ସ୍ଥାନୀୟ ଇଡେନ ଗାର୍ଡେନ୍ସରେ ଶନିବାର ଆରମ୍ଭ ହେବାକୁ ଯାଉଛି ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୧୮ତମ ସଂସ୍କରଣ। ଦୁଇ ମାସ ଧରି ଚାଲିବ ଏହି ଟୁର୍ଣ୍ଣାମେଣ୍ଟ । କୋଲକାତାର ଐତିହାସିକ ଇଡେନ୍ ଗାର୍ଡେନରେସନ୍ଧ୍ୟା ୬ଟାରେ ଉଦ୍ଘାଟନୀ ଉତ୍ସବ ହେବ ଓ ୭ଟା ୩୦ରେ ମ୍ୟାଚ୍ ଆରମ୍ଭ ହେବ । ମେ ୨୫ରେ ଗ୍ରାଣ୍ଡ ଫିନାଲେ ମଧ୍ୟ ଇଡେନ ଗାର୍ଡେନରେ ଖେଳାଯିବ । ଆଜି ଉଦଘାଟନୀ ମ୍ୟାଚରେ ଗତ ଥରର ବିଜେତା କୋଲକାତା ନାଇଟ ରାଇଡର୍ସ ଭେଟିବ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ।
୨୦୦୮ ମସିହାର ଆଇପିଏଲ ପ୍ରଥମ ସଂସ୍କରଣ ପର ଠାରୁ ପ୍ରଥମ ଥର ଏକ ଉଦଘାଟନୀ ମ୍ୟାଚରେ ଦୁଇ ଦଳ ପରସ୍ପରର ମୁକାବିଲା କରିବାକୁ ଯାଉଛନ୍ତି । ଉଭୟ ବିଜୟରୁ ଅଭିଯାନ ଆରମ୍ଭ କରିବାକୁ ଆଶା ରଖିଛନ୍ତି । କେକେଆର ଘରୋଇ ଗ୍ରାଉଣ୍ଡରେ ଖେଳୁ ଥିବାରୁ ପ୍ରଶଂସକଙ୍କ ଉପସ୍ଥିତିର ଫାଇଦା ନେବ। କୋଲକାତା ନାଇଟ ରାଇଡର୍ସ ଆଜିଙ୍କ୍ୟ ରାହାଣେଙ୍କ ନେତୃତ୍ବରେ ପଡ଼ିଆକୁ ଓହ୍ଲାଇବ। ସେହିପରି ରଜତ ପଟିଦାରଙ୍କ କ୍ୟାପଟେନ୍ସିରେ ଅଭିଯାନ ଆରମ୍ଭ କରିବ ଆରସିବି । ଆଜି ସଂଧ୍ୟା ୬ଟାରେ ଉଦଘାଟନୀ ଉତ୍ସବ । ସାଢ଼େ ୭ଟାରୁ ମ୍ୟାଚ୍ ଆରମ୍ଭ । ଅନ୍ୟପଟେ ଏଥର ଧୋନୀ, ରୋହିତ ଓ ବିରାଟ କୋହଲିଙ୍କ ଶେଷ ଆଇପିଏଲ ମ୍ୟାଚ୍ ହୋଇପାରେ । ତେଣୁ ଏହି ୩ ଜଣଙ୍କ ପ୍ରଦର୍ଶନ ଉପରେ ନଜର ରହିବ।