ମୌସୁମୀ ଅଧିବେଶନ ବେଳେ ପାର୍ଲାମେଣ୍ଟ୍‌ରେ ଧାରଣା, ପ୍ଲାକାର୍ଡ ମନା

ନୂଆଦିଲ୍ଲୀ: ମୌସୁମୀ ଅଧିବେଶନ ଚାଲିଥିବା ବେଳେ ଗୃହରେ କୌଣସି ‘ପାମ୍ପ୍‌ଲେଟ୍‌’, ‘ଲିଫ୍‌ଲେଟ୍’ ଏବଂ ‘ପ୍ଲାକାର୍ଡ’ ବଣ୍ଟନ ଉପରେ ନିଷେଧାଜ୍ଞା ଜାରି କରାଯାଇଛି । ଲୋକସଭା ସଚିବାଳୟ ଏନେଇ ନିର୍ଦେଶନାମା ଜାରି କରିଛି। ସଂସଦ ପରିସରରେ ଧାରଣା, ଧର୍ମଘଟ ଏବଂ ଅନଶନ ନିଷେଧକୁ ବ‌ିରୋଧ କରି ବିରୋଧୀମାନେ ପାର୍ଲାମେଣ୍ଟ୍‌ ପରିସରରେ ବିଶୃଙ୍ଖଳା କରିବାରୁ ଶୁକ୍ରବାର ଦିନ ଉପରୋକ୍ତ ଚେତାବନୀ ଜାରି କରାଯାଇଛି। ପାମ୍ପ୍ଲେଟ୍‌, ପ୍ରେସ୍‌ ନୋଟ୍‌, ଲିଫ୍‌ଲେଟ୍‌ ଅଥବା ଛାପା ହୋଇଥିବା ଭଳି କୌଣସି ସାମଗ୍ରୀ ସମ୍ମାନୀୟ ବାଚସ୍ପତିଙ୍କ ଆଗୁଆ ଅନୁମତି ବିନା ଗୃହ ପରିସରରେ ବଣ୍ଟନ କରାଯାଇ ପାରିବ ନାହିଁ। ସଂସଦ ଗୃହ ପରିସରରେ ‘ପ୍ଲାକାର୍ଡ’ ପ୍ରଦର୍ଶନକୁ ମଧ୍ୟ କଡ଼ାକଡ଼ି ନିଷେଧ କରାଯାଇଛି। କଂଗ୍ରେସ ସମେତ ୟୁପିଏ ଦଳ ଏବଂ ଅନ୍ୟାନ୍ୟ ବିରୋଧୀ ଦଳ ଏପରି ଆଦେଶକୁ ସମାଲାେଚନା କରିଛନ୍ତି ।