ସେମିରେ ଆଜି ଦକ୍ଷିଣ ଆଫ୍ରିକା-ଅଷ୍ଟ୍ରେଲିଆ

କୋଲ୍‌କାତା: ଇଡେନ୍‌ ଗାର୍ଡେନ୍ସ ଷ୍ଟାଡିୟମରେ ଆଜି ଚଳିତ ବିଶ୍ବକପ୍‌ର ଦ୍ବିତୀୟ ସେମିଫାଇନାଲ୍‌ରେ ୫ ଥର ବିଜେତା ଅଷ୍ଟ୍ରେଲିଆକୁ ଭେଟିବ ଦକ୍ଷିଣ ଆଫ୍ରିକା। ଲିଗ୍‌ ପର୍ଯ୍ୟାୟରେ ଉଭୟ ଦଳ ସମାନ ୧୪ ପଏଣ୍ଟ ଲେଖାଏଁ ପାଇଥିଲେ ମଧ୍ୟ ଦକ୍ଷିଣ ଆଫ୍ରିକା ନେଟ୍‌ ରନ୍‌ ରେଟ୍‌ରେ ଆଗରେ ରହି ଦ୍ବିତୀୟ ସ୍ଥାନରେ ସେମିଫାଇନାଲ୍ ସ୍ଥାନ ପକ୍କା କରିଛି। ଅଷ୍ଟ୍ରେଲିଆ ତୃତୀୟ ଦଳ ଭାବେ ଏହି ଲଢ଼େଇରେ ପହଞ୍ଚିଛି। ଦକ୍ଷିଣ ଆଫ୍ରିକା ୧୯୯୨, ୧୯୯୯, ୨୦୦୭, ୨୦୧୫ରେ ସେମିଫାଇନାଲ୍‌ ଖେଳିଥିଲେ ମଧ୍ୟ ତା’ଆଗକୁ ବଢ଼ିବାକୁ ସକ୍ଷମ ହୋଇନି। ଚଳିତ ଥର ତେମ୍ବା ବଭୂମାଙ୍କ ଦଳ ପ୍ରଥମ ଥର ବିଶ୍ବକପ୍‌ ଫାଇନାଲ୍‌ ଖେଳିବା ଆଶା ବାନ୍ଧିଛି। ୧୯୯୯ରେ ଅଷ୍ଟ୍ରେଲିଆ ସହ ସେମିଫାଇନାଲ୍‌ ଖେଳ ବେଳେ ଏ‌ହି ମ୍ୟାଚ୍‌ ନାଟକୀୟ ଭାବେ ଟାଇ ହୋଇଥିଲା। ଫଳରେ ପୂର୍ବ ପ୍ରଦର୍ଶନ ଆଧାରରେ ଅଷ୍ଟ୍ରେଲିଆ ଫାଇନାଲ୍‌ରେ ପହଞ୍ଚିଥିଲା ଏବଂ ଦକ୍ଷିଣ ଆଫ୍ରିକାର ଅଭିଯାନ ସେମିରେ ଶେଷ ହୋଇଯାଇଥିଲା। ୨୦୦୭ରେ ମଧ୍ୟ ସେହି ଅଷ୍ଟ୍ରେଲିଆ ସହ ସେମି ଲଢ଼େଇରେ ଅବତୀର୍ଣ୍ଣ ହୋଇଥିଲା ଦକ୍ଷିଣ ଆଫ୍ରିକା। ପ୍ରଥମେ ବ୍ୟାଟିଂ କରିଥିବା ଦକ୍ଷିଣ ଆଫ୍ରିକା ୧୪୯ ରନ୍‌ରେ ଅଲ୍‌ଆଉଟ୍‌ ହୋଇଯାଇଥିଲା। ଅଷ୍ଟ୍ରେଲିଆ ୩ ୱିକେଟ୍‌ ହରାଇ ମ୍ୟାଚ୍‌କୁ ସହଜରେ ଜିତି ନେଇଥିଲା। ତେବେ ଏହି ଦୁଇ ସେମିଫାଇନାଲ୍‌ ପରାଜୟର ପ୍ରତିଶୋଧ ଇଡେନ୍‌ରେ ନେବାକୁ ଲକ୍ଷ୍ୟ ରଖିଛି ଦକ୍ଷିଣ ଆଫ୍ରିକା। ଲିଗ୍‌ ପର୍ଯ୍ୟାୟରେ ଚମତ୍କାର ଖେଳିଥିବା ‌ଦକ୍ଷିଣ ଆଫ୍ରିକା କେବଳ ଭାରତ ଓ ନେଦରଲାଣ୍ଡ୍‌ସଠୁ ହାରିଛି।