ଅଣସର ଏକାଦଶୀ ତିଥିରେ ଖଳି ପ୍ରସାଦ ଶ୍ରୀମନ୍ଦିରକୁ ବିଜେ କରିବ

ଅଣସର ଘରେ ସୁସ୍ଥ ହେଉଛନ୍ତି ମହାପ୍ରଭୁ । ଆଜି ଅଣସର ଏକାଦଶୀ ତିଥିରେ ସୁଧ ସୁଆରଙ୍କ ଘରୁ ଖଳି ପ୍ରସାଦ ଶ୍ରୀମନ୍ଦିରକୁ ବିଜେ କରିବ । ମଧ୍ୟାନ୍ନ ଧୂପ ପରେ ଦଇତାପତି ସେବକଙ୍କ ଦ୍ୱାରା ମହାପ୍ରଭୁଙ୍କୁ ଲାଗି କରିବାର ବିଧି ରହିଛି । ଏହା ପରେ ବାହାର ସର୍ବାଙ୍ଗ ବେଶ କରାଯିବ । ସେପଟେ ଶ୍ରୀବିଗ୍ରହମାନେ ଚକା ଉପରେ ବିଜେ କରିବା ପରେ ପଣା ଭୋଗ ଓ ଚକଟା ଭୋଗ ଦେଇ ସ୍ୱତନ୍ତ୍ର ଭାବେ ଦଶମୂଳ ଲାଗି ହୋଇଛି ।ବିଧି ବିଧାନ ମୁତାବକ ୫ଟି ଛୋଟ ଓ ୫ଟି ବଡ଼ ଗଛର ମୂଳ ତଥା ଚେରରେ ଏହା ପ୍ରସ୍ତୁତ କରାଯାଇଛି । ବେଲ, ଗମ୍ଭାରୀ, ଫଣଫଣା, ଅଗବଥୁ, କୃଷ୍ଣପର୍ଣ୍ଣି, ଶାଳପର୍ଣ୍ଣି, ଅଙ୍କରାନ୍ତି, ନବାଙ୍କୁରୀ, ଗୋଖର, ପାଟେଳୀ ଆଦି ଚେରମୂଳିକୁ ବିଭିନ୍ନ ସ୍ଥାନରୁ ସଂଗ୍ରହ ପରେ ସେସବୁକୁ ମିଶାଇ ଟାଣ ଖରାରେ ଶୁଖାଯାଇଥିଲା । ଶୁଦ୍ଧପୂତ ଭାବେ ରାଜବୈଦ୍ୟ ଏହି ଶୁଖିଲା ଦଶମୂଳକୁ ହେମଦସ୍ତାରେ କୁଟି କରିଆ କନାରେ ଛାଣି ଚୂର୍ଣ୍ଣ ପ୍ରସ୍ତୁତ କରିଥିଲେ ।