ଚମକାଇଲା ଗବେଷକଙ୍କ ତଥ୍ୟ; ଗୋଟିଏ ନୁହେଁ, କାଳିଆର ଅଛି ଆଉ ଦୁଇଟି ରତ୍ନ ଭଣ୍ତାର

କେଉଁ ତଥ୍ୟ ଆଧାରରେ ହେବ ଜଗନ୍ନାଥ ମହାପ୍ରଭୁଙ୍କ ରତ୍ନ ଅଳଙ୍କାର ଗଣତି । ୧୯୭୮ ମସିହାର ତାଲିକାକୁ ଗୁରୁତ୍ୱ ଦିଆଯିବ ନା ପୁରୁଣା ତଥ୍ୟ ଉଖାରିବେ ରାଜ୍ୟ ସରକାର ଗଢ଼ିଥିବା ତଦାରଖ କମିଟି । ତେଣେ ବରିଷ୍ଠ ସେବକଙ୍କ ଦାବି କମିଟିରେ ଦେଉଳକରଣ ଓ ତଢଉ କରଣଙ୍କୁ ବି ସାମିଲ କରାଯାଉ । ଆଉ ଏସବୁ ଭିତରେ ଶ୍ରୀମନ୍ଦିର ଗର୍ଭଗୃହ ତଳେ ଆହୁରି ୨ଟି ରତ୍ନଭଣ୍ଡାର ଥିବା ଓ ଏହାକୁ ଶ୍ରୀମନ୍ଦିର ଗବେଷକ ବି ସମର୍ଥନ କରିବା, ସମସ୍ତଙ୍କୁ ଚମକାଇ ଦେଇଛି ।

ଶ୍ରୀମନ୍ଦିର ଗର୍ଭଗୃହ ତଳେ ଅଛି ଆହୁରି ୨ଟି ରତ୍ନଭଣ୍ଡାର । ମହାପ୍ରଭୁଙ୍କ ଭଣ୍ଡାର ଗୃହକୁ ଗୋଟିଏ ନୁହେଁ, ଅଛି ଦୁଇ ଦୁଇଟି ପ୍ରବେଶ ଦ୍ୱାର । ଗୋଟିଏ ସେବାୟତମାନେ ବ୍ୟବହାର କରୁଛନ୍ତି ତ ଅନ୍ୟଟି ପୁରା ବନ୍ଦ ରହିଛି । ଘଣ୍ଟି ଦ୍ୱାର ପାଖରେ ଏ ପ୍ରବେଶ ପଥରେ ଗୁପ୍ତରେ ଗଜପତି ମହାରାଜାମାନେ ଯାଆସ କରୁଥିଲେ, ଯାହାକି ୨୦୧୮ ମସିହାରେ ରତ୍ନଭଣ୍ଡାର ଯାଞ୍ଚ କମିଟିଙ୍କୁ ଦୃଶ୍ୟମାନ ହୋଇଥିଲା ।

ଏଭଳି ତଥ୍ୟ ଦେଇ ଚମକାଇ ଦେଇଛନ୍ତି ଖୋଦ୍ ସୁଭଦ୍ରାଙ୍କ ବାଡ଼ଗ୍ରାହୀ ରାମଚନ୍ଦ୍ର ଦାସମହାପାତ୍ର । ସେ ଆହୁରି ମଧ୍ୟ କହିଛନ୍ତି, ୧୯୭୮ ମସିହା ଅଳଙ୍କାର ଗଣତିର ଯେଉଁ ତାଲିକା ଅଛି, ତାଠୁ ଢେର ଗୁଣରେ ଅଧିକ ଅଳଙ୍କାର ଠାକୁରଙ୍କର ଅଛି । ଯେହେତୁ ୧୯୦୫ ମସିହା ରଘୁନାଥ ବେଶ ଅଳଙ୍କାରର ସୂଚନା ୧୯୭୮ ମସିହା ଲିଷ୍ଟରେ ନାହିଁ, ତେଣୁ ଏଭଳି ଭାବନା ସ୍ୱାଭାବିକ ।