ନଥିଂ ଫୋନ୍‌ର ନୂଆ ସଂସ୍କରଣ

ସ୍ମାର୍ଟ ଫୋନ୍‌ ସହ ନୂଆ କରି ବଜାର ପ୍ରବେଶ କରିଥିବା ୟୁନାଇଟେଡ୍‌ କିଙ୍ଗଡମ୍‌ର ‘ନଥିଂ ଫୋନ୍‌’ କମ୍ପାନି ଆଗାମୀ ୫ ତାରିଖରେ ତାହାର ତୃତୀୟ ଫୋନ୍ ‘ନଥିଂ ଫୋନ୍‌-୨ଏ’ ବଜାରକୁ ଛାଡ଼ିବ ବୋଲି ଘୋଷଣା କରିଛି। ଅନ୍ୟତମ ଫୋନ୍‌ କମ୍ପାନି ‘ଵାନ୍‌ପ୍ଲସ୍‌’ର ସହପ୍ରତିଷ୍ଠାତା କାର୍ଲ ପେଇଙ୍କ ଦ୍ବାରା ପରିଚାଳିତ ନଥିଂ ଫୋନ୍‌ର ଏହି ନୂଆ ସଂସ୍କରଣକୁ ଉପଭୋକ୍ତାମାନେ ଇ-ମାର୍କେଟ୍‌ ଫ୍ଲିପ୍‌କାର୍ଟ ମାଧ୍ୟମରେ ପାଇପାରିବେ ବୋଲି ଜଣାଯାଇଛି। ତେବେ ଏହାର ଟିକିନିଖି ବୈଶିଷ୍ଟ୍ୟ ବାବଦରେ କିଛି ସ୍ପଷ୍ଟ କରାଯାଇନଥିଲେ ହେଁ ପୂର୍ବରୁ ଏହି ଫୋନ୍‌ର କିଛି ବିଶେଷତ୍ବ ସାମାଜିକ ଗଣମାଧ୍ୟମରେ ପ୍ରଘଟ ହୋଇସାରିଛି। ସେହି ସୂଚନାନୁସାରେ, ଏହା ‘ଆଣ୍ଡ୍ରଏଡ୍‌-୧୪’ ଅପରେଟିଙ୍ଗ ସିଷ୍ଟମ୍‌ ଦ୍ବାରା ପରିଚାଳିତ। ଏଥିରେ ‘ମିଡିଆଟେକ୍‌ ଡିମେନ୍‌ସିଟି ୭୨୦୦’ ଚିପ୍‌ ଖଞ୍ଜାଯାଇଛି। ଏହାର ୬.୭ ଇଞ୍ଚର ଫୁଲ୍ ଏଚ୍‌ଡି (୧,୦୮୪ x ୨,୪୧୨ ପିକ୍ସେଲ) ବିଶିଷ୍ଟ ଆମୋଲେଡ୍‌ ପରଦାଟି ୧୨୦ ହର୍ଜର ରିଫ୍ରେସ୍‌ ରେଟ୍‌ରେ କାମ କରିବାକୁ ସକ୍ଷମ। ଏଥି ସହିତ ଏଥିରେ ଖଚିତ ୫୦ ମେଗାପିକ୍ସେଲ୍‌ର ଡୁଆଲ୍ କ୍ୟାମେରା ଚିତ୍ରୋତ୍ତୋଳନର ଅନୁଭବକୁ ଅକ୍ଷୁଣ୍ଣ ରଖିବ ବୋଲି କୁହାଯାଇଛି। ସର୍ବୋପରି କମ୍ପାନି ତାହାର ପୂର୍ବ ଫୋନ୍‌ ‘ନଥିଂ ଫୋନ୍‌-୨’ ତୁଳନାରେ ଏଥର ଅପେକ୍ଷାକୃତ ଶସ୍ତା ସଂସ୍କରଣ ଛାଡୁଥିବାରୁ ଗ୍ରାହକମାନଙ୍କ ମଧ୍ୟରେ ଉତ୍ସାହ ବଢ଼ିବାରେ ଲାଗିଛି। ଏହି ନୂତନ ଫୋନ୍‌ର ବଜାର ପ୍ରବେଶ ପାଇଁ ଆହୁରି ପ୍ରାୟ ତିନି ସପ୍ତାହ ବାକିଥିବାରୁ ଏହାରି ଭିତରେ କମ୍ପାନି ପକ୍ଷରୁ ଫୋନ୍‌ ସମ୍ପର୍କିତ ସବିଶେଷ ବିବରଣୀ ଆସିପାରିବ ବୋଲି ଆଶା କରାଯାଉଛି।