ପୁଅର ପରୀକ୍ଷା ପାଇଁ ବାପା ରାତିସାରା ୮୦୦ କିମି କାର୍ ଚଳାଇଲେ

ଇଣ୍ଡିଗୋ ଏୟାରଲାଇନ୍ସର ଅନେକ ବିମାନ ବାତିଲ ହେବା କାରଣରୁ ଦେଶବ୍ୟାପୀ ହଜାର ହଜାର ଯାତ୍ରୀ ଅସୁବିଧାର ସମ୍ମୁଖୀନ ହୋଇଥିଲେ। ହରିଆଣାର ରୋହତକ ଜିଲ୍ଲାର ମାୟନା ଗାଁର ପଙ୍ଘାଲ୍ ପରିବାର ମଧ୍ୟ ଏହି ପରିସ୍ଥିତିରେ ହଇରାଣ ହୋଇଥିଲେ। ଯୁବ ଆନ୍ତର୍ଜାତୀୟ ବନ୍ଧୁକଚାଳନା ଖେଳାଳି ଆଶିଷ ଚୌଧୁରୀ ପଙ୍ଘାଲ୍, ଯିଏ ଇନ୍ଦୋରର ଡେଲି କଲେଜରେ ଦ୍ୱାଦଶ ଶ୍ରେଣୀର ଛାତ୍ର। ଆଶିଷଙ୍କର ପ୍ରି-ବୋର୍ଡ ପରୀକ୍ଷା ଡିସେମ୍ବର ୮ରୁ ଆରମ୍ଭ ହେବାର ଥିଲା। ସେହିପରି, ଡିସେମ୍ବର ୬ରେ ତାଙ୍କୁ ଏକ ସମ୍ମାନ ସମାରୋହରେ ମଧ୍ୟ ଯୋଗଦେବାର ଥିଲା। ଏହି କାର୍ଯ୍ୟକ୍ରମ ପାଇଁ ଦିଲ୍ଲୀରୁ ଇନ୍ଦୋର ଯିବା ପାଇଁ ତାଙ୍କର ଇଣ୍ଡିଗୋ ଫ୍ଲାଇଟ୍ ବୁକ୍ ହୋଇଥିଲା।  ଡିସେମ୍ବର ୬ରେ ଯେତେବେଳେ ଆଶିଷ ନିଜ ବାପା ରାଜନାରାୟଣ ପଙ୍ଘାଲ୍ଙ୍କ ସହ ଦିଲ୍ଲୀ ବିମାନ ବନ୍ଦରରେ ପହଞ୍ଚିଲେ, ସେତେବେଳେ ଜାଣିବାକୁ ପାଇଲେ ଯେ ଇନ୍ଦୋର ଯିବାକୁ ଥିବା ଇଣ୍ଡିଗୋ ବିମାନଟି ହଠାତ୍ ବାତିଲ୍ ହୋଇଯାଇଛି।  ଫ୍ଲାଇଟ୍ ବାତିଲ ହେବା ଏବଂ ଟ୍ରେନରେ ତତ୍କାଳ ଟିକେଟ୍ ନ ମିଳିବା ପରେ, ବାପା ରାଜନାରାୟଣ ପଙ୍ଘାଲ୍ ତୁରନ୍ତ ଏକ ବଡ଼ ନିଷ୍ପତ୍ତି ନେଲେ। ସେ ସ୍ଥିର କଲେ ଯେ ଯେକୌଣସି ପରିସ୍ଥିତିରେ ପୁଅକୁ ସମୟରେ ଇନ୍ଦୋର ପହଞ୍ଚାଇବେ, ଯାହାଦ୍ୱାରା ତାର ପରୀକ୍ଷା ନ ଛୁଟୁ।  ବାପା ରାତିସାରା ନିରନ୍ତର କାର୍ ଚଳାଇ ପ୍ରାୟ ୮୦୦ କିଲୋମିଟରର ଦୂରତା ଅତିକ୍ରମ କରିଥିଲେ। ତାଙ୍କର ଅକ୍ଲାନ୍ତ ପ୍ରୟାସ ପରେ, ସେମାନେ ପରଦିନ ସକାଳେ ସଠିକ୍ ସମୟରେ ଇନ୍ଦୋରରେ ପହଞ୍ଚିଲେ। ଏହାଦ୍ୱାରା ଆଶିଷ ଉଭୟ ସମ୍ମାନ ସମାରୋହ ଏବଂ ତାଙ୍କର ପ୍ରି-ବୋର୍ଡ ପରୀକ୍ଷାରେ ଯୋଗ ଦେଇପାରିଲେ।