ଇଡି ଆଗରେ ଅର୍ପିତାଙ୍କ ବୟାନ

ପଶ୍ଚିମବଙ୍ଗର ପୂର୍ବତନ ମନ୍ତ୍ରୀ ପାର୍ଥ ଚାଟାର୍ଜୀଙ୍କ ସହଯୋଗୀ ଅର୍ପିତା ମୁଖାର୍ଜୀ ଗୁରୁବାର ପ୍ରବର୍ତ୍ତନ ନିର୍ଦେଶାଳୟ ଆଗରେ କହିଛନ୍ତି ଘରେ ଏତେ ଟଙ୍କା ଥିଲା ତାହା ତାଙ୍କୁ ଜଣାନଥିଲା। ସେ କହିଛନ୍ତି, କୋଲକାତାର ଦୁଇଟି ଆପାର୍ଟମେଣ୍ଟରେ କେତେ ଟଙ୍କା ଓ ଦାମୀ ଜିନିଷ ରଖାଯାଇଥିଲା ତାହା ତାଙ୍କୁ ଜଣାଇବାକୁ ଦିଆଯାଉନଥିଲା। କାରଣ ପାର୍ଥ ଚାଟାର୍ଜୀ ତାଙ୍କୁ କେବେ ବି ‘ବନ୍ଦ ରୁମ୍‌’ ଭିତରକୁ ଯିବାକୁ ଅନୁମତି ଦେଇନଥିଲେ। ଅର୍ପିତା ମୁଖାର୍ଜୀ ଇଡି ନିକଟରେ ସ୍ବୀକାର କରିଛନ୍ତି ଯେ, ତାଙ୍କୁ ଏସବୁ ଟଙ୍କା ରଖିବାକୁ ବାଧ୍ୟ କରାଯାଇଥିଲା। ଏପରକି ଘରେ ଟଙ୍କା ରଖିବା ପାଇଁ ପାର୍ଥ ଚାଟାର୍ଜୀ ତାଙ୍କର ଜଣେ ସହଯୋଗୀଙ୍କ ସାହାଯ୍ୟ ନେଇଥିଲେ।ଇଡିର ଜଣେ ଅଧିକାରୀ କହିଛନ୍ତି, ଅର୍ପିତା ସ୍ବୀକାର କରିଛନ୍ତି ଯେ, ପାର୍ଥ ଚାଟାଜୀ ତାଙ୍କର ଟଲିଗଞ୍ଜ ଓ ବେଲଘାରିୟା ଦୁଇଟି ବାସଭବନକୁ ଗୋଟେ କିମ୍ବା ଦୁଇ ସପ୍ତାହ ଭିତରେ ଥରେ କିମ୍ବା ଦୁଇ ଥର ଆସୁଥିଲେ। ତାଙ୍କ ସହିତ ଏକ ଅଜଣା ବ୍ୟକ୍ତି ମଧ୍ୟ ଆସୁଥିଲେ। ଅଧିକାରୀମାନେ କହିଛନ୍ତି, ଅର୍ପିତା ଚାଟାର୍ଜୀ ଆଲମାରୀ ଖୋଲିବାକୁ କିମ୍ବା ସେହି ରୁମ୍‌କୁ ବାରମ୍ବାର ନଯିବାକୁ ନିର୍ଦେଶ ଦେଇଥିଲେ, ଯେଉଁଠାରୁ ନଗଦ ଟଙ୍କା ଜବତ କରିଥିଳେ। ଏହା ଜଣାପଡିଛି ଯେ, ଚାଟାର୍ଜୀ ମଧ୍ୟ ଅର୍ପିତାଙ୍କ ଘରକୁ ଯିବା ବେଳେ କିଛି ଅଜଣା ଲୋକଙ୍କ ସହିତ ବନ୍ଦ ରୁମ୍‌ରେ ବୈଠକ କରୁଥିଲେ।