କାଠମାଣ୍ଡୁ: ନେପାଳର ରସୁୱା ଅଞ୍ଚଳରେ ବୁଧବାର ଘଟିଥିବା ପ୍ରଳୟଙ୍କରୀ ଆକସ୍ମିକ ବନ୍ୟା ଓ ଭୂସ୍ଖଳନ ଭୟାବହ ରୂପ ଧାରଣ କରିଛି। ଏହି ବିପର୍ଯ୍ୟୟରେ ଅତିକମରେ ୧୬୦ ଜଣଙ୍କ ମୃତ୍ୟୁ ଘଟିଥିବା ପ୍ରାଥମିକ ଆକଳନ କରାଯାଇଥିବା ବେଳେ ହଜାର ହଜାର ଲୋକ ନିଖୋଜ ଥିବା ଜଣାପଡ଼ିଛି। ନିଖୋଜଙ୍କ ମଧ୍ୟରେ ପ୍ରାୟ ୩୦୦ ଭାରତୀୟ ନାଗରିକ ରହିଥିବା ନେପାଳ ବୈଦେଶିକ ମନ୍ତ୍ରୀ ଶିଶିର ଖାନାଲ୍ ସୂଚନା ଦେଇଛନ୍ତି।
ମାତ୍ର କିଛି ଘଣ୍ଟା ମଧ୍ୟରେ ବନ୍ୟାର ପ୍ରଖର ସ୍ରୋତ ଅନେକ ଅଞ୍ଚଳରେ ବ୍ୟାପକ କ୍ଷୟକ୍ଷତି ଘଟାଇଛି। ଅନେକ ଘରଦ୍ୱାର ଓ ଭିତ୍ତିଭୂମି ଧ୍ୱଂସ ହୋଇଥିବା ବେଳେ ହଜାର ହଜାର ପରିବାର ବାସଗୃହ ହରାଇଛନ୍ତି। ଯୋଗାଯୋଗ ଓ ପରିବହନ ବ୍ୟବସ୍ଥା ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି।
ମାନସରୋବର ଯାତ୍ରୀଙ୍କୁ ନେଇ ବଢ଼ିଲା ଚିନ୍ତା
ରସୁୱା ଅଞ୍ଚଳ ଦେଇ ମାନସରୋବର ଯାତ୍ରା ପାଇଁ ବ୍ୟବହୃତ ମୁଖ୍ୟ ମାର୍ଗ ପ୍ରଭାବିତ ହୋଇଥିବାରୁ ନିଖୋଜ ଭାରତୀୟଙ୍କ ମଧ୍ୟରେ ବହୁ ସଂଖ୍ୟକ ଶ୍ରଦ୍ଧାଳୁ ଥିବା ଆଶଙ୍କା କରାଯାଉଛି। ସେମାନଙ୍କ ସହ ଯୋଗାଯୋଗ ସ୍ଥାପନ ଓ ଉଦ୍ଧାର ପାଇଁ ନେପାଳ ସରକାର ନିରନ୍ତର ପ୍ରୟାସ ଚଳାଇଛନ୍ତି। କେବଳ ଭାରତୀୟ ନୁହେଁ, ବିଭିନ୍ନ ଦେଶର ପ୍ରାୟ ୫୦୦ ଜଣ ବିଦେଶୀ ନାଗରିକ ମଧ୍ୟ ବର୍ତ୍ତମାନ ଯୋଗାଯୋଗ ବିଚ୍ଛିନ୍ନ ଅବସ୍ଥାରେ ଥିବା ଜଣାପଡ଼ିଛି। ବିଦେଶୀ ନାଗରିକଙ୍କ ସୁରକ୍ଷାକୁ ମଧ୍ୟ ନେପାଳ ସରକାର ସମାନ ଗୁରୁତ୍ୱ ଦେଉଥିବା ଶିଶିର ଖାନାଲ୍ କହିଛନ୍ତି।
