ତେଲେଙ୍ଗାନାରେ ତ୍ରିମୁଖୀ ଲଢ଼େଇ

ତେଲେଙ୍ଗାନା ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା କରାଯାଇ ସାରିଛି। ନଭେମ୍ବର ୩୦ ତାରିଖରେ ଏଠାରେ ମତଦାନ ହେବ। ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓଙ୍କ ନେତୃତ୍ବରେ ଶାସକ ବିଆର୍‌ଏସ୍‌ ଏଠାରେ ଏବେ ଶାସନ କରୁଛି। କ୍ରମାଗତ ଭାବେ ତୃତୀୟ ଥର ଲାଗି କେସିଆର୍‌ ଶାସନକୁ ଫେରିବାକୁ ଆଶା ରଖିଛନ୍ତି। ଗତ ମେ ମାସରେ ‌ପଡ଼ୋଶୀ କର୍ଣ୍ଣାଟକରେ ଅନୁଷ୍ଠିତ ବିଧାନସଭା ନିର୍ବାଚନରେ ବିଜେପି ପରାଜିତ ହୋଇଥିଲା। ସେଠାରେ କଂଗ୍ରେସ ସରକାରକୁ ଆସିଛି। କର୍ଣ୍ଣାଟକ ବିଧାନସଭା ନିର୍ବାଚନରେ ବିଜେପିର ପରାଜୟ ପାଇଁ ଏଥର ତେଲେଙ୍ଗାନାରେ ଦ୍ଵିମୁଖୀ ଲଢ଼େଇ ହେବ ବୋଲି ପୂର୍ବରୁ ଅନୁମାନ କରାଯାଉଥିଲା।କର୍ଣ୍ଣାଟକ ବିଜୟ ପରେ ତେଲେଙ୍ଗାନାରେ କେସିଆରଙ୍କ ଦଳ ବିଆର୍‌ଏସ୍‌ ସହିତ ଜୋରଦାର ଲଢ଼େଇ କରିବା ନେଇ କଂଗ୍ରେସର ଉତ୍ସାହ ବଢ଼ିଥିବାବେଳେ ବିଜେପି ଏଠାରେ ୧୧୯ଟି ଯାକ ବିଧାନସଭା ଆସନ ମଧ୍ୟରୁ ଅଧିକାଂଶ ଆସନରେ ପ୍ରାର୍ଥୀ ଦେବା ଉପରେ କାର୍ଯ୍ୟ କରୁଛି। ୨୦୨୦ରେ ବୃହତ୍‌ ହାଇଦ୍ରାବାଦ ମହାନଗର ନିଗମ ନିର୍ବାଚନରେ ୧୫୦ ଆସନରୁ ବିଜେପି ୪୮ଟି ଆସନରେ ଜିତିଥିଲା। ଏହାପରେ ତେଲେଙ୍ଗାନାରେ ବିଜେପି ଭଲ କରିବ ବୋଲି ଆଶା ରଖିଥିଲା। କିନ୍ତୁ ଏବେ ଅଧିକାଂଶ ଆସନରେ ବିଜେପିର ସ୍ଥିତି ଖରାପ ଥିଲେ ବି ଦଳ ନିର୍ବାଚନ ଲଢ଼ିବ। ସରକାରୀ ବିରୋଧୀ ହାୱାର ସଂପୂର୍ଣ୍ଣ ଲାଭ ଯେଭଳି କଂଗ୍ରେସକୁ ନଯାଏ ତାହାକୁ ଦୃଷ୍ଟିରେ ରଖି ବିଜେପି ପାର୍ଥୀ ଦେବ। ଏହାବ୍ୟତୀତ ତେଲେଙ୍ଗାନାରେ ଅନେକ ଆସନରେ ସଂଖ୍ୟାଲଘୁମାନଙ୍କ ଭୋଟ ବିଜୟରେ ନିର୍ଣ୍ଣାୟକ ଭୂମିକା ଗ୍ରହଣ କରିଥାଏ।