ବିମଷ୍ଟ୍ରେକ ସମ୍ମିଳନୀରେ ପ୍ରଧାନମନ୍ତ୍ରୀ ମୋଦୀ,ମଞ୍ଚରେ ପରିବେଷିତ ଥାଇ ରାମାୟଣକୁ ମନଭରି ଉପଭୋଗ କଲେ ମୋଦୀ

ଥାଇଲ୍ୟାଣ୍ଡରେ ପ୍ରଧାନମନ୍ତ୍ରୀ ମୋଦୀ । ବିମଷ୍ଟ୍ରେକ ସମ୍ମିଳନୀରେ ଯୋଗଦେବାକୁ ପ୍ରଧାନମନ୍ତ୍ରୀ ଥାଇଲ୍ୟାଣ୍ଡ ଗସ୍ତ କରିଛନ୍ତି । ମଞ୍ଚରେ ପରିବେଷିତ ଥାଇ ରାମାୟଣକୁ ମନଭରି ଉପଭୋଗ କଲେ ପ୍ରଧାନମନ୍ତ୍ରୀ ମୋଦୀ । ରାମାୟଣ ଶେଷ ପରେ ମଞ୍ଚରେ ଅଭିନୟ କରୁଥିବା କଳାକାରଙ୍କ ସହ ଫଟୋ ଉଠାଇ ସେହି ସ୍ମରଣୀୟ ମୁହୂର୍ତ୍ତକୁ ସୋସିଆଲ ମିଡିଆ ଏକ୍ସରେ ପୋଷ୍ଟ କରିଛନ୍ତି ମୋଦୀ । ପ୍ରଧାନମନ୍ତ୍ରୀ ଲେଖିଛନ୍ତି ଏକ ଅନନ୍ୟ ସାଂସ୍କୃତିକ ସଂଯୋଗର ମୁକସାକ୍ଷୀ ସାଜିଲି । ଥାଇ ରାମାୟଣ, ରାମାକିଏନର ଏକ ମନଛୁଆଁ ପ୍ରଦର୍ଶନର ସାକ୍ଷୀ ପାଲଟିଥିଲେ । ଭାରତ ଏବଂ ଥାଇଲ୍ୟାଣ୍ଡର ଶତାବ୍ଦୀ ପୁରୁଣା ସମ୍ପର୍କ ଆମର ସାଂସ୍କୃତିକ ଏବଂ ଆଧ୍ୟାତ୍ମିକ ସମ୍ପର୍କ ମାଧ୍ୟମରେ ଜଡିତ। ବୌଦ୍ଧ ଧର୍ମର ପ୍ରସାର ଆମ ଲୋକଙ୍କୁ ଯୋଡିଛି ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି ।ଏଥିସହ ଥାଇଲ୍ୟାଣ୍ଡ ପ୍ରଧାନମନ୍ତ୍ରୀଙ୍କ ଆଲୋଚନା କରିଥିଲେ ମୋଦୀ । ମୋଦୀ କହିଥିଲେ, ମୁଁ ଥାଇଲ୍ୟାଣ୍ଡ ସରକାରଙ୍କ ପ୍ରତି କୃତଜ୍ଞ ଯେ ମୋର ଗସ୍ତ ସମୟରେ, ୧୮ଶହ ଶତାବ୍ଦୀର ରାମାୟଣ କାରାକୃତି ଉପରେ ଆଧାରିତ ଏକ ସ୍ମାରକୀ ଡାକଟିକଟ ଜାରି କରାଯାଇଥିଲା । ଭାରତ-ପ୍ରଶାନ୍ତ ମହାସାଗରୀୟ ଦୃଷ୍ଟିକୋଣରେ ଥାଇଲ୍ୟାଣ୍ଡର ବିଶେଷ ସ୍ଥାନ ରହିଛି ବୋଲି ଦାବି କରି ପ୍ରଧାନମନ୍ତ୍ରୀ କହିଛନ୍ତି, ଭାରତ ଏବଂ ଥାଇଲ୍ୟାଣ୍ଡ ମୁକ୍ତ, ଖୋଲା, ଅନ୍ତର୍ଭୁକ୍ତ, ନିୟମ-ଭିତ୍ତିକ କ୍ରମକୁ ସମର୍ଥନ କରନ୍ତି; ଆମେ ବିସ୍ତାରବାଦ ନୁହେଁ, ବିକାଶବାଦ ନୀତିରେ ବିଶ୍ୱାସ କରୁ । ଭାରତ-ଥାଇଲ୍ୟାଣ୍ଡ ସମ୍ପର୍କକୁ ରଣନୈତିକ ସହଭାଗୀତା ସ୍ତରକୁ ଉନ୍ନୀତ କରିବାକୁ ନିଷ୍ପତ୍ତି ନେଇଛୁ ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି । ବ୍ୟାଙ୍କକର ସରକାରୀ ଗୃହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଥାଇଲ୍ୟାଣ୍ଡର ପ୍ରଧାନମନ୍ତ୍ରୀ ପାଟୋଙ୍ଗଟାର୍ଣ୍ଣ ସିନାୱାତ୍ରା ସ୍ୱାଗତ କରିଥିଲେ। ପ୍ରଧାନମନ୍ତ୍ରୀ ମୋଦି ଏବଂ ଥାଇଲ୍ୟାଣ୍ଡର ପ୍ରଧାନମନ୍ତ୍ରୀ ସିନାୱାତ୍ରାଙ୍କ ଉପସ୍ଥିତିରେ ଭାରତ ଏବଂ ଥାଇଲ୍ୟାଣ୍ଡ ମଧ୍ୟ ବୁଝାମଣାପତ୍ର  ସ୍ବାକ୍ଷର ହୋଇଥିଲା