ମଣିପୁରରୁ ହଟିଲା ରାଷ୍ଟ୍ରପତି ଶାସନ,ଆଜି ସନ୍ଧ୍ୟାରେ ନୂତନ ସରକାରଙ୍କ ଶପଥ  ଗ୍ରହଣ ସମାରୋହ ଅନୁଷ୍ଠିତ ହେବ

ମଣିପୁରରୁ ହଟିଲା ରାଷ୍ଟ୍ରପତି ଶାସନ। ମଣିପୁରରେ ୟୁମନାମ ସରକାର ଗଠନ ପାଇଁ ଫିଟିଲା ବାଟ। ଆଜି ସନ୍ଧ୍ୟାରେ ନୂତନ ସରକାରଙ୍କ ଶପଥ  ଗ୍ରହଣ ସମାରୋହ ଅନୁଷ୍ଠିତ ହେବ। ସନ୍ଧ୍ୟା ୬ଟାରେ ବିଜେପି ବିଧାୟକ ୟୁମନାମ ଖେମଚାନ୍ଦ ସିଂହ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ।ମଣିପୁରରେ ମେ’ ମାସ ୩ତାରିଖ ୨୦୨୩ରେ ହିଂସା ଆରମ୍ଭ ହୋଇଥିଲା, ଯେତେବେଳେ ଚୁରାଚାନ୍ଦପୁରରେ କୁକି ଓ ମୈତେଇ ସମ୍ପ୍ରଦାୟର ସଦସ୍ୟଙ୍କ ମଧ୍ୟରେ ସଂଘର୍ଷ ଦେଖିବାକୁ ମିଳିଥିଲା। ସେବେଠାରୁ ମଣିପୁରରେ ହିଂସା ଜାରି ରହିଛି। ଏହି ହିଂସା ମଧ୍ୟରେ, ଗତ ବର୍ଷ ମଣିପୁରର ତତ୍କାଳୀନ ମୁଖ୍ୟମନ୍ତ୍ରୀ ବୀରେନ ସିଂହ ଇସ୍ତଫା ଦେଇଥିଲେ। ଏହା ପରେ, ଫେବୃଆରୀ ୧୨ ତାରିଖରେ ରାଷ୍ଟ୍ରପତି ଶାସନ ଲାଗୁ କରାଯାଇଥିଲା। ବର୍ତ୍ତମାନ, ପ୍ରାୟ ଗୋଟିଏ ବର୍ଷ ପରେ, ରାଷ୍ଟ୍ରପତି ଶାସନ ପ୍ରତ୍ୟାହାର କରାଯାଇଛି। ରାଷ୍ଟ୍ରପତି ଶାସନ ପ୍ରତ୍ୟାହାର ପରେ, ମଣିପୁରରେ ଖୁବ୍ ଶୀଘ୍ର ଏକ ନୂଆ ସରକାର ଗଠନ ହେବ। ବିଜେପିର ୟୁମନାମ ଖେମଚାନ୍ଦ ସିଂହ ମୁଖ୍ୟମନ୍ତ୍ରୀ ଭାବରେ ଶପଥ ନେବେ।ପୂର୍ବରୁ, ୟୁମନାମ ଖେମଚାନ୍ଦ ସିଂହଙ୍କ ନେତୃତ୍ୱରେ ଏନଡିଏ ବିଧାୟକମାନେ ଇମ୍ଫାଲରେ ପହଞ୍ଚି ରାଜ୍ୟପାଳ ଅଜୟ କୁମାର ଭଲ୍ଲାଙ୍କୁ ସରକାର ଗଠନ ପାଇଁ ସେମାନଙ୍କର ଦାବି ଉପସ୍ଥାପନ କରିଥିଲେ। ବିଧାୟକ ଦଳ ବିମାନବନ୍ଦରରୁ ସିଧାସଳଖ ଲୋକଭବନକୁ ଯାଇଥିଲେ। ସେମାନଙ୍କ ସହିତ ମଣିପୁର ପାଇଁ ବିଜେପି ନିର୍ବାଚନ ପର୍ଯ୍ୟବେକ୍ଷକ ତରୁଣ ଚୁଗ୍, ବିଜେପି ଉତ୍ତର-ପୂର୍ବ ପ୍ରଭାରୀ ସମ୍ବିତ ପାତ୍ର ଏବଂ ରାଜ୍ୟ ସଭାପତି ଏ. ଶାରଦା ଦେବୀ ମଧ୍ୟ ଥିଲେ। ନୂଆ ସରକାରଙ୍କ ଶପଥ ଗ୍ରହଣ ସମାରୋହ ଆଜି ସନ୍ଧ୍ୟା ୬ଟାରେ ଇମ୍ଫାଲର ଲୋକଭବନରେ ଅନୁଷ୍ଠିତ ହେବ।