ଗାଜାରେ ବୋମାମାଡ଼

ଆଜି ଗାଜାରେ ଏକ ସ୍କୁଲ୍‌ ପରିସରରେ ଚାଲିଥିବା ଆଶ୍ରୟସ୍ଥଳ ଉପରେ ଇସ୍ରାଏଲ ବିମାନ ଆକ୍ରମଣ କରିବାରୁ ଶତାଧିକ ଲୋକଙ୍କର ମୃତ୍ୟୁ ‌ଘଟିଛି। ବିସ୍ଥାପିତ ଲୋକଙ୍କ ଆଶ୍ରୟସ୍ଥଳ ପାଲଟିଥିବା ଏକ ସ୍କୁଲ୍‌ ଉପରେ ଇସ୍ରାଏଲ ଆଜି ଅଚାନକ କୌଣସି ପୂର୍ବ ସତର୍କ ସୂଚନା ନଦେଇ ବୋମା ମାଡ଼ କରିଥିଲା। ଘଟଣାସ୍ଥଳରେ ହିଁ ୭୦ ଜଣଙ୍କ ମୃତ୍ୟୁ ହୋଇଥିବା ବେଳେ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ୩୦ରୁ ଅଧିକ ଲୋକଙ୍କ ମୃତ୍ୟୁ ହୋଇଛି। ଅନ୍ୟପକ୍ଷେ ଇସ୍ରାଏଲୀ ସେନା ସ୍ପଷ୍ଟ କରିଛି ଯେ ହମାସ ଆତଙ୍କବାଦୀଙ୍କୁ ଟାର୍ଗେଟ୍‌ କରି ଏହି ଆକ୍ରମଣ କରାଯାଇଛି। ଆକ୍ରମଣ ସ୍ଥଳର ଦୃଶ୍ୟ ଅତି ଭୟାନକ ଥିଲା ଏବଂ ଏହାର ଭିଡିଓ ଭାଇରାଲ ହୋଇଛି। ଚାରିଆଡ଼େ ଖଣ୍ଡ ବିଖଣ୍ଡିତ ମୃତଦେହ ପଡ଼ିଥିବା ଦେଖିବାକୁ ମିଳିଛି।ଶତାଧିକ ମୃତକଙ୍କ ମଧ୍ୟରେ ୧୧ ଜଣ ଶିଶୁ ଏବଂ ୬ ଜଣ ମହିଳା ଥିବା ଜଣାପଡ଼ିଛି। ଗାଜା ସ୍ବାସ୍ଥ୍ୟ ମନ୍ତ୍ରାଳୟ ଅନୁଯାୟୀ ଏହି ଆଶ୍ରୟସ୍ଥଳରେ ୩୫୦ ପରିବାର ଆଶ୍ରୟ ନେଇଥିଲେ। ବୋମାମାଡ଼ରେ ସ୍କୁଲ କୋଠାର ୨ଟି ମହଲା ସଂପୂର୍ଣ୍ଣ ଧ୍ବସ୍ତ ହୋଇଯାଇଛି। ଜାତିସଂଘ ସୂଚନାନୁଯାୟୀ ଗାଜାରେ ୫୬୪ ସ୍କୁଲ୍‌ ବିଲ୍ଡିଂ ମଧ୍ୟରୁ ୪୭୭ଟି ବିଲ୍ଡିଂ ଉପରେ ସିଧାସଳଖ ଆକ୍ରମଣ ହୋଇଛି। ଆଜି ଆକ୍ରମଣ ହୋଇଥିବା  ତବାଇନ ସ୍କୁଲ୍‌ରେ ୧ ହଜାରରୁ ଅଧିକ ଲୋକ ଆଶ୍ରୟ ନେଇଥିଲେ। ବିଟ୍‌ ହାନୌନ୍‌ରେ ଥିବା ଲୋକମାନଙ୍କୁ ଇସ୍ରାଏଲ ସେନା ସେମାନଙ୍କ ଘର ଛାଡ଼ିବାପାଇଁ ନିର୍ଦ୍ଦେଶ ଦେବାପରେ ସେମାନେ ଆସି ଏହି ସ୍କୁଲ୍‌ରେ ରହୁଥିଲେ। ଏହି ସ୍କୁଲକୁ ମଧ୍ୟ ଏକ ମସ୍‌ଜିଦ ଭାବେ ବ୍ୟବହାର କରାଯାଏ।