ରାଜ୍ୟରେ ଓବିସି ଗଣନା ଖୁବ୍ ଶୀଘ୍ର ହେବ

ଭୁବନେଶ୍ୱର : ରାଜ୍ୟରେ ଓବିସି ଗଣନା ଖୁବ୍ ଶୀଘ୍ର ହେବ। ଆପାତତଃ ଏପ୍ରିଲ୍‌-ମେ’ ମାସରେ ଏହି ଗଣନା କାର୍ଯ୍ୟ ଆରମ୍ଭ ହେବ। ଜୁଲାଇ ମାସ ସୁଦ୍ଧା ଏହି ପ୍ରକ୍ରିୟା ଶେଷ କରିବାକୁ ସରକାର ଲକ୍ଷ୍ୟ ରଖିଛନ୍ତି। ଏଥି ପାଇଁ ଓବିସି କମିସନ୍‌ଙ୍କ ସଦସ୍ୟ ସଚିବ ଭି ଭି ଯାଦବ ସବୁ ଜିଲ୍ଲାପାଳ ଓ ମହାନଗର ନଗିମ କମିସନର୍‌ମାନଙ୍କୁ ଚିଠି ଲେଖିଛନ୍ତି। ଗଣନା କାର୍ଯ୍ୟ କିପରି କରାଯିବ, ତାହାର ବିବରଣୀ ମଧ୍ୟ ଦିଆଯାଇଛି। ୨୦୨୧ ମେ’ ମାସରେ ଓବିସି ଗଣନା କରିବାକୁ ପୂର୍ବରୁ ନିଷ୍ପତ୍ତି ହୋଇଥିଲା। ତେବେ କରୋନା ଯୋଗୁ ସରକାର ତାହାକ ସ୍ଥଗିତ ରଖିଥିଲେ।ରାଜ୍ୟରେ ପଛୁଆ ବର୍ଗ ଲୋକଙ୍କ ସାମାଜିକ ଓ ଅର୍ଥନୈତିକ ସ୍ଥିତି ଜାଣିବା ପାଇଁ ଏହି ଗଣନା କରାଯିବ। ୬ ଜଣ ବରିଷ୍ଠ ପ୍ରଶାସନିକ ଅଧିକାରୀ(ଅତିରିକ୍ତ ସଚିବ ପାହ୍ୟା)ଙ୍କୁ ୩୦ଟି ଜିଲ୍ଲାର ଜୋନାଲ୍‌ ଅଫିସର୍‌ ଭାବେ ଦାୟିତ୍ବ ଦିଆଯାଇଛି। ବ୍ଲକ୍‌ ସ୍ତରରେ ସୁପର୍‌ଭାଇଜର୍‌ ଓ ଗଣନାକାରୀଙ୍କୁ ସ୍ବତନ୍ତ୍ର ଭାବେ ପ୍ରଶିକ୍ଷଣ ଦିଆଯିବ। ପଞ୍ଚ‌ାୟତରେ ଅଙ୍ଗନବାଡ଼ି କର୍ମୀ ଏବଂ ସହରାଞ୍ଚଳରେ ୱାର୍ଡ ଅଫିସର, ଟ୍ୟାକ୍ସ କଲେକ୍ଟରମାନେ ଗଣନାକାରୀ ଭାବେ ଦାୟିତ୍ବ ନିର୍ବାହ କରିବେ। ପ୍ରତି ୧୦ଜଣ ଗଣନାକାରୀଙ୍କ କାର୍ଯ୍ୟ ତଦାରଖ ପାଇଁ ଜଣେ ଲେଖାଏ ସୁପରଭାଇଜରଙ୍କୁ ନିଯୁକ୍ତି ଦିଆଯିବ।