ଲୋକସଭା ବାଚସ୍ପତି ଶ୍ରୀ ଓମ୍ ବିର୍ଲା ଭୁବନେଶ୍ୱରଠାରେ ସଂସଦ ଏବଂ ରାଜ୍ୟ ବିଧାନସଭାର ଅନୁସୂଚିତ ଜାତି ଏବଂ ଜନଜାତି କଲ୍ୟାଣ ସମିତି ଅଧ୍ୟକ୍ଷମାନଙ୍କ ଦୁଇ ଦିନିଆ ଜାତୀୟ ସମ୍ମିଳନୀକୁ ଉଦଘାଟନ କରିଛନ୍ତି। ଲୋକସେବା ଭବନର କନ୍ଭେନ୍ସନ୍ ହଲ୍ରେ ଆୟୋଜିତ ଦୁଇଦିନିଆ ଜାତୀୟ ସମ୍ମିଳନୀକୁ ଲୋକସଭା ବାଚସ୍ପତି ଓମ୍ ବିର୍ଲା ଉଦ୍ଘାଟନ କରିଛନ୍ତି। ଏହି ଅବସରରେ ବାଚସ୍ପତି କହିଥିଲେ, ଦେଶରେ ଅନୁସୂଚିତ ଜାତି ଓ ଜନଜାତି ବର୍ଗର ଯାହା ବି ଉନ୍ନତି ହୋଇଛି ତାହା ଏହି କମିଟିର ପ୍ରସ୍ତାବ, ଅନୁଶୀଳନ ଓ ତଦାରଖ ଯୋଗୁ ସମ୍ଭବ ହୋଇଛି। ବର୍ତ୍ତମାନର ବଦଳୁଥିବା ପରିସ୍ଥିତିକୁ ଲକ୍ଷ୍ୟ ରଖି ଏହି ସମ୍ମିଳନୀରେ ଯାହା ପ୍ରସ୍ତାବ ପାରିତ ହେବ, ତାହାକୁ କାର୍ଯ୍ୟକାରୀ କରାଯିବ। ଫଳରେ ଦେଶରେ ଏକ ସମତାଭିତ୍ତିକ ସମାଜ ଗଠନ ପାଇଁ ଯେଉଁ ଲକ୍ଷ୍ୟ ଅଛି ତାହା ପୂରଣ ହୋଇପାରିବ। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଲେ, ଜାତୀୟ ଓ ଅନ୍ତର୍ଜାତୀୟ ସମ୍ମିଳନୀ ଓଡ଼ିଶାରେ ଆୟୋଜିତ ହେବା ଫଳରେ ଜାତୀୟସ୍ତରରେ ଓଡ଼ିଶାର ଗୁରୁତ୍ୱ ବଢ଼ୁଛି। ଭୁବନେଶ୍ୱରର ଏହି ସମ୍ମିଳନୀ ଅନୁସୂଚିତ ଜାତି ଓ ଜନଜାତି ବର୍ଗଙ୍କ ପାଇଁ ଏକ ସମୃଦ୍ଧ ଭବିଷ୍ୟତର ରାସ୍ତା ନିର୍ମାଣ କରିବ। ଓଡ଼ିଶାର ୪୦% ଜନସାଧାରଣ ଦଳିତ ଓ ଜନଜାତି ବର୍ଗର। ବିକାଶ ସହିତ ଆଦିବାସୀ ସଂସ୍କୃତିର ସୁରକ୍ଷା ପାଇଁ ରାଜ୍ୟ ସରକାର ଆଦିବାସୀ ସଂସ୍କୃତି ଓ ଐତିହ୍ୟ ଭବନ, ଆଦିବାସୀ ଭାଷା ପ୍ରତିଷ୍ଠାନ ମଧ୍ୟ ନିର୍ମାଣ କରୁଛନ୍ତି। ଜନଜାତି ଭାଷାରେ ପାଠ ପଢ଼ାଇବା ପାଇଁ ପଦକ୍ଷେପ ନିଆଯାଇଛି।
ଦେଶବ୍ୟାପୀ ୧୨୦ରୁ ଅଧିକ ପ୍ରତିନିଧି ଏହି ଦୁଇ ଦିନିଆ ସମ୍ମିଳନୀରେ (୨୯-୩୦ ଅଗଷ୍ଟ) ଅଂଶଗ୍ରହଣ କରୁଛନ୍ତି । ଏହି ମଞ୍ଚରେ ସର୍ବୋତ୍ତମ ଅଭ୍ୟାସ ଓ ଅଭିଜ୍ଞତା ବାଣ୍ଟିବା ଏବଂ ଅନୁସୂଚିତ ଜାତି ଓ ଜନଜାତିଙ୍କ ଅଧିକାରକୁ ସୁରକ୍ଷିତ ରଖିବା ପାଇଁ ଅଧିକ ପ୍ରଭାବଶାଳୀ ନୀତି ପ୍ରସ୍ତୁତ କରିବା ସହିତ ଏହାକୁ କାର୍ଯ୍ୟକାରୀ କରିବା ଲାଗି ରଣନୀତି ପ୍ରସ୍ତୁତ କରିବା ନେଇ ବିଚାରବିମର୍ଶ କରାଯାଉଛି।
