ମ୍ୟାମାରରେ ଜାରି ରହିଛି ମୃତ୍ୟୁର ତାଣ୍ଡବ – ବର୍ତ୍ତମାନ ସୁଦ୍ଧା ୧୭୦୦ ଜଣଙ୍କ ମୃତଦେହ ଉଦ୍ଧାର

ମ୍ୟାମାରରେ ଜାରି ରହିଛି ମୃତ୍ୟୁର ତାଣ୍ଡବ । ଆଜି ବି ବାହାରୁଛି ଭଗ୍ନାବଶେଷ ତଳୁ ମୃତଦହ । ସରକାରୀ ତଥ୍ୟ ଅନୁସାରେ ବର୍ତ୍ତମାନ ସୁଦ୍ଧା ୧୭୦୦ ଜଣଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ୩୪୦୦ ଜଣ ଆହତ ଅଛନ୍ତି । ଏବଂ ୩୦୦ର ଅଧିକ ଲୋକ ଏବେବି ନିଖୋଜ ଅଛନ୍ତି । ଯେଉଁମାନଙ୍କୁ ଖୋଜା ଚାଲିଛି ।

ଭୂକମ୍ପ ଝଟକାରେ ଛାରଖାର ହୋଇଯାଇଛି ମ୍ୟାମାର । ବଢ଼ି ଚାଲିଛି ମୃତ୍ୟୁ ସଂଖ୍ୟା । ଧ୍ବଂସାବଶେଷ ତଳୁ ଏବେବି ବାହାରୁଛି ମୃତଦେହ । ପ୍ରକୃତିର କୋପ ଆଗରେ ମଣିଷ ଯେ କେତେ ଅସହାୟ, ଆଜି ତାହା ବୁଝି ପାରିଛନ୍ତି ବିଶ୍ବବାସୀ । କିନ୍ତୁ ଧ୍ବଂସଳୀଳା ମଧ୍ୟରେ ଏଭଳି କିଛି ଚିତ୍ର ସାମ୍ନାକୁ ଆସିଛି ଯାହା ସମସ୍ତଙ୍କ ମନରେ ସାହସ ଭରିଛି । ଜୀବନ ମୃତ୍ୟୁ ସଂଗ୍ରାମରେ ବାଜି ମାରିଛି ଜୀବନ । ମୃତ୍ୟୁକୁ ପରାସ୍ତ କରି ଜୀବନ ଫେରିପାଇଛନ୍ତି ଦୁଇ ଶିଶୁ । ପ୍ରଥମରେ ଧ୍ବଂସାବଶେଷ ତଳୁ ଜଣେ ନବଜାତକ ଶିଶୁକନ୍ୟାକୁ ଉଦ୍ଧାର କରାଯାଇଛି । ଭୂକମ୍ପ ଝଟକା ପରେ ଜଣେ ମହିଳା ଜଣକ ଶିଶୁକୁ ଜନ୍ମ ଦେଇଥିଲେ । କିନ୍ତୁ ଘର ଭାଙ୍ଗି ପଡ଼ିବା ଯୋଗୁଁ କାନ୍ଥ ତଳେ ଚାପି ହୋଇ ତାଙ୍କର ମୃତ୍ୟୁ ହୋଇଛି । କିନ୍ତୁ କଥାରେ ଅଛି ‘ରଖିଲେ ହରି, ମାରିବ କିଏ’।

ଯେଉଁ ଉକ୍ତି ପୁଣି ଥରେ ସତ ପ୍ରମାଣିତ ହୋଇଛି । କାନ୍ଥ ତଳେ ଚାପି ହୋଇ ମଧ୍ୟ ଶିଶୁ ଜଣକ ସୁରକ୍ଷିତ ରହିଛି । ଶିଶୁର କାନ୍ଦ ଶୁଣିବା ପରେ ରେସକ୍ୟୁ ଟିମ୍ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଛି । ତେବେ ଏହି ଶିଶୁକନ୍ୟା ହିଁ ପରିବାରର ଏକମାତ୍ର ବ୍ୟକ୍ତି ଯିଏ କି ଭୂମ୍ପକ ପରେ ଜୀବିତ ରହିଛି । ସେପଟେ ଆଉ ଏକ ଚିତ୍ର ସାମ୍ନାକୁ ଆସିଛି ଯେଉଁଥିରେ ଜଣେ ମାଆ ଓ ଶିଶୁ କାନ୍ଥ ତଳେ ଚାପି ହୋଇ ରହିଛନ୍ତି । ମହିଳାଙ୍କ ଗୋଡ଼ ଉପରେ କାନ୍ଥ ପଡ଼ି ଯାଇଥିବାରୁ ତାଙ୍କୁ ଉଦ୍ଧାର କରିବାକୁ ଉଦ୍ୟମ କରାଯାଉଛି । କିନ୍ତୁ ମାଆ କୋଳରେ ସୁରକ୍ଷିତ ରହିଛି ଶିଶୁ । ଦୀର୍ଘ ସମୟ ପର୍ୟ୍ୟନ୍ତ ମହିଳା ଜଣକ ଚାପି ହୋଇ ରହିଥିବା ବେଳେ ଶିଶୁ ମଧ୍ୟ ମାଆ ଉପରେ ଶୋଇ ରହିଛି । ତେବେ ଭଗବାନଙ୍କ ଆଶୀର୍ବାଦ ଯୋଗୁଁ ପ୍ରଳୟ ପରେ ବି ଜୀବନ ଫେରିପାରିଛନ୍ତି ମହିଳା ଓ ଶିଶୁ ।