ଭୁବନେଶ୍ବର ମହାନଗର ନିଗମ (ବିଏମ୍ସି)ର ଅତିରକ୍ତ କମିସନର ରତ୍ନାକର ସାହୁଙ୍କୁ ଆକ୍ରମଣ ଘଟଣାରେ ଗିରଫ ହୋଇଥିବା ଭାରତୀୟ ଜନତା ପାର୍ଟି (ବିଜେପି)ର ବରିଷ୍ଠ ନେତା ଜଗନ୍ନାଥ ପ୍ରଧାନ ଝାରପଡ଼ା ଜେଲରୁ ବାହାରିଛନ୍ତି। ଜଗା ପ୍ରଧାନ ଜେଲ୍ରୁ ବାହାରିଲା ପରେ ତାଙ୍କ ସମର୍ଥକମାନେ ତାଙ୍କର ସ୍ବାଗତ କରିଛନ୍ତି। ବାଣ ଫୁଟାଇଛନ୍ତି। ଜଗା ପ୍ରଧାନଙ୍କୁ ଫୁଲମାଳ ପିନ୍ଧାଇଛନ୍ତି।
ଭୁବନେଶ୍ୱର ମହାନଗର ନିଗମ (ବିଏମ୍ସି)ର ଅତିରିକ୍ତ କମିଶନର ରତ୍ନାକର ସାହୁଙ୍କୁ ଆକ୍ରମଣ ଘଟଣା ୨୦୨୫ ଜୁନ୍ ୨୬ ତାରିଖରେ ସତ୍ୟନଗରସ୍ଥିତ ବିଏମ୍ସି କାର୍ଯ୍ୟାଳୟରେ ଏକ ଜନଶୁଣାଣି ବୈଠକ ଚାଲିଥିବା ବେଳେ ଘଟିଥିଲା। ପାଞ୍ଚରୁ ଛଅ ଜଣ ବ୍ୟକ୍ତି କାର୍ଯ୍ୟାଳୟକୁ ପ୍ରବେଶ କରି ରତ୍ନାକର ସାହୁଙ୍କୁ ଆକ୍ରମଣ କରିଥିଲେ। ଅଭିଯୋଗ ଅନୁଯାୟୀ, ବିଜେପି ନେତା ଜଗନ୍ନାଥ ପ୍ରଧାନଙ୍କ ନେତୃତ୍ୱରେ ଆକ୍ରମଣକାରୀମାନେ ସାହୁଙ୍କୁ ମାଡ଼ ମାରିଥିଲେ ।
ଏହି ଘଟଣାରେ ରତ୍ନାକର ସାହୁ ଖାରବେଳା ନଗର ଥାନାରେ ଅଭିଯୋଗ ଦାୟର କରିଥିଲେ। ପୁଲିସ୍ ସିସିଟିଭି ଫୁଟେଜ୍ ଆଧାରରେ ତଦନ୍ତ ଆରମ୍ଭ କରିଥିଲା। ଜଗନ୍ନାଥ ପ୍ରଧାନଙ୍କୁ ଏହି ଆକ୍ରମଣ ମାମଲାରେ ଗିରଫ କରାଯାଇ ଝାରପଡ଼ା ଜେଲ୍ରେ ନ୍ୟାୟିକ ହାଜତକୁ ପଠାଯାଇଥିଲା। ତେବେ, ୨୦୨୫ ଜୁଲାଇ ୯ ତାରିଖରେ ସେ ୩୦,୦୦୦ ଟଙ୍କାର ଜାମିନ ଓ ଜଣେ ଜାମିନଦାର ସହିତ ଜାମିନରେ ମୁକୁଳିଥିଲେ। ଜଗନ୍ନାଥ ପ୍ରଧାନ ଦାବି କରିଛନ୍ତି ଯେ ସେ ବିପକ୍ଷ ଦଳ ଏବଂ ଓଏଏସ୍ ସଂଘର ଷଡ଼ଯନ୍ତ୍ରର ଶିକାର ହୋଇଛନ୍ତି। ତାଙ୍କ କହିବା ଅନୁଯାୟୀ, ଜଣେ ମହିଳା ସହକର୍ମୀଙ୍କ ସମସ୍ୟା ନେଇ ରତ୍ନାକର ସାହୁଙ୍କ ସହ ଫୋନ୍ରେ କଥାବାର୍ତ୍ତା ହୋଇଥିଲା, ଯେଉଁଥିରେ ସାହୁ ତାଙ୍କ ସହ ଦୁର୍ବ୍ୟବହାର କରିଥିଲେ, ଯାହା ତାଙ୍କୁ ଏହି ପଦକ୍ଷେପ ନେବାକୁ ପ୍ରେରିତ କରିଥିଲା। ସେ ଆଇନ ଉପରେ ଆସ୍ଥା ରଖିଥିବା କହିଛନ୍ତି ଏବଂ ଏହି ମାମଲାରେ ସେସନ୍ସ କୋର୍ଟରେ ଆବେଦନ କରିବେ ବୋଲି ଜଣାଇଛନ୍ତି।