ଭୁବନେଶ୍ୱର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଆଜି ଅପରାହ୍ନ ୫ଟାରେ ଲୋକସେବା ଭବନର ତୃତୀୟ ମହଲାରେ ରାଜ୍ୟ ମନ୍ତ୍ରିମଣ୍ଡଳର ୩୯ତମ ବୈଠକ ଅନୁଷ୍ଠିତ ହେବାକୁ ଯାଉଛି। ରାଜ୍ୟର ବିକାଶ ପ୍ରକ୍ରିୟାକୁ ତ୍ୱରାନ୍ୱିତ କରିବା ଏବଂ ‘ବିକଶିତ ଓଡ଼ିଶା-୨୦୩୬’ ଲକ୍ଷ୍ୟ ପୂରଣ ଦିଗରେ ଏହି ବୈଠକରେ କେତେକ ବଡ଼ ନିଷ୍ପତ୍ତି ନିଆଯାଇପାରେ। ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏହି ବୈଠକରେ ପ୍ରାୟ ୯ରୁ ଅଧିକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ଆସିବାକୁ ଅଛି। ବିଶେଷ କରି:
-
ରାଜସ୍ୱ ବିଭାଗ: ରାଜସ୍ୱ କ୍ଷେତ୍ରରେ କେତେକ ବଡ଼ ସଂସ୍କାର ପାଇଁ ପ୍ରସ୍ତାବ ଆସିପାରେ।
-
ବିଦ୍ୟାଳୟ ଓ ଗଣଶିକ୍ଷା: ଶିକ୍ଷା କ୍ଷେତ୍ରରେ ନୂତନ ନୀତି କିମ୍ବା ନିଯୁକ୍ତି ସମ୍ବନ୍ଧୀୟ ନିଷ୍ପତ୍ତି ନିଆଯାଇପାରେ।
-
ନିର୍ମାଣ ଓ ଅର୍ଥ ବିଭାଗ: ଭିତ୍ତିଭୂମି ବିକାଶ ପାଇଁ କେତେକ ବୃହତ ପ୍ରକଳ୍ପର ବ୍ୟୟ ଅଟକଳକୁ ମଞ୍ଜୁରୀ ମିଳିବାର ସମ୍ଭାବନା ରହିଛି।
ରାଜ୍ୟ ସରକାର ଓଡ଼ିଶାକୁ ୨୦୩୬ ସୁଦ୍ଧା ଏକ ବିକଶିତ ରାଜ୍ୟରେ ପରିଣତ କରିବାକୁ ଲକ୍ଷ୍ୟ ରଖିଛନ୍ତି। ଏହି ପରିପ୍ରେକ୍ଷୀରେ ୩୬ଟି ଲୋକାଭିମୁଖୀ କାର୍ଯ୍ୟକ୍ରମ ହାତକୁ ନିଆଯିବ। ଆସନ୍ତାକାଲି (ଗୁରୁବାର) ମଧ୍ୟ ବାଣିଜ୍ୟ, ପରିବହନ, ଶିଳ୍ପ ଓ ଶକ୍ତି ବିଭାଗର ସଚିବମାନଙ୍କୁ ନେଇ ଏକ ସମନ୍ୱୟ ବୈଠକ ହେବାକୁ ରହିଛି। ଆଜିର କ୍ୟାବିନେଟ୍ ବୈଠକରେ ସରକାର କେଉଁ ସବୁ ଉପହାର ରାଜ୍ୟବାସୀଙ୍କୁ ଦେଉଛନ୍ତି, ତାହା ଉପରେ ସମସ୍ତଙ୍କ ନଜର ରହିଛି।