ଏହି ଜାତୀୟ ସମ୍ମିଳନୀରେ ଉଦବୋଧନ ଦେଇ ଶ୍ରୀ ଓମ୍ ବିର୍ଲା ରାଜ୍ୟ ବିଧାନସଭା ଏବଂ ସଂସଦରେ ବିତର୍କ, ଆଲୋଚନା, ଭାଷା ଏବଂ ଆଚାର ବ୍ୟବହାରର ମାନ ହ୍ରାସ ପାଇବାକୁ ନେଇ ଚିନ୍ତା ପ୍ରକାଶ କରିଥିଲେ। ଶ୍ରୀ ବିର୍ଲା ଗୁରୁତ୍ୱାରୋପ କରି କହିଥିଲେ, ଏପରି ପରିସ୍ଥିତିରେ ସଂସଦୀୟ ତଥା ବିଧାନସଭା ସମିତିଗୁଡ଼ିକର ଭୂମିକା ଆହୁରି ଗୁରୁତ୍ୱପୂର୍ଣ୍ଣ। ଏହି ସମିତିଗୁଡ଼ିକର ଅନନ୍ୟ ଶକ୍ତି ରହିଛି ଏବଂ ତାହା ହେଉଛି ଦଳୀୟ ରାଜନୀତିଠାରୁ ଊର୍ଦ୍ଧ୍ବରେ ରହି କାର୍ଯ୍ୟ କରିବାର କ୍ଷମତା। ସେହିପରି ସହଭାଗୀ ଆଭିମୁଖ୍ୟ ଏବଂ ସାମୂହିକ ଦୃଷ୍ଟିକୋଣକୁ ପ୍ରୋତ୍ସାହିତ କରିବାର କ୍ଷମତା ମଧ୍ୟ ଏଭଳି ସମିତି ପାଖରେ ରହିଛି। ସଂସଦୀୟ ସମିତିଗୁଡ଼ିକ ଶାସନ ଉପରେ ମୂଲ୍ୟବାନ ନୀତିଗତ ଦୃଷ୍ଟିକୋଣ ଓ ବିଚାର ପ୍ରଦାନ କରି ସମାନତା, ସ୍ୱଚ୍ଛତା ଏବଂ ନବସୃଜନକୁ ପ୍ରୋତ୍ସାହିତ କରନ୍ତି ବୋଲି ସେ ଜୋର ଦେଇ କହିଥିଲେ ।
ଦୁଇ ଦିନିଆ ସମ୍ମିଳନୀର ଗୁରୁତ୍ୱ ଉପରେ ଆଲୋକପାତ କରି ଶ୍ରୀ ବିର୍ଲା ସମିତିଗୁଡ଼ିକୁ ସାମାଜିକ, ଆର୍ଥିକ ଏବଂ ପ୍ରଶାସନିକ ଶକ୍ତି ପ୍ରଦାନ କରି ଉପେକ୍ଷିତ ସମ୍ପ୍ରଦାୟଗୁଡ଼ିକୁ ସଶକ୍ତ କରିବା ଦିଗରେ କାର୍ଯ୍ୟ କରିବାକୁ ଆହ୍ୱାନ ଦେଇଥିଲେ। ସେ ପ୍ରତ୍ୟେକ ରାଜ୍ୟ ସମିତିକୁ କେନ୍ଦ୍ର ଓ ରାଜ୍ୟ ମଧ୍ୟରେ ଅନ୍ୟମାନଙ୍କ କାର୍ଯ୍ୟକାରିତା ଅଧ୍ୟୟନ ଓ ସମୀକ୍ଷା କରିବାକୁ ପରାମର୍ଶ ଦେଇଥିଲେ। ସେହିପରି ସର୍ବୋତ୍ତମ ଅଭ୍ୟାସରୁ ଶିଖିବା, ଅଭିନବ ପଦ୍ଧତି ଗ୍ରହଣ କରିବା ଏବଂ ସାମାଜିକ ଉନ୍ନତି ତଥା ସାମଗ୍ରିକ ଜାତୀୟ ବିକାଶ ସୁନିଶ୍ଚିତ କରିବାରେ ଯୋଗଦାନ ଦେବାକୁ ଆହ୍ୱାନ ଦେଇଥିଲେ।
