ପରାଜୟ ଆଶଙ୍କାରେ ଭାରତ
ବରସାପରା ଷ୍ଟାଡିୟମରେ ଖେଳା ଯାଉଥିବା ଦ୍ଵିତୀୟ ଟେଷ୍ଟରେ ବ୍ୟାକଫୁଟରେ ଟିମ୍ ଇଣ୍ଡିଆ। ମ୍ୟାଚରେ ସଂପୂର୍ଣ୍ଣ ପ୍ରାଧ୍ୟାନ୍ୟ ବିସ୍ତାର କରିଛି ଭ୍ରମଣକାରୀ ଦକ୍ଷିଣ ଆଫ୍ରିକା। ଦକ୍ଷିଣ ଆଫ୍ରିକାର ୪୮୯ ରନ ଜବାବରେ ଭାରତୀୟ ଦଳ ପ୍ରଥମ ଇନିଂସରେ ୨୦୧ ରନରେ ଅଲଆଉଟ୍ ହୋଇଛି। ୨୮୮ ରନ ଆଗୁଆ ରହିଥିବା ଦକ୍ଷିଣ ଆଫ୍ରିକା ଫଲୋଅନ ନ ଦେଇ ଦ୍ଵିତୀୟ ଇନିଂସ ବ୍ୟାଟିଂ ଆରମ୍ଭ କରିଛି। ତୃତୀୟ ଦିନ ଖେଳ ଶେଷ ସୁଦ୍ଧା ଦଳ କୌଣସି ଓ୍ଵିକେଟ୍ ନ ହରାଇ ୨୬ ରନ କରିଛି। ରିୟାନ ରିକଲଟନ ୧୩ ରନ ଓ ଆଡନ ମାରକ୍ରମ ୧୨ ରନ କରି ଅପରାଜିତ ଅଛନ୍ତି। ଦଳ ଭାରତଠୁ ୩୧୪ ରନରେ ଅଗ୍ରଣୀ ହାସଲ କରିଛି। ମ୍ୟାଚ୍ ଆହୁରି ଦୁଇ ଦିନ ବାକି ଥିବା ବେଳେ ଦକ୍ଷିଣ ଆଫ୍ରିକାର ପଲ୍ଲା ଭାରି ରହିଛି।
ଭାରତ ଦ୍ଵିତୀୟ ଦିନର ଅସମାପ୍ତ ଖେଳ ୯/୦ରେ ଖେଳ ଆରମ୍ଭ କରିଥିଲା। ଯଶସ୍ଵୀ ଜୟସ୍ଵାଲ ଓ କେଏଲ ରାହୁଲ ଭଲ ଆରମ୍ଭ ଦେଇଥିଲେ। ଉଭୟ ୬୫ ରନ ଯୋଡ଼ିଥିଲେ। ରାହୁଲ ୨୨ ରନ କରି ଆଉଟ୍ ହୋଇଥିଲେ। ଜୟସ୍ଵାଲ ୫୮ ରନର ଅର୍ଦ୍ଧଶତକୀୟ ଇନିଂସ ଖେଳି ପାଭିଲିୟନ ଫେରିଥିଲେ। ଏହା ପରେ ଭାରତୀୟ ଦଳ ଦକ୍ଷିଣ ଆଫ୍ରିକା ବୋଲରଙ୍କ ମୁକାବିଲା କରି ପାରି ନ ଥିଲା। ଦଳ ବ୍ୟାଟିଂ ବିପର୍ଯ୍ୟୟ ଭୋଗି ୧୨୨ ରନରେ ୭ ଓ୍ଵିକେଟ୍ ହରାଇଥିଲା। ସାଇ ସୁଦର୍ଶନ(୧୫ ରନ) ମିଳିଥିବା ସୁଯୋଗର ଫାଇଦା ଉଠାଇ ପାରି ନ ଥିଲେ। ଅଧିନାୟକ ଋଷଭ ପନ୍ତ ବଡ଼ ସଟ୍ ଖେଳିବାକୁ ଯାଇ ୭ ରନରେ ଆଉଟ୍ ହୋଇଥିଲେ। ଧ୍ରୁବ ଜୁରେଲ ଖାତା ବି ଖୋଲି ପାରି ନ ଥିଲେ। ନୀତିଶ ରେଡ୍ଡୀ(୧୦ ରନ) ନିରାଶ କରିଥିଲେ।
ଏକଦା ୯୫ ରନରେ ଗୋଟିଏ ଓ୍ଵିକେଟ୍ ହରାଇଥିବା ଭାରତ ୧୭ ରନରେ ୬ ଓ୍ଵିକେଟ୍ ହରାଇଥିଲା। ଫଳରେ ଭାରତ ଫଲୋଅନ ଆଶଙ୍କାରେ ପଡ଼ିଥିଲା। ଏହା ପରେ ଓ୍ଵାଶିଂଟନ ସୁନ୍ଦର ଓ କୁଲଦୀପ ଯାଦବ ସଂଘର୍ଷ କରି କିଛି ସମୟ ପର୍ଯ୍ୟନ୍ତ ଭାରତର ଆଶା ଉଜ୍ଜିବୀତ ରଖିଥିଲେ। ଦୁଇ ବ୍ୟାଟର ଅଷ୍ଟମ ଓ୍ଵିକେଟ୍ ପାଇଁ ୭୨ ରନ ଯୋଡ଼ିଥିଲେ। ସୁନ୍ଦର ୪୮ ରନ କରି ଆଉଟ୍ ହେବା ଭାରତକୁ ବଡ଼ ଝଟକା ଲାଗିଥିଲା। କୁଲଦୀପ ଯାଦବ ୧୯ ରନରେ ଆଉଟ୍ ହେବା ପରେ ଭାରତର ପ୍ରଥମ ଇନିଂସ ୨୦୧ ରନରେ ଅନ୍ତ ଘଟିଥିଲା। ଆଉ ଭ୍ରମଣକାରୀ ଦକ୍ଷିଣ ଆଫ୍ରିକା ଭାରତଠୁ ୨୮୮ ରନରେ ଆଗୁଆ ରହିଛି। ଦ୍ଵିତୀୟ ଇନିଂସରେ କୌଣସି ଓ୍ଵିକେଟ୍ ନ ହରାଇ ଦକ୍ଷିଣ ଆଫ୍ରିକା ୨୬ ରନ କରି ମୋଟ୍ ୩୧୪ ରନର ଅଗ୍ରଣୀ ହାସଲ କରି ସାରିଛି। ବୋଲିଂରେ ଦକ୍ଷିଣ ଆଫ୍ରିକା ପକ୍ଷରୁ ମାର୍କୋ ଜନସେନ ୬ ଓ୍ଵିକେଟ୍ ନେଇଛନ୍ତି। ହାରମରଙ୍କୁ ୩ଟି ଓ୍ଵିକେଟ୍ ମିଳିଛି।