ଭାରତ କୁ ଚିନ୍ତାରେ ପକେଇଲା ଚୀନ

ଚୀନରେ ବୃଦ୍ଧି ପାଉଥିବା ନିମୋନିଆ ଭଳି ମାମଲା ଭାରତରେ ମଧ୍ୟ ଚିନ୍ତା ବଢ଼ାଇ ଦେଇଛି। ଏହାକୁ ଦୃଷ୍ଟିରେ ରଖି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳକୁ ଜନସ୍ୱାସ୍ଥ୍ୟ କେନ୍ଦ୍ର ଓ ହସ୍ପିଟାଲଗୁଡ଼ିକର ପ୍ରସ୍ତୁତି ପଦକ୍ଷେପକୁ ତୁରନ୍ତ ସମୀକ୍ଷା କରିବାକୁ ପରାମର୍ଶ ଦେଇଛି। ଏହାସହ ସ୍ୱାସ୍ଥ୍ୟ ମନ୍ତ୍ରଣାଳୟ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛି।ସ୍ୱାସ୍ଥ୍ୟ ମନ୍ତ୍ରଣାଳୟ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳକୁ ‘କୋଭିଡ୍‌-୧୯’ ପ୍ରସଙ୍ଗରେ ସଂଶୋଧିତ ନିର୍ଦ୍ଦେଶାବଳୀ କାର୍ଯ୍ୟକାରୀ କରିବାକୁ କହିଛି। ଏଭଳି ସ୍ଥିତିରେ ଜିଲ୍ଲା ଓ ରାଜ୍ୟ ଅଧିକାରୀମାନେ ILI / SARI (ଇନ୍‌ଫ୍ଲୁଏଞ୍ଜା ଭଳି ରୋଗ/ ଭୟଙ୍କର ଶ୍ୱାସକ୍ରିୟା ସଂକ୍ରମଣ) ମାମଲା ଉପରେ କଡ଼ା ନଜର ରଖିବେ। କୁହାଯାଉଛି ଯେ ଇନ୍‌ଫ୍ଲୁଏଞ୍ଜା, ମାଇକୋପ୍ଲାଜମା ନିମୋନିଆ, SARS-CoV-2 ଭଳି କାରଣରୁ ଶ୍ୱାସ ସମ୍ବନ୍ଧୀୟ ରୋଗ ବୃଦ୍ଧି ପାଇଛି।