ପ୍ରିମକୋର୍ଟରେ ଗର୍ଜିଲେ ମମତା ବାନାର୍ଜୀ ,କେନ୍ଦ୍ର ସରକାରଙ୍କ ସମେତ ନିର୍ବାଚନ କମିଶନଙ୍କ ବିରୋଧରେ ରଖିଲେ ମତ

ସୁପ୍ରିମକୋର୍ଟରେ ଗର୍ଜିଲେ ମମତା ବାନାର୍ଜୀ । କେନ୍ଦ୍ର ସରକାରଙ୍କ ସମେତ ନିର୍ବାଚନ କମିଶନଙ୍କ ବିରୋଧରେ ରଖିଲେ ମତ । ଏସଆଇଆର ପ୍ରସଙ୍ଗରେ ବାଢିଲେ ଯୁକ୍ତି । ବୁଧବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରଧାନ ବିଚାରପତି ଜଷ୍ଟିସ ସୂର୍ଯ୍ୟକାନ୍ତଙ୍କ ସମ୍ମୁଖରେ ଏସଆଇଆର ବିରୋଧରେ ଯୁକ୍ତି ବାଢିଛନ୍ତି ।

ମମତା କହିଛନ୍ତି ଯେ, ନ୍ୟାୟ କବାଟ ବନ୍ଦ କରି କାନ୍ଦୁଛି । ଏହା କହିବା ସହ ତାଙ୍କ ମାମଲାକୁ କୋର୍ଟ ମାତ୍ର ୫ ମିନିଟ୍ ପାଇଁ ଶୁଣନ୍ତୁ ବୋଲି ଅନୁରୋଧ କରିଥିଲେ ଦିଦି । ଏହାର ଜବାବରେ ପ୍ରଧାନ ବିଚାରପତି ୧୫ ମିନିଟ୍ ନିଅନ୍ତୁ ବୋଲି କହିଥିଲେ । ମମତା କହିଥିଲେ ଯେ, ସେ କେଉଁଠି ନ୍ୟାୟ ପାଉ ନାହାଁନ୍ତି । ନିର୍ବାଚନ କମିଶନଙ୍କୁ ସେ ୬ ଥର ଚିଠି ଲେଖିଛନ୍ତି । କିନ୍ତୁ କୌଣସି ଜବାବ ମିଳୁନି ।

କୋର୍ଟ ମଧ୍ୟ ମମତାଙ୍କ ଆବେଦନକୁ ଗ୍ରହଣ କରିଛନ୍ତି । ଏହାକୁ ସେ ଗୁରୁତ୍ୱପୂର୍ଣ୍ଣ ବୋଲି କହିଛନ୍ତି । ଏହାସହ ସବୁ ସମସ୍ୟାର ସମାଧାନ ଅଛି ବୋଲି କହିବା ସହ ନିର୍ବାଚନ କମିଶନଙ୍କୁ ନୋଟିସ ଜାରି କରିଛନ୍ତି ।

ସୂଚନାଯୋଗ୍ୟ, ଏସଆଇଆର ପ୍ରସଙ୍ଗରେ ମମତା ଦୁଇ ଦିନ ତଳେ ନିର୍ବାଚନ କମିଶନଙ୍କୁ ଭେଟିଥିଲେ । ଏହାପରେ ସିଇସିଙ୍କ ବିରୋଧରେ ସେ ଗଦାଗଦା ଅଭିଯୋଗ ଆଣିଥିଲେ । ନିର୍ବାଚନ କମିଶନ ମିଛ କହୁଛନ୍ତି । ଏପରି ନିର୍ବାଚନ କମିଶନ ସେ କେବେ ଦେଖିନଥିବା ପ୍ରକାଶ କରିଥିଲେ । ଏହାଛତା ନିର୍ବାଚନ କମିଶନ ଏବଂ ଏସଆଇଆର ପ୍ରସଙ୍ଗରେ ସେ ସୁପ୍ରିମକୋର୍ଟଙ୍କ ଦ୍ୱାରସ୍ତ ହୋଇଥିଲେ ।