ହିମାଚଳ ପ୍ରଦେଶର ନୂଆ ମୁଖ୍ୟମନ୍ତ୍ରୀ ହେବେ ସୁଖଓ୍ବିନ୍ଦର ସିଂ ସୁଖୁ

ସିମଲା : ସୁଖଓ୍ବିନ୍ଦର ସିଂ ସୁଖୁଙ୍କୁ ହିମାଚଳ ପ୍ରଦେଶର ନୂଆ ମୁଖ୍ୟମନ୍ତ୍ରୀ ଚୟନ କରିଛନ୍ତି କଂଗ୍ରେସ ହାଇକମାଣ୍ଡ । ସେ ହେବେ ହିମାଚଳ ପ୍ରଦେଶର ୧୫ ତମ ମୁଖ୍ୟମନ୍ତ୍ରୀ । ଶନିବାର ସଂଧ୍ୟାରେ ବସିବାକୁଥିବା କଂଗ୍ରେସ ବିଧାୟକ ଦଳର ବୈଠକରେ ତାଙ୍କ ନାମରେ ମୋହର ମରାଯିବ । ନିର୍ବାଚନ ଫଳାଫଳ ଘୋଷଣା ପରେ ମୁଖ୍ୟମନ୍ତ୍ରୀ କିଏ ହେବ ତାକୁ ନେଇ ହିମାଚଳ ପ୍ରଦେଶରେ ରାଜନୀତି ସରଗରମ ରହିଛି । ଏହା ପରେ ସୁଖୁଙ୍କ ନାଁ ଆନୁଷ୍ଠାନିକ ଭାବେ ଘୋଷଣା ହେବ । କଂଗ୍ରେସ ନେତୃତ୍ବ ପ୍ରତିଭା ସିଂଙ୍କୁ ବୁଝାଇବା ପରେ ସେ ମୁଖ୍ୟମନ୍ତ୍ରୀ ଦୌଡ଼ରୁ ଓହରିଯାଇଥିବା ଜଣାଯାଇଛି । ତେବେ ପ୍ରତିଭା ସିଂଙ୍କ ସମର୍ଥକମାନେ ଏଥିରେ ଖୁସି ନାହାଁନ୍ତି । ଆଗାମୀ ଦିନରେ ଦଳରେ କନ୍ଦଳ ହେବ ବୋଲି କିଛି ସମର୍ଥକ ଖୋଲାଖୋଲି ଧମକ ଦେଇଛନ୍ତି । ସୁଖୁଙ୍କ ପଛରେ ସର୍ବାଧିକ ବିଧାୟକଙ୍କ ସମର୍ଥନ ଥିବା କୁହାଯାଉଛି । ତାଙ୍କ ନାମ ଘୋଷଣା ପରେ ତାଙ୍କ ସମର୍ଥକମାନେ ରାସ୍ତାକୁ ଓହ୍ଲାଇ ଉତ୍ସବ ମନାଇଛନ୍ତି । ତେବେ ଏହି ଉତ୍ସବରୁ ପ୍ରତିଭା ସିଂଙ୍କ ସମର୍ଥକ ବିଧାୟକ ମାନେ ଦୂରେଇ ରହିଥିବା କୁହାଯାଉଛି ।