ଭାଜପା ନେତାଙ୍କୁ ସରକାରରେ ସାମିଲ କରିବେ ନୀତୀଶ,

ନୂଆଦିଲ୍ଲୀ: ଆରଜେଡି ଏବଂ କଂଗ୍ରେସ ସହ ମେଣ୍ଟକୁ ସମାପ୍ତ କରି ବିଜେପି ସହ ପୁଣି ମେଣ୍ଟ କରିବା ଲାଗି ନୀତୀଶ ସ୍ଥିର କରିଛନ୍ତି।  ସେ ଇସ୍ତଫା ଦେଇ ସନ୍ଧ୍ୟା ସୁଦ୍ଧା ଏନ୍‌ଡିଏ ସରକାରର ନେତୃତ୍ବ ନେଇ ନୂଆ ମୁଖ୍ୟମନ୍ତ୍ରୀ ଭ‌ାବେ ଶପଥ ଗ୍ରହଣ କରିବେ। ଆସନ୍ତା ତିନି ମାସ ମଧ୍ୟରେ ହେବାକୁ ଥିବା ଲୋକସଭା ନିର୍ବାଚନ ପାଇଁ ଭାଜପା ଏବଂ ନୀତୀଶ କୁମାରଙ୍କ ଜନତା ଦଳ (ୟୁନାଇଟେଡ୍)  ଭିତରେ ଆସନ ବୁଝାମଣା ମଧ୍ୟ ଶେଷ ହୋଇଛି। ଏଥିସହ ବିହାରର ସମସ୍ତ ଭାଜପା ବିଧାୟକ ନୀତୀଶ କୁମାରଙ୍କୁ ସମର୍ଥନ ପତ୍ର ପ୍ରଦାନ କରିଥିବା ଖବର ମିଳିଛି। ନୀତୀଶ କୁମାର ରାଜ୍ୟରେ ସରକାର ପରିବର୍ତ୍ତନ ନେଇ ସିଧାସଳଖ ଗୃହମନ୍ତ୍ରୀ ଅମିତ ଶାହା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ କଥାବାର୍ତ୍ତା କରୁଛନ୍ତି। ପୁଣିଥରେ ଭାଜପା ଶିବିରକୁ ଫେରିବା ପୂର୍ବରୁ ନୀତୀଶ କୁମାର ରବିବାର ଜେଡି(ୟୁ) ଏବଂ ଭାଜପା ବିଧାୟକଙ୍କ ପାଇଁ ଏକ ଲଞ୍ଚ (ମଧ୍ଯହ୍ନ ଭୋଜନ)ର ଆୟୋଜନ କରୁଛନ୍ତି। ଏହାପରେ ଉଭୟ ପାର୍ଟିର ବିଧାୟକ ରାଜ୍ୟପାଳଙ୍କ ନିକଟକୁ ଯାଇ ସେମାନଙ୍କର ସମର୍ଥନ ପତ୍ର ପ୍ରଦାନ କରିବେ।ସୂତ୍ରରୁ ପ୍ରକାଶ ଯେ ନୀତୀଶ କୁମାର ଆରଜେଡିରୁ ବରଖାସ୍ତ ହୋଇଥିବା ମନ୍ତ୍ରୀଙ୍କୁ ଭାଜପା ନେତାଙ୍କ ଦ୍ୱାରା ବଦଳାଇବାର ସମ୍ଭାବନା ରହିଛି।