ଧନୁଯାତ୍ରା ମହୋତ୍ସବରେ ମୁଖ୍ୟମନ୍ତ୍ରୀ: ବରଗଡ଼କୁ ୧୩୬୨ କୋଟିର ପ୍ରକଳ୍ପ ଭେଟି, ମଥୁରା ନଗରୀରେ ଉତ୍ସାହ

ବରଗଡ଼: ବିଶ୍ୱର ସର୍ବବୃହତ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବରେ  ପହଞ୍ଚିଛନ୍ତି ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ। ଏହି ଅବସରରେ ସେ ବରଗଡ଼ବାସୀଙ୍କୁ ଶୁଭେଚ୍ଛା ଜଣାଇବା ସହ ଜିଲ୍ଲାର ବିକାଶ ପାଇଁ ୧୩୬୨ କୋଟି ଟଙ୍କାର ୧୨୩ଟି ପ୍ରକଳ୍ପର ଉଦ୍‌ଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ଧନୁଯାତ୍ରାରେ ‘ରାଜଅତିଥି’ ଭାବେ ଯୋଗଦେଇ ହାତୀ ଉପରେ ବସି ନଗର ପରିକ୍ରମା କରିଥିଲେ ମୁଖ୍ୟମନ୍ତ୍ରୀ । ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ବରଗଡ଼ ଧନୁଯାତ୍ରା ସାମାଜିକ ଜୀବନରେ ଆଧ୍ୟାତ୍ମିକତାର ଏକ ଅନନ୍ୟ ନିଦର୍ଶନ। ଧନୁଯାତ୍ରା ସମୟରେ ସମଗ୍ର ବରଗଡ଼ ସହର ଦ୍ୱାପର ଯୁଗର ମଥୁରାନଗରୀ ପାଲଟିଯାଏ ଏବଂ ଜୀରା ନଦୀ ଯମୁନାର ଭ୍ରମ ସୃଷ୍ଟି କରେ। ସେ କହିଛନ୍ତି ଯେ ସମଗ୍ର ବରଗଡ଼ବାସୀ କୃଷ୍ଣ ପ୍ରେମରେ ହଜିଯିବା ସହ ମହାରାଜ କଂସଙ୍କ ଆଜ୍ଞାବହ ପ୍ରଜା ପାଲଟି ଯାଆନ୍ତି, ଯାହା ବିଶ୍ୱରେ ବିରଳ।