲିଷ୍ଟ ପ୍ରସ୍ତୁତ କରାଯାଉଛି ।