ଶ୍ରୀଲିଙ୍ଗରାଜଙ୍କ ହେଲାନାହିଁ ହାଣ୍ଡିଭଙ୍ଗା ଯାତ

ଚଳିତ ବର୍ଷ ମଧ୍ୟ ହେଲାନାହିଁ ହାଣ୍ଡିଭଙ୍ଗା ଯାତ। ପୂର୍ବବର୍ଷ ପରି ଏହି ଯାତ ବନ୍ଦହେବା ସହ ଶ୍ରୀଲିଙ୍ଗରାଜ ଓଳିଏ ଖାଡ଼ା ଉପାସ ରହିଛନ୍ତି। ସୂଚନା ଅନୁଯାୟୀ, ସେବାୟତମାନଙ୍କ ଅସହଯୋଗରୁ ହାଣ୍ଡିଭଙ୍ଗା ଯାତ ହୋଇ ପାରିନାହିଁ। ପୁଣି ଭାଙ୍ଗିଲା ପରମ୍ପରା। ଦୀର୍ଘ ୯ବର୍ଷ ହେଲା ଏମିତି ଅଘଟଣ ଘଟି ଚାଲିଥିବା ଓ ମନ୍ଦିର ପ୍ରଶାସନ ଏହାର ସମାଧାନ ପାଇଁ ସାମାନ୍ୟତମ ଆଗ୍ରହ ପ୍ରଦର୍ଶନ ନକରିବା ଶ୍ରଦ୍ଧାଳୁମାନଙ୍କ ମନରେ ଗଭୀର ଆଘାତ ଦେଇଛି। ସୂଚନାଯୋଗ୍ୟ, ମହାଶିବରାତ୍ରି ପରେ ପରେ ପଡ଼ୁଥିବା ଶନିବାର ଦିନ ପାଳିତ ହୁଏ ହାଣ୍ଡିଭଙ୍ଗା ଯାତ। କିନ୍ତୁ ଦୁଇଟି ‌ସେବାୟତ ଗୋଷ୍ଠୀ ଭିତରେ ଲାଗିଥିବା ବିବାଦର ସମାଧାନ ହୋଇପାରୁନଥିବାରୁ ଏହି ପ୍ରସିଦ୍ଧ ଯାତ ଦୀର୍ଘ ୯ ବର୍ଷ ହେଲା ବନ୍ଦ ରହିଛି। ଏ ପ୍ରସଙ୍ଗରେ ତ ହାଇକୋର୍ଟଙ୍କ ନିର୍ଦ୍ଦେଶ ରହିଛି, ତା’ପରେ ଏଥର ଯାତ ପାଳନ ପାଇଁ ଜିଲ୍ଲାପାଳ ଦେଇଥିବା ଚେତାବନୀ ମଧ୍ୟ କାଟୁ କରିନାହିଁ। ସେବାୟତମାନେ ନିଜ ଜିଦ୍‌ରେ ଅଟଳ ରହିଛନ୍ତି।