ଲୋକସଭା ବାଚସ୍ପତି ଗୁରୁତ୍ୱ ଦେଇ କହିଥିଲେ, ଆଇନ ଆଗରେ ସମାନତା, ଆଇନର ସମାନ ସୁରକ୍ଷା ଏବଂ ସାମାଜିକ, ଆର୍ଥିକ ଓ ରାଜନୈତିକ ନ୍ୟାୟ ସୁନିଶ୍ଚିତ କରୁଥିବା ସାମ୍ବିଧାନିକ ବ୍ୟବସ୍ଥାଗୁଡ଼ିକ ଭାରତର ପ୍ରଗତି ପାଇଁ ମୂଳଦୁଆ ପ୍ରମାଣିତ ହୋଇଛି । ସେ କହିଥିଲେ, ସମାନତା ଏବଂ ନ୍ୟାୟର ନୀତି ଶେଷ ନାଗରିକଙ୍କ ପାଖରେ ପହଞ୍ଚିଲେ ହିଁ ଗଣତନ୍ତ୍ର ଏହାର ପୂର୍ଣ୍ଣ ଅର୍ଥ ଏବଂ ଶକ୍ତି ହାସଲ କରିବ।
ଶ୍ରୀ ବିର୍ଲା କହିଥିଲେ, ଗତ ସାଢ଼େ ସାତ ଦଶନ୍ଧି ଧରି ଭାରତର ଯାତ୍ରାରେ ସବୁଠାରୁ ପଛୁଆ ବର୍ଗର ଲୋକଙ୍କୁ ସଶକ୍ତ କରିବା ପାଇଁ ନିରନ୍ତର ପ୍ରୟାସ କରାଯାଇଛି । ଆଜି, ସରକାରୀ କ୍ଷେତ୍ରର ଉଦ୍ୟୋଗ, ଆର୍ଥିକ ପ୍ରତିଷ୍ଠାନ ଏବଂ ଜାତୀୟ ଶିକ୍ଷା ନୀତି ଭଳି ଶିକ୍ଷାଗତ ସଂସ୍କାରଗୁଡ଼ିକ ଅନୁସୂଚିତ ଜାତି ଓ ଜନଜାତିଙ୍କ ପାଇଁ ସୁଯୋଗ ବିସ୍ତାର କରିବା ଦିଗରେ କାର୍ଯ୍ୟ କରୁଛନ୍ତି। ଶିକ୍ଷା ଏବଂ ସାମାଜିକ ନ୍ୟାୟ ହାତ ମିଳାଇ ଚାଲିବା ଏବଂ ଦୁର୍ବଳ ବର୍ଗର ହକ୍ ସୁରକ୍ଷା ଦେଶର ନୀତିନିର୍ଦ୍ଧାରଣର କେନ୍ଦ୍ରରେ ରହିବା ଉଚିତ।
ଏହି ସମ୍ମିଳନୀ ଅର୍ଥପୂର୍ଣ୍ଣ ସଂକଳ୍ପ, ବ୍ୟବହାରିକ ପରାମର୍ଶ ଏବଂ ଅଭିନବ ଚିନ୍ତାଧାରା ମାଧ୍ୟମରେ ସାମାଜିକ ନ୍ୟାୟ ସୁନିଶ୍ଚିତ କରିବାରେ ସମିତିଗୁଡ଼ିକର ଭୂମିକାକୁ ଆହୁରି ମଜବୁତ କରିବ ବୋଲି ଶ୍ରୀ ବିର୍ଲା ବିଶ୍ୱାସ ପ୍ରକଟ କରିଥିଲେ। ସେ କହିଥିଲେ, ଏକ ସମାବେଶୀ ଏବଂ ସମାନତାପୂର୍ଣ୍ଣ ସମାଜ ପାଇଁ ଏକ ରୋଡମ୍ୟାପ୍ ନିର୍ମାଣ କରିବାରେ ଏହି ସମ୍ମିଳନୀ ସହାୟକ ହେବ। ଏଥିସହିତ ନ୍ୟାୟ, ସମାନତା ଏବଂ ସମସ୍ତଙ୍କ ପାଇଁ ସମ୍ମାନର ମୂଲ୍ୟବୋଧ ଆଧାରରେ ୨୦୪୭ ସୁଦ୍ଧା ଏକ ବିକଶିତ ଭାରତ ଗଠନର ଆକାଂକ୍ଷାକୁ ଗତି ଦେବ। ସମ୍ମିଳନୀର ଫଳାଫଳ ଅନୁସୂଚିତ ଜାତି ଏବଂ ଜନଜାତିଙ୍କ କଲ୍ୟାଣ ପାଇଁ ଦୀର୍ଘକାଳୀନ ନୀତି ନିର୍ଦ୍ଧାରଣରେ ମାର୍ଗଦର୍ଶନ କରିବ ସେ ଆଶା ପ୍ରକାଶ କରିଥିଲେ।