ଷଷ୍ଠ ବିମଷ୍ଟେକ୍ ଶିଖର ସମ୍ମିଳନୀରେ ଯୋଗଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦୁଇ ଦିନିଆ ଥାଇଲାଣ୍ଡ ଗସ୍ତରେ ଯିବେ

ଷଷ୍ଠ ବିମଷ୍ଟେକ୍ ଶିଖର ସମ୍ମିଳନୀରେ ଯୋଗଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସନ୍ତାକାଲି (ଗୁରୁବାର) ସକାଳେ ଦୁଇ ଦିନିଆ ଥାଇଲାଣ୍ଡ ଗସ୍ତରେ ଯିବେ। ୨୦୧୬ ଓ ୨୦୧୯ ପରେ ଏହା ହେଉଛି ପ୍ରଧାନମନ୍ତ୍ରୀଙ୍କ ତୃତୀୟ ଥାଇଲାଣ୍ଡ ଗସ୍ତ।

ଏହି ଗସ୍ତ ସମୟରେ ପ୍ରଧାନମନ୍ତ୍ରୀ ଆସନ୍ତାକାଲି ବ୍ୟାଙ୍କକରେ ଥାଇଲାଣ୍ଡର ପ୍ରଧାନମନ୍ତ୍ରୀ ପେଟୋଙ୍ଗଟାର୍ଣ୍ଣ ସିନାୱାତ୍ରାଙ୍କ ସହ ଦ୍ୱିପାକ୍ଷିକ ଆଲୋଚନା କରିବେ। ସେମାନେ ଦ୍ୱିପାକ୍ଷିକ ସମ୍ପର୍କର ସମଗ୍ର କ୍ଷେତ୍ରର ଅଗ୍ରଗତିର ସମୀକ୍ଷା କରିବେ ଏବଂ ଭାରତ-ଥାଇଲାଣ୍ଡ ଦ୍ୱିପାକ୍ଷିକ ଭାଗିଦାରୀକୁ ଅଧିକ ତ୍ୱରାନ୍ୱିତ କରିବା ଏବଂ ଆଞ୍ଚଳିକ ଏବଂ ବହୁପାକ୍ଷିକ ପ୍ରସଙ୍ଗଉପରେ ମତ ବିନିମୟ କରିବେ। ସେମାନେ ଅନେକ ଦ୍ୱିପାକ୍ଷିକ ଦସ୍ତାବିଜରେ ସ୍ୱାକ୍ଷର କରିବେ।

ଳିତ ଶୁକ୍ରବାର ଅନୁଷ୍ଠିତ ହେବାକୁ ଥିବା ଷଷ୍ଠ ବିମଷ୍ଟେକ୍ ଶିଖର ସମ୍ମିଳନୀର ବିଷୟବସ୍ତୁ ହେଉଛି ‘ବିମଷ୍ଟେକ୍ – ସମୃଦ୍ଧ, ସହନଶୀଳ ଏବଂ ମୁକ୍ତ’। ଏହି ଶିଖର ସମ୍ମିଳନୀରେ ବ୍ୟାଙ୍କକ୍ ଭିଜନ-୨୦୩୦କୁ ଗ୍ରହଣ କରାଯିବ ଏବଂ ବିମଷ୍ଟେକର ଭବିଷ୍ୟତ ଦିଗ ନିର୍ଦ୍ଧାରଣ ପାଇଁ ବିମଷ୍ଟେକ୍ ବିଶିଷ୍ଟ ବ୍ୟକ୍ତିଗୋଷ୍ଠୀର ରିପୋର୍ଟକୁ ମଧ୍ୟ ଅନୁମୋଦନ କରାଯିବ। ପ୍ରଧାନମନ୍ତ୍ରୀ ମୋଦୀ ମଧ୍ୟ ରାଜା ରାମା ଦଶମ ଏବଂ ଥାଇଲାଣ୍ଡର ରାଣୀଙ୍କ ସହ ସହ ଆଲୋଚନା କରିବେ ବୋଲି ଆଶା କରାଯାଉଛି।

ଭାରତ ଓ ଥାଇଲାଣ୍ଡ ମଧ୍ୟରେ ଐତିହାସିକ ଭାବେ ଦ୍ୱିପାକ୍ଷିକ ସମ୍ପର୍କ, ସଭ୍ୟତା, ସାଂସ୍କୃତିକ ଏବଂ ଧାର୍ମିକ ବନ୍ଧନ ରହିଛି। ଥାଇଲାଣ୍ଡ ହେଉଛି ଭାରତର ସାମୁଦ୍ରିକ ପଡ଼ୋଶୀ, ଆକ୍ଟ ଇଷ୍ଟ ନୀତି ଏବଂ ଭାରତ-ପ୍ରଶାନ୍ତ ମହାସାଗରପାଇଁ ଭିଜନରେ ଏକ ମୂଲ୍ୟବାନ ଅଂଶୀଦାର ଏବଂ ବିମଷ୍ଟେକରେ ଏକ ଉଚ୍ଚ ମୂଲ୍ୟବାନ ଅଂଶୀଦାର। ଆସିଆନ୍ ଅଞ୍ଚଳରେ ସିଙ୍ଗାପୁର, ଇଣ୍ଡୋନେସିଆ ଓ ମାଲେସିଆ ପରେ ଥାଇଲାଣ୍ଡ ଆସିଆନର ତୃତୀୟ ବୃହତ୍ତମ ଅର୍ଥନୀତି ଏବଂ ଭାରତର ଚତୁର୍ଥ ବୃହତ୍ତମ ବାଣିଜ୍ୟ ସହଯୋଗୀ। ଦ୍ୱିପାକ୍ଷିକ ବାଣିଜ୍ୟ ପ୍ରାୟ ୧୫ ବିଲିୟନ ଡଲାର, ଥାଇଲାଣ୍ଡକୁ ଭାରତର ରପ୍ତାନି ପ୍ରାୟ ୫ ବିଲିୟନ ଡଲାର ଏବଂ ଥାଇଲାଣ୍ଡରୁ ଆମଦାନୀ ପ୍ରାୟ ୧୦ ବିଲିୟନ ଡଲାର। ବିମଷ୍ଟେକ୍ ଉପରେ ଭାରତର ଫୋକସ୍ ଅନୁଷ୍ଠାନ ଏବଂ ଦକ୍ଷତା ବୃଦ୍ଧି, ନିରାପତ୍ତା ସୁଦୃଢ଼ କରିବା ଏବଂ ଯୋଗାଯୋଗ ବୃଦ୍ଧି ଉପରେ ରହିଛି। ଶିଖର ସମ୍ମିଳନୀରେ ଅନେକ ଚୁକ୍ତି ଏବଂ ଘୋଷଣା ଶେଷ ହେବାର ସମ୍ଭାବନା ରହିଛି। ପ୍ରଧାନମନ୍ତ୍ରୀଙ୍କ ଏହି ଗସ୍ତ ୨୦୧୯ରେ ତାଙ୍କର ଶେଷ ଗସ୍ତ ପରଠାରୁ ଦ୍ୱିପାକ୍ଷିକ ସମ୍ପର୍କରେ ସକାରାତ୍ମକ ଗତିକୁ ବୃଦ୍ଧି କରିବାର ଏକ ସୁଯୋଗ ପ୍ରଦାନ କରିବ ବୋଲି ଆଶା କରାଯାଉଛି।