ଇସ୍ରାଏଲକୁ ସାହାଯ୍ୟର ହାତ ବଢ଼ାଇଲେ ବ୍ରିଟେନ୍ ପ୍ରଧାନମନ୍ତ୍ରୀ ଋଷି ସୁନକ। ଇସ୍ରାଏଲ ପାଇଁ ସୁନକ ଏକ ଗୁପ୍ତଚର ବିମାନ, ଦୁଇଟି ଯୁଦ୍ଧପୋତ, ତିନୋଟି ମର୍ଲିନ୍ ହେଲିକପ୍ଟର ଏବଂ ସାମୁଦ୍ରିକ କମାଣ୍ଡୋଙ୍କ ଏକ କମ୍ପାନୀ ପଠାଇଛନ୍ତି। ଭୂମଧ୍ୟସାଗରରେ ଏମାନଙ୍କୁ ନିୟୋଜିତ କରାଯିବ, ଯଦ୍ଦ୍ଵାରା କ୍ଷେତ୍ରୀୟ ସନ୍ତୁଳନ ସୃଷ୍ଟି ହୋଇପାରିବ। ସୁନକ କହିଛନ୍ତି ଯେ ଇସ୍ରାଏଲକୁ ସାହାଯ୍ୟ କରିବା ପାଇଁ ସେ ରୟାଲ ନାଭିର ଟାସ୍କ ଗ୍ରୁପ୍ ପଠାଉଛନ୍ତି। ସେମାନଙ୍କୁ ଆସନ୍ତା ସପ୍ତାହରେ ଭୂମଧ୍ୟସାଗରକୁ ପଠାଯିବ।ଋଷି ସୁନକ କହିଛନ୍ତି ଯେ ଆମେ ଯେଉଁଭଳି ଭାବେ ଦୁଃଖଦ ଦୃଶ୍ୟ ଏହି ସପ୍ତାହରେ ଦେଖିଛୁ, ତାହାକୁ ପୁଣିଥରେ ଦେଖିବା ପାଇଁ ଚାହୁଁନାହୁଁ। ଆମେ ସବୁବେଳେ ଆମର ସହକର୍ମୀଙ୍କୁ ସମର୍ଥନ କରିବୁ। ନିଜ ସାଥୀମାନଙ୍କୁ ସର୍ବଦା ସମର୍ଥନ ଦେବୁ। ଆମର ଓ୍ଵାର୍ଲ୍ଡ କ୍ଲାସ୍ ମିଲିଟାରୀ ଇସ୍ରାଏଲର ସମର୍ଥନରେ ସବୁବେଳେ ଛିଡା ହୋଇଛି। ଏହା ଏଥିପାଇଁ କରାଯାଉଛି, ଯେପରି କ୍ଷେତ୍ରୀୟ ସନ୍ତୁଳନ ବଜାୟ ରହିବ। ବିରୋଧ ଏବଂ ଆକ୍ରମଣକୁ ରୋକା ଯାଇପାରିବ।
ବ୍ରିଟିଶ ପ୍ରଧାନମନ୍ତ୍ରୀ କହିଛନ୍ତି, ଆମେ ଇସ୍ରାଏଲକୁ ସମ୍ପୂର୍ଣ୍ଣ ସମର୍ଥନ କରୁଛୁ। କିନ୍ତୁ ହମାସ ଆତଙ୍କବାଦୀଙ୍କ ଆକ୍ରମଣ ବନ୍ଦ ହେବା ଦରକାର। ଯଦି ସେମାନେ ନିଜେ ଏହା କରିବେ ନାହିଁ, ତା’ ହେଲେ ସେମାନଙ୍କର ବିନାଶ ନିଶ୍ଚିତ। ଯେଉଁ ପ୍ରକାରର ଭୟଙ୍କର ଆତଙ୍କବାଦୀ ଆକ୍ରମଣ ହୋଇଛି, ତାହା ଠିକ୍ ନୁହେଁ। ଆମେ ଇସ୍ରାଏଲର ସାଥ୍ ଛାଡିବୁ ନାହିଁ।