ଆଇପିଏଲ୍‌ ଖେଳିବେ କି ନାହିଁ ପନ୍ତ

ଋଷଭ ପନ୍ତ ଏକ ବର୍ଷରୁ ଅଧିକ ସମୟ ଧରି କ୍ରିକେଟରୁ ଦୂରରେ ଅଛନ୍ତି। ଏମିତିରେ ସମସ୍ତେ ତାଙ୍କ ପ୍ରତ୍ୟାବର୍ତ୍ତନକୁ ଅପେକ୍ଷା କରିଛନ୍ତି। ସୁସ୍ଥ ହେବା ପରେ ପ୍ରତ୍ୟାବର୍ତ୍ତନ ପାଇଁ ପନ୍ତ ମଧ୍ୟ କଠିନ ପରିଶ୍ରମ କରୁଛନ୍ତି। ତେବେ ସେ ଏଥର ଆଇପିଏଲ୍‌୨୦୨୪ରେ ଖେଳିବେ ବୋଲି ଆଶା କରାଯାଉଛି। ଏନେଇ ମାର୍ଚ୍ଚ ୫ ତାରିଖରେ ସ୍ଥିତି ସ୍ପଷ୍ଟ ହୋଇଯିବ।ପନ୍ତ ଆଇପିଏଲରେ ଦିଲ୍ଲୀ କ୍ୟାପିଟାଲ୍ସ ପାଇଁ ଖେଳନ୍ତି। ଦିଲ୍ଲୀ ଫ୍ରାଞ୍ଚାଇଜ୍‌ର କ୍ରିକେଟ ନିର୍ଦ୍ଦେଶକ ସୌରଭ ଗାଙ୍ଗୁଲି ପନ୍ତଙ୍କ ବିଷୟରେ ଏକ ବଡ ଅପ୍‌ଡେଟ୍‌ ଦେଇଛନ୍ତି। ଗାଙ୍ଗୁଲି କହିଛନ୍ତି ଯେ ମାର୍ଚ୍ଚ ୫ରେ ଜାତୀୟ କ୍ରିକେଟ ଏକାଡେମୀରେ ପନ୍ତଙ୍କ ଫିଟନେସ ପରୀକ୍ଷା ହେବ ଯେଉଁଥିରେ ତାଙ୍କୁ ଫିଟ୍‌ ଘୋଷଣା କରାଯିବ। ଏହା ପରେ ମଧ୍ୟ ଆମେ ଅଧିନାୟକତ୍ୱ ପାଇଁ ବିକଳ୍ପଗୁଡ଼ିକ ବିଷୟରେ ବିଚାର କରିବୁ । କାରଣ ଫ୍ରାଞ୍ଚାଇଜ ତାଙ୍କୁ ନେଇ ବହୁତ ଯତ୍ନଶୀଳ ପଦକ୍ଷେପ ନେଉଛି କାରଣ ତାଙ୍କ କ୍ୟାରିଅର୍‌ ବହୁତ ଲମ୍ବା ଅଟେ। ଆମେ ତାଙ୍କୁ ଉତ୍ସାହକୁ ରୋକିବାକୁ ଚାହୁଁନାହୁଁ। ହେଲେ ସେ କିପରି ପ୍ରତିକ୍ରିୟା କରନ୍ତି ତାହା ଉପରେ ଅନେକ କିଛି ନିର୍ଭର କରେ। ତେବେ ପନ୍ତ ଏନସିଏରୁ କ୍ଲିୟରାନ୍ସ ପାଇବା ପରେ ଫ୍ରାଞ୍ଚାଇଜ କ୍ୟାମ୍ପରେ ଯୋଡି ହେବେ ବୋଲି ଗାଙ୍ଗୁଲି କହିଛନ୍ତି।ଭାରତର ଯୁବ ଉଇକେଟ କିପର-ବ୍ୟାଟ୍ସମ୍ୟାନ ପନ୍ତ ୩୦ ଡିସେମ୍ବର ୨୦୨୨ରେ ଏକ କାର ଦୁର୍ଘଟଣାର ଶିକାର ହୋଇଥିଲେ। ଏଥିରେ ସେ ଗୁରୁତର ଆହତ ହୋଇଥିଲେ। ତାଙ୍କର ଏକ ଲିଗାମେଣ୍ଟ ଆଘାତ ଲାଗିଥିଲା ଯେଉଁଥିପାଇଁ ସେ ଅସ୍ତ୍ରୋପଚାର କରିଥିଲେ। ପନ୍ତ ବର୍ତ୍ତମାନ ପ୍ରତ୍ୟାବର୍ତ୍ତନ କରିବାକୁ ଯାଉଛନ୍ତି ଏବଂ ମାର୍ଚ୍ଚ ୫ ରେ, ସେ ସମ୍ପୂର୍ଣ୍ଣ ଫିଟ ଅଛନ୍ତି କି ନାହିଁ ତାଙ୍କ ବିଷୟରେ ଖବର ଆସିପାରେ।