ଦୂତାବାସ ସହ ଯୋଗାଯୋଗ
ନିଖୋଜ ବିଦେଶୀ ନାଗରିକଙ୍କ ସମ୍ପର୍କରେ ସୂଚନା ସଂଗ୍ରହ ପାଇଁ ନେପାଳ ସରକାର ବିଭିନ୍ନ ଦେଶର ଦୂତାବାସ ସହ ନିୟମିତ ଯୋଗାଯୋଗ ରଖିଛନ୍ତି। ଉଦ୍ଧାର ଓ ରିଲିଫ୍ କାର୍ଯ୍ୟକୁ ତ୍ୱରାନ୍ୱିତ କରିବା ସହ ନିଖୋଜଙ୍କ ସନ୍ଧାନକୁ ସର୍ବାଧିକ ପ୍ରାଥମିକତା ଦିଆଯାଉଛି।
ଏହି ଦୁର୍ଦ୍ଦିନରେ ଭାରତ ସରକାରଙ୍କ ପକ୍ଷରୁ ମିଳିଥିବା ତୁରନ୍ତ ରିଲିଫ୍ ଓ ସହାୟତା ପାଇଁ ନେପାଳ ବୈଦେଶିକ ମନ୍ତ୍ରୀ ନୂଆଦିଲ୍ଲୀକୁ କୃତଜ୍ଞତା ଜଣାଇଛନ୍ତି। ଉଭୟ ଦେଶର ସମନ୍ୱିତ ପ୍ରୟାସ ମାଧ୍ୟମରେ ନିଖୋଜ ଭାରତୀୟଙ୍କ ସମ୍ପର୍କରେ ଶୀଘ୍ର ସୂଚନା ମିଳିବ ବୋଲି ଆଶା କରାଯାଉଛି।
ପର୍ଯ୍ୟଟନକୁ ଜାରି ରଖିବାକୁ ଆହ୍ୱାନ
ବନ୍ୟାରେ ବ୍ୟାପକ କ୍ଷୟକ୍ଷତି ସତ୍ତ୍ୱେ ପୋଖରା ଓ ଏଭରେଷ୍ଟ ଅଞ୍ଚଳ ସମେତ ନେପାଳର ଅଧିକାଂଶ ପ୍ରମୁଖ ପର୍ଯ୍ୟଟନ ସ୍ଥଳୀ ସୁରକ୍ଷିତ ଥିବା ନେପାଳ ସରକାର ପକ୍ଷରୁ କୁହାଯାଇଛି। ଦେଶର ପୁନର୍ଗଠନ ଓ ଅର୍ଥନୀତିକୁ ସ୍ୱାଭାବିକ କରିବାରେ ସହଯୋଗ କରିବା ପାଇଁ ବିଶ୍ୱ ସମୁଦାୟ ନେପାଳ ସହ ଠିଆ ହେବାକୁ ଶିଶିର ଖାନାଲ୍ ଆହ୍ୱାନ ଜଣାଇଛନ୍ତି।
ବିପର୍ଯ୍ୟୟ ପରେ ଉଦ୍ଧାର, ରିଲିଫ୍ ଓ ପୁନର୍ବାସ କାର୍ଯ୍ୟ ଏବେ ନେପାଳ ସରକାରଙ୍କ ପାଇଁ ସବୁଠାରୁ ବଡ଼ ଚ୍ୟାଲେଞ୍ଜ। ନିଖୋଜ ଲୋକଙ୍କ ସନ୍ଧାନ ଓ ପ୍ରଭାବିତ ପରିବାରଗୁଡ଼ିକୁ ତୁରନ୍ତ ସହାୟତା ଯୋଗାଇବା ଉପରେ ଉଦ୍ଧାରକାରୀ ଦଳଗୁଡ଼ିକ ଗୁରୁତ୍ୱ ଦେଉଛନ୍ତି।